1 Nabok pui veng Yezerelax koe sipeem plix siiet tix gwang ka daux veng Yezerelax mai dex nyiex haw Ahap simiang Samarix heue. 2 Ahap ah nin ka Nabok, “Tawx sipeem plix siiet maix ka aux, sonsang yuh aux sipeem taux ka, mawh kheu dex nyiex haw aux, son an aux tak tawx maix cie sipeem plix siiet pa nie lheu mhawm khaing an, phan maix khaw rhawm kah, aux tak tawx mau awm pa khaw jum ka maix heue.” 3 Mai Nabok ah nin ka nawh, “Simiang Siyiex tak thiang ka pa sang tawx aux sinngao keeing tix ka maix heue.” 4 Ahap deeh laig ka nyiex haw tix ka daux pa laux pakngai mai voi rhawm tix, kheu jao lox pa ah Nabok pui veng Yezerelax ka nawh, Aux tak ang pon tawx sinngao haktiex keeing tix ka maix heue. “Mai Ahap it ka piang ku it tix mai veeh ngai tix dee singai mai ang lai ih priex heue.” 5 Mai moeng nawh Yezabelax hoek ah nin ka nawh, “Yuh tix, maix voi rhawm mai ang ih priex yuh ka mawh?” 6 Nawh deeh ah nin ka moeng tix, “Mawh kheu ah aux nin ka Nabok, pui veng Yezerelax, coh sipeem plix siiet maix ka aux, phan khaw rhawm maix, aux tak deeh plud gwang sipeem plix siiet son an ka maix, mai nawh pawk lox aux ah nin, aux ang pon tawx sipeem plix siiet tix ka maix heue” 7 Mai moeng nawh Yezabelax ah nin ka nawh, “Maix mawh pa koe siawp sibrawm ka piang pui Isarelax ang mawh lie? Kaoh ih priex mai kieh maix koe krax nyawm rhawm, aux tak tawx sipeem plix siiet Nabok pui veng Yezerelax ka maix heue.” 8 Yezerelax tiiem lai ka min ceu kaux Ahap mai tawk cum Ahap ka mai tawx lai an hu ka kuad riex ju mai pui pa koe siawp khankix pa ot ka daux veng tau mai Nabok heue. 9 Mai ah nin ka daux lai, “Krai pao kieh twah pa ih mai kieh Nabok ngawm dee lhaong ka sinax pui khankix, 10 mai deuh pui caox ra kaux ngawm ka plak sivoe nawh, sonsang mawh kix pa kham mhai ruk ka son nawh ah nin, maix hoik jhax lawg ka Siyiex mai ka simiang mai teei nawh lih plak praix mai dheem yum ka simaox heue.” 11 Pui veng nawh khankix, kwad riex ju mai pui pa koe siawp sibrawm pa ot ka daux veng nawh khankix, yuh awm lox pa hoik tiem Yezerelax ka daux lai pa sipaox nawh hoek ka kix heue. 12 Kieh kix krai pao twah pa ih mai kieh Nabok ngawm dee lhaong daux sinax pui heue. 13 Mai kieh pui caox ra kaux ngawm ka plak sivoe nawh, mai pui caox an kham mhai sakse grawng Nabok ka plak sivoe ngai pui khankix ah nin, “Nabok jhax lawg ka Siyiex mai ka simiang heue. “Mai kix teei nawh lih plak praix veng mai dheem nawh yum ka simaox heue. 14 Kix ploi pui hu ah nin ka Yezabelax, “Hoik dheem Nabok yum ka simaox heue.” 15 Yam mhong Yezabelax ka hoik dheem kix “Nabok yum ka simaox Yezabelax ah nin ka Ahap, kaoh heue, teei sipeem plix siiet cie Nabok pui veng Yezerelax, pa ang nawh cu tix coh ka maix, mawh kheu Nabok ang lai im ju, nawh hoik yum heue.” 16 Yam mhong Ahap ka hoik yum Nabok, Ahap yaog ti kaoh mai lih hu sonsang teei ka sipeem plix siiet Nabok pui veng Yezerelax heue. 17 Khaix an, gumlox Simiang Siyiex hoek ka Eliyax pui veng Tishabix ah nin, 18 “Kaox heue, lih hu pub ka Ahap simiang pui Isarelax, pa ot ka veng Samarix heue. Nawh ot ka daux sipeem plix siiet cie Nabok pa hoik teei nawh ti cie heue. 19 Maix tak krai ah nin ka nawh, Simiang Siyiex ah yuh nin, “Maix hoik pah cao sipeem yum mai teei ti cie sinngao nawh, “maix tak ah nin ka nawh, Simiang Siyiex ah nin, lied sox nham Nabok ka dee mawx, sox kawx tak lied nham maix ka dee an heue.” ” 20 Khaix an, Ahap ah nin ka Eliyax, “Pui koeng aux eue, hoik yaox maix ka aux lie?” Nawh pawk ah nin, “Aux hoik yaox ka maix, mawh kheu hoik coh maix tokaux tix sonsang yuh pa caox ka plak sivoe ngai Simiang Siyiex heue. 21 Jhak heue, aux tak viex pa caox caig hoek ka piang maix, Aux tak teei ti tik pex dee singai, Aux tak teei ti tik simex ku kaux mai pa giex laung mai pui pa ploi ka daux pui Isarelax khaing Ahap heue. 22 Aux tak yuh doeh nyiex ma maix awm doeh nyiex ma Yerobom kawn simex Nebat mai awm doeh nyiex ma Basha kawn simex Ahiyax, kheu so maix pa song rhawm Aux mai kieh pui Isarelax yuh phimap heue. 23 Simiang Siyiex ah nin ka grawng pa dex mai Yezabelax, sox khankix tak ih Yezabelax hawt guh veng Yezerelax heue.Ref 21:23 2Sim 9:36. 24 Sox tak ih pui Ahap khankix, pa yum ka daux veng mai sim raoma tak ih pui yum ka daux tong kaung heue.” 25 Ang koe pui pa coh tokaux tix sonsang yuh pa caox caig ka plak sivoe ngai Simiang Siyiex, awm Ahap ang koe tix kaux kawx, mawh kheu nghiet nawh lox jeeh nyaw moeng ti Yezabelax heue. 26 Nawh hoik kied yuh pa seeing brai ka daux pa hawt tix khaix riang grang Asherax, awm pa hoik yuh pui Amawrix khankix, pa hoik grheu Simiang Siyiex khaing plak sivoe pui Isarelax khankix heue. 27 Yam mhong Ahap lox Eliyax, nawh riah kraung ceep tix mai ceep chee rhix mai twah pa ih mai it khawm chee rhix mai lailing ka daux pa dah rhawm tix heue. 28 Mai gumlox Simiang Siyiex hoek ka Eliyax pui veng Tishabix ah nin, 29 “Hoik yaox maix Ahap koe rhawm awn rhawm tiiem ka plak sivoe ngai Aux lie? Mawh kheu nawh hoik koe rhawm awn rhawm tiiem ka plak sivoe ngai Aux, Aux tak ang viex pa caox hoek ka daux singaix pa im ju nawh, viang mawh nan, Aux tak viex pa caox hoek ka piang doeh nyiex ma singaix ju kawn nawh heue.”