22
Mikha Tawx Satix Ka Ahap
(2Been 18:1-34)
1 Naing ang lai koe sinax Surix mai Isarelax loe num heue.
2 Yam hoek loe num tix num, simiang meung Yudax pa mawh Yehoshaphat hu si pub ka simiang meung Isarelax heue.
3 Simiang Isarelax ah nin ka kawncau tix, “Tawng pex veng Ramot pa koe daux haktiex Gilat mawh cie ex lie? Mawh ot yawg ex tix mai ang nied ti teei khaing tawm taix simiang Surix lie?”
4 Nawh chawk Yehoshaphat ah nin, “Sang hu puing maix veng Ramot ka daux haktiex Gilat tau mai aux lie?” Mai Yehoshaphat ah nin ka simiang pui Isarelax, “Aux awm rhawm maix, pui aux awm pui maix, brung aux khankix awm brung maix heue.”
5 Mai Yehoshaphat ah nin ka simiang pui Isarelax, “Chawk ti yaox ka Simiang Siyiex sivoe ha heue.”
6 Khaix an, simiang pui Isarelax khrawm cao jhai pon yieh kaux tau ah nin ka kix, “Sang caw aux ti hu puing ka veng Ramot ka haktiex Gilat, phan ang mawh nan, ang caw ti hu lie?” Mai kix ah nin, “Lih hu heue, mawh kheu Simiang Siyiex tak ap tix tawx veng an ka daux taix simiang heue.”
7 Yehoshaphat deeh ah nin, “Ang cao jhai Simiang Siyiex lai koe tin sonsang chawk cheng ex ka nawh lie?”
8 Mai simiang pui Isarelax ah nin ka Yehoshaphat, “Kawn koe Mikha kawn simex Imala pa sang chawk cheng ka Simiang Siyiex, viang mawh nan, aux koeng ka nawh mawh kheu ang nawh sax krai lox jhai pa mhawm ka grawng aux, nawh yie krai grawng pa caox heue.” Mai Yehoshaphat deeh ah nin, “Simiang paw doh ah lox yuh nin liak.”
9 Khaix an, simiang pui Isarelax kok cao kaing greem nawh tix kaux ah nin, viex Mikha kawn simex Imala hoek ka aux phaiphai liak!
10 Simiang pui Isarelax mai Yehoshaphat simiang meung Yudax ceep sibex simiang mai tang ngawm ka dangngeung ka biang glah nghox, ka diang siviex veng Samarix, mai cao jhai khankix hoik tang ah lox jhai ka plak sivoe kix heue.”
11 Zedikix kawn simex Khenana yuh teet rhiem son tix ah nin, “Simiang Siyiex ah yuh nin maix tak blung pui Surix tom sidah laux leeing kix ka teet in heue”
12 Mai cao jhai khankix kawx krai lox jhai ah nin, “Hu puing ka veng Ramot haktiex Gilat, hu heue maix tak pex, mawh kheu Simiang Siyiex tak ap kix ka daux tawm taix simiang heue.”
13 Pui cau pa hoik hu kok Mikha ah nin ka nawh, “Jhak heue, gumlox pa ah cao jhai khankix hoik mawh lox tix gum khaing ka simiang, kieh lox maix awm gumlox pa hoik krai kix, krai ngie grawng pa koe bwanson heue.”
14 Mikha ah nin, “Awm pa im ju Simiang Siyiex mai aux tak sikah awm pa krai Simiang Siyiex ka aux heue.”
15 Yam hoek nawh ka simiang mai simiang ah nin ka nawh, “Mikha eue, sang caw ex ti hu puing ka veng Ramot haktiex Gilat, phan ang mawh nan, ang caw ti hu lie? ” Mai nawh deeh pawk ah nin, “Hu heue maix tak pex, Simiang Siyiex tak ap veng an ka daux taix simiang heue.”
16 Mai simiang ah nin ka nawh, “Sang kieh maix aux tiextu miex bawg, sonsang krai maix pa mawh pa meh ka aux ka daux ceu kaux Simiang Siyiex heue.”
17 Nawh ah nin, “Aux hoik yaox pui Isarelax prung prang ka piang gawng awm yung pa ang koe cao liangRef 22:17 Mat 9:36; Mak 6:34. heue. “Mai Simiang Siyiex ah nin, pui inkix ang lai koe cao simiang, kieh kix deeh ing ka nyiex tix ka daux pa nhim heue.”
18 Simiang pui Isarelax ah nin ka Yehoshaphat, “Ang aux hoik krai maix mhong ka ang nawh sax krai lox jhai pa mhawm grawng aux, lheu khaing grawng pa caox lie?”
19 Mikha deeh ah nin, “Mawh kheu nan, nghiet ka gumlox Simiang Siyiex, aux hoik yaox ngawm Simiang Siyiex ka piang dangngeung Nawh mai kru naing raoma khankix cung ka plak khawn dawm mai ka plak khawn gwiex Nawh Cao heue.
20 Simiang Siyiex ah nin, “Mawh pui mawx pa sang pon nyaw glaw ka Ahap, sonsang hu yum nawh ka puing tix veng Ramot haktiex Gilat lie? mawh kheu grawng in tix kaux ah nin mai tang kaux ah nan heue.
21 Khwan tix mu hoek cung ka plak sivoe Simiang Siyiex ah nin, “Aux tak nyaw glaw ka nawh heue
22 Simiang Siyiex ah nin ka nawh, maix sang yuh ka mawx? mai nawh ah nin, aux tak lih hu mai deeh yuh tix mawh khwan tawb kheem ka daux jheeh cao jhai khawmuik heue Mai Nawh Cao ah nin, “Maix tak pon ti jheeh nyaw nawh mai pex ka nawh, lih hu mai yuh awm an heue
23 Jhak heue, Simiang hoik sau khwan tawb kheem ka daux jheeh cao jhai maix khawmuik mai Simiang Siyiex hoik krai grawng pa caox caig maix heue.”
24 Khaix an Zedikix kawn simex Khenana hoek dex mai simang sibax Mikha ah nin, “Khwan Simiang Siyiex lih hu khaing aux, sonsang sikah ka maix yuh ka mawx heue.”
25 Mikha ah nin, “Maix tak yaox yam laig mox maix ti daux lawg singaix an sax heue.”
26 Simiang pui Isarelax ah nin, “Giex Mikha mai tawx nawh ka Amon, cao kwang veng mai ka Yawsha kawn simex simiang,
27 mai ah yuh nin ka simiang, “Sau kaw in ka daux thawng mai tawx nawh ih priex nyaux rawm ka daux pa kha rhawm tom sidah deeh hoek aux mhawm mhawm heue.”
28 Mikha deeh ah nin, “Phan maix yaox ti deeh hoek mhawm mhawm, Simiang Siyiex ang tau tix sikah grawng in ka aux heue. Mai nawh ah nin, “Pui khawmuik eue, nghiet heue, ”
Ahap Yum Ka Daux Naing
29 Simiang pui Isarelax mai Yehoshaphat simiang pui Yudax haok ka veng Ramot meung Gilat heue.
30 Mai simiang pui Isarelax ah nin ka Yehoshaphat, “Aux tak tieh loh grang tix mai laig ka daux naing, viang mawh nan maix ceep kraung simiang heue.” Mawh kheu nan, simiang pui Isarelax loh grang tix mai laig ka daux naing heue.
31 Mai simiang meung Surix tawm lox ka cao kaing naing lawx brung tixngoe ra kaux ah nin, “Lheu khaing simiang pui Isarelax paw puing pui tix kaux kawx heue.”
32 Yam yaox cao kaing naing lawx brung khankix ka Yehoshaphat, kix ah nin, “An rug mawh simiang pui Isarelax heue.” Mai kix deeh veeh ti puing ka nawh mai Yehoshaphat hoik riag yo heue.
33 Yam yaox cao kaing naing lawx brung khankix, ka ang mawh simiang pui Isarelax, kix deeh ing plak khaix mai ang pheet nawh heue.
34 Pui tix kaux vaik ak tix mai ang nyee ca nieb puing hu krox ka simiang pui Isarelax sinax dee kleuk kraung naing ceep nawh heue. Mai nawh ah nin ka cao grheu lawx naing brung tix, deeh veeh aux khaing daux naing, mawh kheu hoik mat aux heue.
35 Naing baox nied ti kin singaix an mai simiang hoik neung tix ka pui tix kaux daux lawx naing brung nawh mai veeh ngai tix ka pui Surix khankix mai yum plak bo heue. Nham lih khaing dee mat nawh mai ba ka piang meeh lawx naing brung heue.
36 Yam hoek bawg yam klip singaix, lox kok yo pui khankix hoik tah sinum ka daux tab ku tab ah nin, “Tang deeh ing ka veng mai ka haktiex cao tix ku kaux daux pui heue.”
37 Mawh kheu hoik yum simiang, kix viex nawh ing ka veng Samarix mai sipaung nawh tan heue.
38 Kix phak lawx naing brung brug nawh ka rawm dung veng Samarix, ka dee heem bun coh kaux tix mai sox khankix lied nham nawh awm lox pa hoik krai Simiang Siyiex heue.
39 Kaing pa deuk mai can pa yuh Ahap khankix nyiex haw nga sang pa hoik sum nawh khankix mai veng pa hoik pang nawh khawmuik, hoik tiem ti deuh ka daux phuk lai been simiang pui Isarelax heue.
40 Ahap hoik laux lee ti tau mai keeing nawh khankix mai Ahazix kawn simex nawh deeh plud khaix nawh heue.
Yehoshaphat Kwang Ka Meung Yudax
(2Been 20:31-37)
41 Yehoshaphat kawn simex Asa jah ti kwang meung Yudax, yam kwang Ahap simiang Isarelax ka haktiex pon num tix num heue.
42 Yehoshaphat koe ju tixngoe phwan num, yam jah nawh ti kwang haktiex mai nawh kwang veng Yerusaliem tixnga phwan num, ceu kaux miex nawh mawh Azubax kawn bun Shilahix heue.
43 Nawh hawt khaix pa yuh keeing tix Asa, nawh ang lai via khaing krax ankix mai nawh yuh pa khaw caw ka plak sivoe ngai Simiang Siyiex, viang mawh nan, nawh ang nyang yieh ti tik dee pa lhaong khankix mai pui khankix kawn yuh krax tan mai gleeing nyawng bhawng ka dee pa lhaong heue.
44 Yehoshaphat yuh pa nhim tau mai simiang meung Isarelax heue.
45 Kaing pa deuk mai can pa hoik yuh Yehoshaphat khankix mai grawng pa ting riang siawp sibrawm nawh mai pa hoik yuh nawh naing khankix, hoik tiem ti deuh ka daux phuk lai been simiang pui Yudax heue.
46 Mai cub simex coh kaux khankix, pa kawn deuk yam kwang keeing nawh Asa, nawh hoik grheu kix lih khaing daux haktiex heue.
47 Yam an simiang ang lai koe ka haktiex Edom heue. Mawh ngie cao kwang greem simiang pa koe tix kaux khaing heue.
48 Yehoshaphat yuh reu ting ka veng Tasux mai ploi hu ka veng Awphirax, sonsang tang khri, viang mawh nan kix ang bleeh tix bawg kawx, mawh kheu reu khankix hoik laux ka veng Eziongebax heue.
49 Ahaziyax kawn simex Ahap ah nin ka Yehoshaphat, “Kieh kawncau aux khankix hu tau mai kawncau maix daux reu ting maix liak!” Viang mawh nan, Yehoshaphat ang cu heue.
50 Yehoshaphat hoik laux lee ti tau mai keeing nawh khankix mai sipaung nawh tau mai keeing nawh ka daux veng Davit, Yehoram kawn simex nawh deeh plud khaix nawh heue.
Ahazix Kwang Ka Meung Isarelax
51 Yam kwang Yehoshaphat simiang meung Yudax ka haktiex kao aliah num tix num, Ahazix kawn simex Ahap jah tix kwang ka pui Isarelax daux veng Samarix ra num,
52 Nawh hoik yuh pa caox caig plak sivoe ngai Simiang Siyiex mai hawt daux krax hu keeing tix mai miex tix mai krax hu Yerobom kawn simex Nebat, pa kieh pui Isarelax yuh phimap heue.
53 Mai nawh yuh kaing jhaw siyiex Balax mai krub ka mai nawh hoik so Simiang Siyiex pui Isarelax song rhawm, awm pa hoik yuh keeing ti khawmuik heue.