20
Grawng Som Pui Surix Ka Ahap
1 Benhadat simiang Surix khrawm kru naing tix mai simiang tixngoe ra kaux rom tix tau mai nawh, khawm pui naing brung mai ling lawx naing brung, nawh hu lai lawm ka veng Samarix mai yuh naing ka veng an heue.
2 Khaix an nawh ploi pui cau khankix hu ka veng Ahap simiang Isarelax ah nin ka nawh, Benhadat ah yuh nin,
3 “Mau khri maix mawh cie aux, moeng pa mhawm grang maix mai kawn praix maix kawx mawh cie aux heue.”
4 Simiang Isarelax pawk ah nin, “Simiang aux eue, awm pa ah mai can pa koe aux khankix mawh cie maix heue.”
5 Pui cau khankix deeh hoek ah nin, “Benhadat ah yuh nin, aux ploi pui hu ah nin ka maix, “Ap mau khri maix mai moeng kawn maix ka aux heue.”
6 Bawg yam in pasax aux tak ploi kawncau tix khankix hoek khrieh daux nyiex maix mai nyiex ma kawncau maix khankix mai can pa mhawm ka ngai maix khankix kix tak viex hu khaing maix heue.
7 Khaix an simiang Isarelax kok ka kwad riex ju daux haktiex tix ah nin, “Yam in keud pex yaox mai jhak pui in sawg ti yuh krax kha rhawm ka ex, mawh kheu nawh ploi pui teei moeng aux mai kawn praix aux khankix, mau khri aux, aux ang thiang ka heue.”
8 Kuad riex ju mai pui khankix ah nin ka nawh, “Paw nghiet mai paw khaw rhawm ka heue.”
9 Ahap deeh ah nin ka pui cau Benhadat khankix, “Krai simiang cao simiang aux mhong, can pa hoik tawm maix ka kawncau tix bawg phao ka, aux tak yuh, phan mawh ceu in aux ang pon yuh heue.” Pui cau an lih hu mai viex lox an ka nawh heue.
10 Benhadat baox ploi pui hu ka nawh ah nin, “Phan phawng tiex ka daux veng Samarix kub tix kaux tix jhawp ka son pui pa hawt khaix aux, kieh siyiex khankix yuh pa nie lheu kin ka piang aux heue.”
11 Simiang Isarelax pawk lox ah nin, “Krai ka nawh paw kieh pui ceep kraung naing yaw ka tokaux tix awm pui pa peeik kraung naing ceep tix heue”
12 Yam mhong Benhadat ka an, caw yam nyaux nawh plai mai cub simiang ka daux nyiex bang, nawh tawx lox ka kawncau tix khankix, “Khre rien tix mai kix khre rien tix sonsang puing ka veng heue.”
13 Cao jhai tix kaux hoek ka Ahap simiang Isarelax, “Simiang Siyiex ah nin, mawh hoik yaox maix cub pui pa kied hun khankix lie? jhak heue, aux tak ap kix ka daux taix maix in singaix maix tak tawng mawh Aux Simiang Siyiex heue.”
14 Ahap deeh ah nin, “Sang ap ka pui mawx?” Mai kawncau an krai, “Simiang Siyiex ah yuh nin, mawh khaing cao kaing pui awn ju daux kien haktiex in heue.” Ahap baox ah nin, “Mawh pui mawx pa sang bung tix puing naing lie?” Mai kawncau deeh pawk, “Mawh maix heue.”
15 Nawh simin cao kaing pa kawn awn ju khankix, pa kaoh khaing daux kien haktiex nawh koe ra yieh tixngoe ra kaux, khaix pui an khankix, nawh baox simin pui Isarelax khawmuik koe aliah rheng kaux heue.
16 Kix lih yam jung singaix, Benhadat mai pa teem ka nawh tixngoe ra kaux, kawn yoek ka plai ka daux nyiex bang heue.
17 Pui awn ju daux kien haktiex khankix lih sivoe, Benhadat ploi cao jiang khankix hu mai kix ing krai ka nawh ah nin, “Pui khankix lih hoek khaing veng Samarix heue.”
18 Nawh ah nin, “Phan kix lih hoek son krax pa nhim ang ah, sonsang puing naing ang ah giex im kix heue.”
19 Khaix an, cao kaing pui pa kawn awn ju daux kien haktiex, lih khaing daux veng mai cub kru naing hawt khaix kix heue.
20 Kix tang pah ka pui naing tix kaux taw tix kaux ku kaux, mawh kheu nan, pui Surix to mai pui Isarelax pheet ka kix, viang mawh nan, Benhadat simiang Surix pon brung brug tix mai pui naing brung nawh khankix to ti glawd heue.
21 Simiang pui Isarelax lih puing ka pui naing brung mai ka pui naing ling lawx brung khankix mai kix pah pui Surix yum tom nie heue.
22 Khaix an, cao jhai hoek ka simiang pui Isarelax ah nin ka nawh, “Hu kieh riang rao maix kaux cong, een ti tawng mai jhak ka pa sang khaw maix ti yuh, mawh kheu simiang Surix tak deeh hoek puing yam sidah num sax heue.
Pui Surix Deeh Baox Som
23 Kawncau simiang Surix khankix ah nin ka nawh, “Siyiex kix mawh siyiex gawng, mawh kheu nan, kix tom ting riang khaing ex, viang mawh nan, phan ex deeh baox puing kix ka daux lung phan yuh nan, ex tak ting riang khaing kix tete heue.
24 Khaw ti yuh nin, pluat cub simiang ku kaux khaing ara kix mai deeh yaog cao kaing naing khankix plud dee ot kix,
25 Sawg pui pa sang deeh plud pui pa hoik yum mai pui naing brung son pui naing brung ling lawx brung son ling lawx brung, khaix an ex tak deeh puing kix ka daux tong, ex tak nie ting riang khaing kix tete heue.” Nawh nghiet lox mai hawt ti yuh heue.
26 Yam hoik sidah num Benhadat deeh simin pui Surix mai nawh haok ka veng Aphiet sonsang puing ka pui Isarelax heue.
27 Pui Isarelax simin pui naing mai tawx priex ih kix mai hu puing ka kix, pui Isarelax bang tix ot ka plak sivoe kix awm phung pex ra cub, pui Surix hoik naog ka haktiex khawm bee heue.
28 Khaix an pui Siyiex tix kaux hoek dex ah nin ka simiang Isarelax, “Simiang Siyiex yuh nin kheu jao hoik ah pui Surix nin, Simiang Siyiex mawh Siyiex gawng mai Nawh Cao ang mawh Siyiex daux lung, mawh kheu nan, Aux tak ap pui tom nie ka daux taix maix, maix tak tawng ka mawh Aux Simiang Siyiex heue.”
29 Kix bang ti ot see paox ti aliah ngaix, yam hoek ka daux aliah ngaix kix ra lai puing ka paox tix mai pui Isarelax pah pui naing caong Surix tix sien ka daux tix ngaix khaing heue.
30 Pui pa kawn deuk to ka daux veng Aphiet, khaix an guh veng grhup ka piang pui pa kawn deuk ra mheen aliah rheng kaux, Benhadat to mai laig ka daux veng mai mox tix ka daux lawg heue.
31 Mai kawncau nawh khankix ah nin ka nawh, “Jhak heue, yam in, ex mhong grawng simiang pui Isarelax mawh simiang pa koe krax caux rhawm, kieh ex vien nyoi tix ka chee rhix mai vhua kaing tix ka maox mai lih hu ka simiang pui Isarelax, phan ex yuh nan, nawh tee deuh maix klawd pleue heue.”
32 Mawh kheu nan, kix vien nyoi tix ka chee rhix mai vhua kaing tix ka maox mai hu ka simiang pui Isarelax ah nin, “Kawncau maix Benhadat ah nin, yuh bwanson deuh ju aux liak” Mai nawh ah nin, “Mawh kawn im ju nawh lie? nawh mawh puxke aux heue.”
33 Pui ankix bre tix nghiet lox nawh mai nied ti jhawp ka lox nawh ah nin, “Benhadat mawh puxke maix heue. Hu kok nawh hoek ka aux heue.” Khaix an Benhadat hoek ka nawh mai kieh nawh haok ka piang ling lawx brung heue.
34 Khaix an Benhadat ah nin ka nawh, “Veng pa hoik teei keeing aux khaing maix khankix aux tak deeh tawx, maix pon ti sum biang lah ka son tix ka daux veng Damase, awm pa hoik sum keeing aux ka daux veng Samarix heue.” Mai Ahap ah nin, “Aux tak deeh ploi maix ing heue.” Mawh kheu nan, nawh yuh sijax mukheu mai nawh mai deeh ploi nawh ing heue.
35 Koe simex tix kaux ka daux cao jhai, ah nin ka paox cao jhai tix awm gumlox tawm Simiang Siyiex heue. “Yuh bwanson tawk aux liak!” Mai pui an thiang tix ang tawk ka nawh heue.
36 Mai cao jhai an ah nin ka nawh, “Mawh kheu ang maix cu nghiet ka lox Simiang Siyiex, yam lih hu maix khaing aux dom mawx dom an, sivai sangsi tak kied maix.” Yam hoik lih hu nawh dom mawx dom an, sivai sangsi pub ka nawh mai kied nawh heue.
37 Khaix an nawh yaox ka pui tang kaux ah nin, “Yuh bwanson tawk aux liak, ” mawh kheu nan, pui an tawk nawh, tom kied saux kied mat nawh heue.
38 Khaix an, cao jhai an lih hu mai nawh loh grang ti mai vhua ngai tix ka man mai pau simiang daux krax heue.
39 Yam preeng simiang baoh an, nawh kok yo ka simiang ah nin, “Kawncau maix hoik hu ka daux naing lien tix kaux viex pui tix kaux hoek ka aux ah nin, priex pui in, phan pui in grai son grawng ceu pa yuh ka mawx ang ah, ju maix tak mawh son ju nawh, phan ang mawh nan maix tak plud mau tix talantan heue.
40 Yam kawn nie kaing pa yuh kawncau maix tan, nawh hoik grai heue.” Simiang Isarelax ah nin ka nawh, “Krax prawng ca tak koe ka piang maix, awm hoik tat maix an ka son cao tix heue.”
41 Nawh nied ti yah man vhua khaing ngai tix, yam an simiang Isarelax tawng ka mawh nawh cao jhai heue.
42 Mai cao jhai ah nin ka nawh, “Simiang Siyiex aux ah nin, mawh kheu ploi maix pa deuh Aux mawh pa laux leeing, lih khaing daux tawm taix maix, mawh kheu nan, ju maix tak mawh son ju nawh mai pui maix khankix kawx tak mawh son pui nawh heue”
43 Mawh kheu nan, simiang pui Isarelax deeh ing ka nyiex haw tix ka veng Samarix mai pa laux pakngai mai voi rhawm tix heue.