17
Eliyax Krai Lox Jhai
1 Eliyax pui veng Tishabix pa ot meung Gilat ah nin ka Ahap, “Awm im ju Simiang Siyiex, Siyiex pui Isarelax pa krub aux kah, phan ang mawh khaing gumlox Aux, rawm ciex mai rawm lhiex tak ang koe ka daux num in heue.”Ref 17:1 Jas. 5:17.
2 Mai gumlox Simiang Siyiex lih hoek ka nawh ah nin,
3 “Lih hu khaing tin, mai veeh ti hu ka plak lih singaix mai mox tix ka praok rawm klawng iak Kherit, plak toi rawm klawng Yawdan heue.
4 Maix tak nyaux rawm klawng iak an mai Aux tawx lox ka lak, sonsang hoek tawx maix ih pa ih tan heue.”
5 Mawh kheu nan, nawh lih hu mai yuh awm gumlox pa tawm Simiang Siyiex ka nawh, nawh hu mai ot ka praok rawm klawng iak Kherit, plak toi rawm klawng Yawdan heue.
6 Lak viex blah mai nex hoek ka nawh, ponngawb mai ponbo mai nawh nyaux rawm klawng iak an heue.
7 Khaix an, rawm klawng iak an hit, jao ang lhiex lai lih ka daux haktiex an heue.
Eliyax Mai Miexmai
8 Mai gumlox Simiang Siyiex hoek ka nawh ah nin,
9 “Kaoh hu ka veng Zarephat, pa mawh veng pui Sidom mai ot tan, Aux tawm lox ka miexmaiRef 17:9 Luk 4:25-26. tix kaux, pa ot tan sonsang tawx maix ih heue.”
10 Nawh kaoh hu ka veng Zarephat mai yam hoek nawh ka siviex veng, nawh yaox ka miexmai tix kaux, pa kraix khix tan, nawh kok miexmai an ah nin, “Viex aux nyaux rawm ka daux kawk ceeix heue.”
11 Yam sang hu bun an ti teei rawm nawh baox kok ka bun an ah nin, “Viex aux ih blah tix shiag ka daux taix maix ceeix heue.”
12 Bun an pawk ah nin, “Awm pa im ju Simiang Siyiex mai aux ang lai koe khlawp blah, mawh ngie phawng gaox nghox ca been tix jhawp daux aw mai rawm bee ceeix ka daux ngoi, yam in aux khraix khix ra nge sonsang khre pa ih son tix mai son kawn simex aux, ih mai yum khaix heue.”
13 Mai Eliyax ah nin ka bun an, “Paw khi, hu khre awm pa ah maix, yuh khliep blah iak tix mu phao voe mai viex hoek ka aux, khaix an yuh son cao maix mai kawn simex maix heue.
14 Simiang Siyiex pui Isarelax ah yuh nin, phawng nghox ca daux aw tak ang chix uik mai bee daux ngoi tak ang chix dieh tom hoek tom sidah kieh Simiang Siyiex rawm lhiex lih ka piang ca haktiex heue.”
15 Bun an hu yuh awm pa krai Eliyax, bun an mai khawm kawn nyiex nawh khankix, yaox ti ih tom rheeng singaix heue.
16 Phawng gaox nghox ca daux aw ang chix uik mai bee daux ngoi kawx ang chix dieh awm gumlox pa hoik krai Simiang Siyiex ka Eliyax heue.
17 Khaix an kawn simex miexmai an saux, saux nawh kied kin mai nawh ang lai toek bhawm tix heue.
18 Mai bun an ah nin ka Eliyax, “Pui Siyiex eue, mawh koe ceu pa yuh maix patix ka aux lie? Mawh hoek maix ka aux sonsang doh keud aux ka phimap tix, sonsang pah kawn simex aux yum heue.”
19 Mai nawh deeh ah nin ka bun an, “Tawx kawn simex maix ka aux heue.” Nawh teei kawn simex an lih khaing naok bun an mai kliien nawh haok lawg plak piang dee paung tix mai deuh nawh ka piang ku heue.
20 Nawh kok yo ka Simiang Siyiex ah nin, “Simiang Siyiex aux eue, mawh viex Maix ceu pa caox hoek ka piang miexmai, pa paung aux nyiex kheu pa pah kawn simex nawh lie?”
21 mai nawh nyat tokaux tix ka piang kawn nyawm an loe bawg mai kok yo ah nin, “Simiang Siyiex, Siyiex aux eue, kieh khwan kawn nyawm in deeh hoek ka daux nawh heue.”
22 Mai Simiang Siyiex mhong lox kok yo Eliyax mai khwan kawn nyawm deeh hoek ka daux nawh mai nawh deeh im heue.
23 Mai Eliyax klien kawn nyawm an lih khaing lawg plak piang mai hoek daux nyiex mai ap kawn nyawm an ka miex nawh, Eliyax ah nin, “Jhak kawn simex pax hoik im phao heue.”
24 Khaix an bun an deeh ah nin ka Eliyax, “Yam in aux tawng mawh maix pui Siyiex mai gumlox Simiang Siyiex pa kaoh khaing daux jheeh maix mawh pa mawh pa meh heue.”