16
1 Gumlox Simiang Siyiex hoek ka Yehu kawn simex Hananix ne raw ka Basha ah nin,
2 “Aux yaog maix lih khaing daux phawng tiex mai kieh maix kwang ka piang pui Aux Isarelax khankix mai hoik lawng daux krax pa hu Yerobom mai kieh pui Aux Isarelax lud mai so Aux song rhawm ka phimap kix heue.
3 Aux tak tat ti tik doeh nyiex ma Basha mai Aux tak kieh doeh nyiex ma maix khankix awm doeh nyiex ma Yerobom kawn simex Nebat heue.
4 Sox tak ih ka can pui Basha pa yum ka daux veng mai sim raoma tak ih pui pa yum ka daux tiag heue.”
5 Mai kaing pa deuk pa yuh Basha mai kaing pa hoik yuh nawh khankix mai riang rao nawh khankix hoik tiem ti deuh ka daux phuk lai been simiang pui Isarelax khankix heue.
6 Basha laux lee tix tau mai keeing nawh khankix mai sipaung nawh ka daux veng Tiraza mai kawn simex nawh Elax deeh plud ti kwang khaix nawh heue.
7 Mai gumlox Simiang Siyiex hoek ka cao jhai Yehu kawn simex Hananix, ka son Basha mai ka doeh nyiex ma nawh, kheu jao pa caox caig yuh nawh ka plak sivoe ngai Simiang Siyiex khankix hoik kieh Nawh Cao song rhawm, ka kaing pa yuh nawh ka taix ti awm pa yuh doeh nyiex ma Yerobom kheu jao hoik pah nawh doeh nyiex ma kix yum heue.
Krax Kwang Elax Mai Zimarix
8 Yam hoik kwang Asa simiang Yudax ka haktiex tixnga liah num, Elax kawn simex Basha deeh jah ti mawh simiang ka piang pui Isarelax mai kwang ka daux veng Tiraza ra num heue.
9 Kawncau nawh Zimarix pa mawh cao kaing ting pa kwang ling lawx naing brung nawh tix plak, keud ti deeh tieh feen ka nawh yam ot nawh ka daux veng Tiraza mai yam nyaux nawh tom yoek tix daux nyiex Aza, cao pa kwang ka daux nyiex haw daux veng Tiraza,
10 mai Zimarix laig mug nawh ka daux nyiex mai pah nawh yum yam kwang simiang Asa ka meung Yudax tixnga aliah num mai plud ti kwang haktiex nawh heue.
11 Yam jah nawh ti kwang ka haktiex, mai ngawm ka piang dangngeung mai nawh pah doeh nyiex Basha khawmuik, nawh ang lai prah simex tix kaux kawx mai khawm pao nyiex mai puxaik nawh khawmuik heue.
12 Zimarix doeh nyiex ma Basha, awm gumlox Simiang Siyiex, pa krai Nawh Cao ka cao jhai Yehu ka son Basha heue.
13 Mawh kheu phimap pa yuh Basha mai phimap kawn simex nawh Elax mai pa lud kix, pa hoik kieh pui Isarelax koe phimap mai kieh Simiang Siyiex pui Isarelax song rhawm kheu riang grang Asherax pa krub kix heue.
14 Grawng kaing pa deuk mai pa hoik yuh Elax mai kaing pa yuh nawh khankix, hoik tiem ti deuh ka daux phuk lai been simiang pui Isarelax heue.
Zimarix Kwang Ka Daux Meung Isarelax
15 Yam hoik kwang Asa simiang haktiex Yudax tixnga aliah num, Zimarix kwang ka daux veng Tiraza aliah ngaix mai pui Isarelax khankix yuh tab mai rawb ka veng Gibeton veng pui Philitix heue.
16 Pui khankix pa yuh tab mhong ka grawng tieh feen Zimarix mai ka hoik pah simiang yum, mawh kheu nan, pui Isarelax khankix yaog Omrix pa mawh cao kaing naing ting, mawh simiang ka piang Isarelax daux singaix an ka dee bang kix heue.
17 Omrix mai pui Isarelax pa ot tau mai nawh khawmuik, lih hu khaing veng Gibeton mai kix lai lawm ka veng Tiraza heue.
18 Yam yaox Zimarix ka pon rhim kix ka veng, nawh laig ka daux nyiex haw mai gleeing nyiex haw ka piang tix mai nawh yum tan,
19 kheu phimap pa caox caig yuh nawh ka plak sivoe ngai Simiang Siyiex mai lawng daux krax hu Yerobom mai kieh pui Isarelax khankix lud heue.
20 Grawng kaing pa deuk Zimarix mai can kaing pa hoik tieh feen nawh, hoik tiem ti deuh ka daux phuk lai been simiang pui Isarelax khankix heue.
Krax Kwang Omrix
21 Khaix an pui Isarelax gwieh tix ra plak tix plak hawt khaix Tibanix kawn simex Ginat, sonsang yaog kix nawh mawh simiang mai tix plak hawt khaix Omrix heue.
22 Viang mawh nan, pui pa hawt khaix Omrix pex ka pui pa hawt khaix Tibanix kawn simex Ginat, mawh kheu nan, Tibanix yum mai Omrix yaog ti kwang ka haktiex heue.
23 Yam hoik kwang Asa simiang Yudax ka haktiex tixngoe tix num, Omrix yaog ti kwang ka piang pui Isarelax kao ra num, nawh kwang ka daux veng Tiraza liah num heue.
24 Nawh liag gawng Samarix khaing Shemarax, ka mau ra talantan mai sum veng ka piang gawng an mai kok ceu kaux veng an mawh Samarix hawt ceu kaux Shemarax cao gawng an heue.
25 Omrix yuh pa caox caig sivoe ngai Simiang Siyiex nie lheu yuh khaing pui pa koe sivoe nawh khankix heue.
26 Mawh kheu nawh lawng daux krax Yerobom kawn simex Nebat mai phimap pa yuh nawh kieh pui Isarelax khankix lud mai so Simiang Siyiex, Siyiex pui Isarelax song rhawm kheu riang grang Asherax pa krub kix heue.
27 Grawng kaing pa deuk mai can kaing pa yuh Omrix mai riang rao pa jhi nawh khankix, hoik tiem ti deuh ka daux phuk lai been simiang pui Isarelax heue.
28 Mai Omrix laux lee ti tau mai keeing nawh khankix, kix sipaung nawh ka daux veng Samarix, khaix an kawn simex nawh Ahap deeh plud ti kwang khaix nawh heue.
Krax Kwang Ahap
29 Yam hoik kwang Asa simiang Yudax ka haktiex tixngoe daix num, Ahap kawn simex Omrix jah ti kwang ka piang pui Isarelax khankix, mai nawh kwang ka piang Isarelax ka daux veng Samarix tixnga ra num heue.
30 Ahap kawn simex Omrix nie lheu yuh pa caox caig plak sivoe ngai Simiang Siyiex, khaing pui pa koe sivoe nawh heue.
31 Pa lawng nawh ti hu ka daux phimap pa yuh Yerobom kawn simex Nebat, nawh sawn mawh pa iak son tix, kheu nawh teei ti moeng Yezabelax kawn bun Etabalax simiang Sidom, nawh hu yuh kaing jhaw Balax mai krub ka nawh heue.
32 Mai nawh sum khu dee tan tix lhang ka son Balax, ka daux nyiex bwan siyiex Balax pa hoik sum nawh ka daux veng Samarix heue.
33 Mai Ahap yuh riang grang Asherax heue. Ahap nie lheu yuh pa so ka rhawm Simiang Siyiex, Siyiex pui Isarelax, sonsang nie lheu song rhawm Nawh Cao ka piang nawh lheu khaing simiang pui Isarelax khankix pa koe sivoe nawh heue.
34 Ka daux bawg yam kwang nawh ka haktiex, Hilax pui veng Betelax hoik deeh sum veng Yerikho, yam kaw nawh num riah veng an kawn Ai nawh Abiram yum mai yam jung nawh pang siviex kawn simex ghoik nawh Segub yum, awm gumlox pa hoik krai Simiang Siyiex ka Yawsux kawn simex NunRef 16:34 Yaw 6:26. heue.