18
Gumlox Eliyax Ka Ahap
1 Khaix hoik rheeng singaix bawg yam, gumlox Simiang Siyiex deeh hoek ka Eliyax yam naog loe num tix num ah nin, “Hu mai jhi tokaux maix ka Ahap, mai Aux tak kieh lhiex lih ka piang haktiex heue.”
2 Mawh kheu nan, Eliyax hu jhi tokaux tix ka Ahap heue. Yam in sibhawm praix pa kied kin sigrien ka daux veng Samarix heue.
3 Ahap kok ka Obadix cao kaing pa kwang ka daux nyiex haw heue. Obadix mawh pui pa kied lhat kied graung ka Simiang Siyiex heue.
4 Yam grheu Yezabelax ti tik ka cao jhai Simiang Siyiex khankix, Obadix teei cao jhai tix yieh kaux mai mox kix ka daux rang ti dah tixphwan kaux mai eei kix ka blah mai rawm heue.
5 Mai Ahap ah nin ka Obadix, “Hu ka daux haktiex dee lih rawm keut mai ka deeh koe rawm klawng iak khankix, ha ex sang yaox dee koe rib sonsang eei ka brung law klawd ka mai son ang to brie som nai tix mu kawx heue.”
6 Ahap mai Obadix gwieh paox tix hu sawg ka haktiex koe rib tix kaux tix plak heue.
7 Yam kawn hu Obadix ka krax hu nawh, Eliyax caong rieb ti pub nawh mai Obadix pon ci ka nawh, nawh gup ngai tix ah nin, “Mawh maix simiang aux Eliyax lie?”
8 Eliyax pawk ah nin ka nawh, “Mawh aux heue. Hu mai krai simiang maix mhong kah ot Eliyax tin heue”
9 Obadix ah nin, “Mawh hoik koe ceu pa lud aux ka tix maix lai ap kawncau tix ka daux tawm taix Ahap, sonsang pah nawh ka aux heue.”
10 Awm im ju Simiang Siyiex maix, dee ot pui mawx ang ah mai haktiex mawx ang ah, dee ang cao simiang aux ploi pui hu sawg ka maix, ang koe ti dah kawx maix hoik kieh pui haktiex tiextu ah nin kix ang yaox ka maix heue.
11 Yam in maix lai ah nin, hu mai krai cao simiang maix mhong, “Eliyax ot tin heue”
12 Yam hoik hu aux khaing maix phan khwan Simiang Siyiex viex maix hu ka dee ang aux tawng, yam hu krai aux ka Ahap, mai phan ang yaox ka maix nawh tak pah ka aux, mawh kheu aux kawncau maix hoik dawg lhat ka Simiang Siyiex tom yam iak tix heue.
13 Ang aux hoik krai grawng an ka cao simiang tix, yam pah Yezabelax ka cao jhai Simiang Siyiex khankix mai grawng pa hoik mox aux cao jhai Simiang Siyiex tix yieh kaux, ka daux rang tix dah tixphwan kaux mai hoik eei kix ka blah mai rawm ang mawh lie?
14 Yam in maix lai ah nin, “Hu krai cao simiang maix mhong, Eliyax ot tin heue. Mai nawh tak pah aux heue.”
15 Eliyax ah nin, “Awm im ju Simiang Siyiex Cao kru naing raoma pa krub aux ka, aux tak jhi tokaux tix ka nawh daux in singaix tete heue.”
16 Mawh kheu nan, Obadix hu krai ka Ahap mai Ahap lih rieb ka Eliyax heue.
17 Yam yaox Ahap ka Eliyax, Ahap ah nin ka nawh, “Mawh mawh maix pa tuktiak ka pui Isarelax lie?”
18 Eliyax deeh pawk ah nin, “Aux ang mawh pa tuktiak ka pui Isarelax, mawh maix mai doeh nyiex ma keeing maix pa tuktiak tik vud lox tawm pingnyap Simiang Siyiex mai hawt khaix siyiex Balax heue.
19 Yam in ploi pui hu khrawm pui Isarelax mai cao jhai Balax pon yieh tixphwan kaux mai cao jhai Asherax pon yieh kaux, pa sawm tau ka pheen Yezabelax khawmuik hoek ka aux ka gawng Khamelax heue.”
Pex Eliyax Ka Cao Jhai Balax Khankix
20 Mai Ahap ploi pui hu khrawm ka pui Isarelax khawmuik mai cao jhai khankix hoek ka gawng Khamelax heue.
21 Eliyax hoek ka pui khawmuik ah nin, “Mawh kawn ku kax rhawm pex sinax beenli in ra ceu miex greung lie? Phan Simiang Siyiex mawh Siyiex hawt khaix Nawh Cao mai phan Balax mawh siyiex hawt khaix nawh heue. “Pui khankix ang pon pawk lox nawh tix gum kawx heue.
22 Khaix an, Eliyax ah nin ka pui khankix, “Cao jhai Simiang Siyiex deuk ngie aux nong nong, viang mawh nan, cao jhai Balax kawn koe pon yieh tixphwan kaux heue.
23 Mai kieh kix tawx mawie mhaing ra mu ka ex, kieh kix laug son cao tix, tix mu mai pat lih mawh shiag mawx shiag an deuh ka piang khix, viang mawh nan, paw vi sau ngu, mai aux tak khre mawie tix mu deuh ka piang khix mai ang sau ngu ka heue.
24 Mai pex kok ceu kaux siyiex tix mai aux kawx tak kok ka ceu kaux Simiang Siyiex, Siyiex pa sang pawk ka ngu, Nawh tak mawh Siyiex heue. “Pui khankix pawk lox ah nin, “In mawh pa mhawm heue.”
25 Eliyax ah nin ka cao jhai Balax khankix, “Laug mawie son cao pex tix mu mai khre ka son pex sivoe, mawh kheu mawh pex pui hun, mai kok ka ceu kaux siyiex pex, viang mawh nan, paw vi sau ngu heue.”
26 Kix teei mawie mhaing an pa hoik tawx ka kix mai khre ka an mai kok ka ceu kaux Balax jah ponngawb tom hoek jung singaix ah nin, “Balax eue, nghiet lox yix liak! “viang mawh nan, lox tidtix ang koe, mai ang koe cao pawk, kix graoh hawt vung viang khu dee tan tix heue.
27 Yam hoek yam jung singaix Eliyax ah lox ang cee ang cak ka kix ah nin, “Yo lox pex tom ting, mawh kheu mawh nawh siyiex, nawh kawn keud rhawm tix, phan ang mawh nan, nawh kawn nie kaing, phan ang mawh nan, nawh kawn hu krax, phan ang mawh nan, nawh kawn laig it pleue, pex khaw ti so nawh kaoh heue.
28 Kix baox nie yo lox sinum mai pat tokaux tix ka vaig ka rhiem lawm tom lih nham awm hoik koe been kix heue.
29 Yam luan jung singaix, kix ah lox jhai tom hoek plak bo yam yuh kix krax tan pa appong, viang mawh nan lox tidtix ang koe mai ang koe cao pawk, ang koe cao nghiet heue.
30 Eliyax ah nin ka pui ku kaux, “Hoek dex aux, “pui ku kaux kawx hoek dex nawh mai nawh cox khu dee tan Simiang Siyiex pa hoik grhup heue.
31 Mai Eliyax teei simaox kao ra lon, awm koe doeh ru kawn simex Yakop mai ka pui pa hoek gumlox Simiang Siyiex ka ah nin, “Ceu kaux maix tak mawh Isarelax heue.”Ref 18:31 Jah 32:28; 35:10.
32 Nawh sum khu dee tan ka lon simaox inkix ka daux ceu kaux Simiang Siyiex, mai nawh kaong rawng hawt rawb rim khu dee tan son pa kub simie nghox tix glawm Ra Sirax heue.
33 Nawh grux khix mhawm mhawm mai pat nex mawie mhaing shiag mawx shiag an mai deuh ka piang khix ah nin, “Sau rawm naog ka daux pung pon mu mai lhauk ka piang krax tan pa gleeing mai piang khix khankix heue.”
34 Khaix an nawh ah nin, “Baox lhauk tix bawg” mai kix kawx baox lhauk ra bawg, nawh baox ah nin, “Baox lhauk loe bawg, ” mai kix kawx baox lhauk loe bawg heue.
35 Mai rawm hoik ba hawt rawb rim khu dee tan mai nawh baox deeh sau rawm naog ka daux rawng heue.
36 Yam hoek bawg yam tan krax tan plak bo, cao jhai Eliyax hoek dex ah nin, “Simiang Siyiex, Siyiex Abraham, Icak mai Isarelax eue, daux singaix kieh pui khankix tawng ka mawh Maix Siyiex pui Isarelax mai ka mawh aux kawncau Maix Cao, ka pa yuh aux in awm gumlox Maix Cao heue.
37 Simiang Siyiex eue, nghiet ka lox aux sonsang tawng pui khankix ka mawh Maix Simiang Siyiex mai tawng ka mawh Maix Cao pa kieh kix deeh veeh rhawm tix heue.
38 Khaix an ngu Simiang Siyiex lih mai gleeing ka krax tan pa gleeing mai khix, simaox mai phawng tiex khankix kroh yuh rawm ka daux rawng heue.
39 Yam yaox pui ka ankix gup ngai tix ah nin, “Simiang Siyiex mawh Siyiex heue. Simiang Siyiex mawh Siyiex heue.”
40 Mai Eliyax ah nin ka kix, “Giex ka cao jhai Balax paw kieh boek tix kaux kawx, ” Mai kix giex ka kix, Eliyax viex ti hu pah kix ka rawm klawng Kishon heue.
Eliyax Rawg Bwan Son Lhiex
41 Mai Eliyax ah nin ka Ahap, “Haok plak piang ih mai nyaux, mawh kheu sinum praix lhiex ting sang lih heue.”
42 Ahap haok ka piang sonsang ih nyaux mai Eliyax kawx haok ka choek gawng Khamelax, mai nawh gup tix ka piang tiex mai deuh pakngai tix ka sinax ngawng tix,
43 mai ah nin ka kawncau nawh, “Kaoh mai jhak ka plak rawm sigrit sigra, ” Nawh kaoh jhak ah nin, “Ang koe tidtix tan heue.” Mai Eliyax ah nin, “Baox hu jhak aliah bawg heue.”
44 Yam hoek aliah bawg nawh ah nin, “Paiawm iak pa awm taix pui pa haok khaing daux rawm sigrit sigra, ” Mai nawh ah nin ka kawncau tix, “Hu krai ka Ahap, khre ka ling lawx brung maix mai lih hu sivoe ang lhiex nyang lih son ang maix sang lan ka lhiex heue”
45 Daux tivud khaing raoma paiawm lih lung, bhaung mai lhiex tingRef 18:42-45 Jas. 5:18. kawx lih mai Ahap brug ling lawx brung tix hu ka veng Yezerelax heue.
46 Taix Simiang Siyiex hoek ka piang Eliyax, mai nawh nhawt nyoi tix to hoek sivoe Ahap ka diang siviex laig daux veng Yezerelax heue.