15
Abijam Kwang Ka Meung Yudax
(2Been 13:1-22)
1 Yam hoik kwang simiang Yerobom kawn simex Nebat ka haktiex kao daix num, Abijam jah ti kwang ka piang pui Yudax heue.
2 Nawh kwang ka veng Yerusaliem loe num, ceu kaux miex nawh mawh Makha kawn saux Apsalom heue.
3 Nawh lawng ka daux phimap pa hoik yuh keeing tix kuceu, rhawm nawh ang lai grum naog ka Simiang Siyiex tix, awm rhawm tax du nawh Davit heue.
4 Viang mawh nan, mawh kheu jhak Simiang Siyiex ka pakngai Davit, Simiang Siyiex tom tawx kawk ngu tix mu ka nawh ka veng YerusaliemRef 15:4 1Sim 11:36. mai yaog kawn simex nawh plud khaix nawh mai pang veng Yerusaliem kaux cong son nawh heue.
5 Mawh kheu Davit yuh pa khaw ka plak sivoe ngai Simiang Siyiex mai ang veeh tix, khaing lox tawm Nawh Cao glang singaix im ju nawh, lheu khaing grawng see Uriyax pui Hetax heue.Ref 15:5 2Sa 11:1-27.
6 Naing hoik koe ka sinax Rehobom mai Yerobom glang singaix im ju nawh heue.Ref 15:6 2Been 13:3-21.
7 Can pa yuh Abiyax mai kaing pa yuh nawh khankix, hoik tiem ti deuh ka daux phuk lai been simiang pui Yudax heue. Mai naing koe sinax Abiyax mai Yerobom heue.
8 Mai Abijam laux lee ti tau mai keeing tix khankix mai sipaung ka veng Davit, khaix an Asa kawn simex nawh dee plud khaix nawh heue.
Asa Kwang Ka Daux Meung Yudax
(2Been 14:1-5; 15:16-19)
9 Yam hoik kwang Yerobom simiang pui Isarelax haktiex tixnga num, Asa jah ti kwang ka piang pui Yudax heue.
10 Nawh kwang ka veng Yerusaliem tixpon tix num, ceu kaux miex nawh mawh Makha, kawn bun Apsalom heue.
11 Asa yuh pa khaw ka plak sivoe Simiang Siyiex awm tax du nawh Davit heue.
12 Nawh grheu simex coh kaux khankix khaing daux haktiex mai yieh ti tik ka riang grang Asherax pa yuh keeing nawh ti deuh khawmuik heue.Ref 15:12 2Been 15:8-15.
13 Nawh plud miex tix Makha khaing pa mawh laux simiang, kheu jao yuh nawh riang grang Asherax pa seeing brai son Asherax, Asa yieh riang grang Asherax pa yuh nawh mai gleeing ka praok rawm klawng Kidaron heue.
14 Viang mawh nan, ka dee lhaong khankix ang nyang yieh tix, glang yam kawn im ju Asa, rhawm nawh koe pa grum naog ka Simiang Siyiex heue.
15 Nawh viex krax tan pa hoik yuh keeing nawh sijax tix, ti sang tan cao nawh, pa mawh khri, mau, kraung pa shao tix khankix hoek ka daux nyiex bwan Simiang Siyiex heue.
Asa Yuh Paox Pie Mai Benhadat
(2Been 16:1-14)
16 Mai naing koe sinax Asa mai Basha simiang pui Isarelax glang singaix im ju kiex heue.
17 Basha simiang Isarelax hu puing ka meung Yudax mai sum ti deuh veng Rama, sonsang ang kieh pui tix kaux kawx lih laig ka Asa simiang Yudax heue.
18 Asa teei mau mai khri pa kawn deuk khaing daux nyiex krao sinngao nyiex bwan Simiang Siyiex, nyiex krao sinngao simiang mai ap ankix ka daux tawm taix kawncau nawh khankix mai Asa ploi kix hu ka Benhadat kawn simex Tabarimon kawn simex Hezon, simiang Surix pa ot ka daux veng Damase ah nin,
19 “Kieh ax yuh paox pie sinax maix mai aux, awm pa yuh keeing aux mai keeing maix mai paox ti heue. Jhak heue, Aux ploi pui hu tawx totaix pa mawh mau mai khri khankix, maix deeh yieh pa yuh tix paox pie ka Basha simiang Isarelax, sonsang deeh yaog pui naing ti ing khaing aux heue.”
20 Benhadat nghiet ka lox Asa mai nawh ploi cao kaing kru naing tix khankix hu puing ka veng pui Isarelax mai puing ka veng Iyon, Dan, Abelabiet-makha mai baoh haktiex Khinirot tau mai baoh haktiex Napthalix khawmuik heue.
21 Yam mhong Basha ka ceu an, nawh ang lai sum ka veng Rama mai ing ot ka daux veng Tiraza heue.
22 Simiang Asa kieh pui krai pao ka daux meung Yudax khawmuik, ang via pui tix kaux kawx mai kieh kix don simaox khaing veng Rama mai khaox khankix pa hoik shiao Basha sonsang sum tix veng, mai Asa deeh viex ti sum veng Gebax, pa koe ka daux meung pui Binyamin mai veng Mizapa tau ka an heue.
23 Grawng kaing pa deuk mai can pa hoik yuh simiang Asa khawm riang rao nawh khankix mai can kaing pa yuh nawh mai veng pa hoik sum nawh khankix, hoik tiem ti deuh ka daux phuk lai been simiang pui Yudax heue. Viang mawh nan, yam riex ju nawh, nawh pon jhawm saux ka caong tix heue.
24 Asa laux lee tix mai keeing nawh khankix mai sipaung nawh tau mai keeing nawh khankix ka daux veng keeing nawh Davit mai Yehoshaphat kawn simex nawh deeh plud ti kwang khaix nawh heue.
Krax Kwang Nadat
25 Mai Nadat kawn simex Yerobom yaog ti kwang ka piang pui Isarelax, yam kwang Asa simiang Yudax ka haktiex ra num, mai nawh kwang ka piang pui Isarelax ra num heue.
26 Mai nawh yuh pa caox caig ka plak sivoe ngai Siyiex mai lawng krax hu keeing nawh mai ka daux phimap pa kieh pui Isarelax yuh phimap heue.
27 Basha kawn simex Ahiyax, khaing doeh nyiex ma pui Issakha keud ti tieh feen ka simiang Nadat, mai Basha hoik pah ka nawh ka daux veng Gibeton veng cie pui Philitix, yam lai lawm Nadat mai pui Isarelax khankix ka veng Gibeton heue.
28 Basha pah nawh yum yam kwang simiang Asa ka meung Yudax loe num tix num mai nawh plud ti kwang khaix nawh heue.
29 Yam mawh nawh simiang, nawh pah ka doeh nyiex ma Yerobom khankix heue. Nawh ang prah kix im ju tix kaux kawx, tom sidah yuh nawh kix laux leeing pak lawg, awm gumlox pa hoik krai Simiang Siyiex ka kawncau tix Ahiyax pui veng Shilaw.Ref 15:29 1Sim 14:10.
30 Mawh kheu phimap Yerobom pa hoik lud nawh mai pa hoik kieh pui Isarelax khankix lud mai pa hoik so Simiang Siyiex pui Isarelax khankix song rhawm heue.
31 Grawng kaing pa deuk mai can pa hoik yuh Nadat khankix, hoik tiem ti deuh ka daux phuk lai been simiang pui Isarelax khankix heue.
32 Mai naing koe sinax Asa mai Basha pa mawh simiang pui Isarelax glang singaix im ju kiex heue.
Krax Kwang Basha
33 Yam hoik kwang Asa simiang Yudax ka haktiex loe num tix num, Basha kawn simex Ahiyax jah ti kwang ka piang pui Isarelax khankix, ka daux veng Tiraza mai kwang haktiex tixnga pon num heue.
34 Nawh yuh pa caox caig ka plak sivoe ngai Simiang Siyiex mai lawng daux krax pa hu Yerobom mai daux phimap pa yuh nawh pa kieh pui Isarelax yuh phimap heue.