14
Prawng Ca Doeh Nyiex Ma Yerobom
1 Yam an Abiyax kawn simex Yerobom saux heue.
2 Mai Yerobom ah nin ka moeng tix, “Kaoh mai loh grang tokaux maix son ang kix tawng mawh maix moeng Yerobom mai hu ka veng Shilaw, cao jhai Ahiyax pa krai sang mawh aux simiang ka piang pui inkix ot tan heue.
3 Teei ti viex blah kao lon mai blah rhi khlawp tiblah mai rawm hia tix kawng mai hu ka nawh, nawh tak krai maix mhong pa sang lih ti mawh ka kawn nyawm an heue.”
4 Mai moeng Yerobom yuh awm an, nawh yaog ti hu ka veng Shilaw mai hoek ka nyiex Ahiyax, viang mawh nan, Ahiyax ang chix yaox, mawh kheu hoik pu pi ngai nawh jao riex ju nawh heue.
5 Simiang Siyiex ah nin ka Ahiyax, “Moeng Yerobom sang hoek chawk grawng kawn simex tix ka maix, kheu jao saux kawn simex nawh maix caw ti ah nin ka nawh heue. Mawh kheu ceu an tak mawh yam hoek nawh, nawh tak yuh grang awm bun tang kaux heue.”
6 Yam mhong Ahiyax ka luah caong hu nawh mai yam laig nawh ka diang siviex, nawh ah nin, “Moeng Yerobom eue, laig heue maix loh grang tix awm pui tang kaux jao patix? Mawh kheu aux hoik ploi kix krai lox laux rhawm ka maix heue.
7 Hu kraix Yerobom mhong, Simiang Siyiex, Siyiex pui Isarelax ah in, mawh kheu Aux hoik yaog maix lhaong khaing daux sinax pui khankix mai kieh maix mawh cao kwang ka piang pui Aux Isarelax,
8 aux hoik teei meung haktiex khaing doeh nyiex ma Davit mai Aux tawx ka maix, viang mawh nan maix ang awm kawncau Aux Davit, pa priex gumlox pingnyap Aux khankix mai hawt grawng lawng khaix Aux khawm rhawm ti mai yuh pa khaw plak sivoe ngai Aux,
9 viang mawh nan maix yuh pa nie lheu caox khaing pui pa koe sivoe maix, mawh kheu maix hoik hu mai yuh riang siyiex tang kaux son tokaux tix mai raug ti deuh riang grang Asherax khankix, sonsang deeh so maix krax song rhawm Aux mai hoik tik vud Aux ka plak khaix tix,
10 aux tak kieh krax laux leeing hoek ka piang doeh nyiex ma Yerobom mai tat ti tik kawn simex daux Yerobom ku kaux, pa koe ka daux pui Isarelax, pa mawh pui pa giex laung mai pui pa glawd khaing Yerobom mai Aux tak teei ti tik doeh nyiex ma Yerobom, Ref 14:10 1Sim 15:29. awm tik pui ka aing heue.
11 Sox tak ih ka pui Yerobom pa yum ka daux veng mai sim raoma tak ih ka pui pa yum ka daux tiag, Mawh kheu Siyiex hoik krai ti deuh heue.”
12 Kaoh mai ing ka nyiex tix, yam dig caong maix ka daux veng, kawn nyawm an tak yum heue.
13 Pui Isarelax tak yiiem doe mai sipaung nawh, kheu mawh nawh kawn Yerobom tix kaux khaing, pa sang hoek ka daux simeeig, mawh kheu kawn yaox ceu pa mhawm ka daux nawh ka plak sivoe Simiang Siyiex pui Isarelax ka daux doeh nyiex ma Yerobom heue.
14 Lheu khaing an Simiang Siyiex tak yaog simiang tix kaux son tix ka daux pui Isarelax, pa sang tat ti tik doeh nyiex ma Yerobom ka daux singaix heue. “Mawh yam mawx?” Nawh Cao ah nin, “Mawh yam in heue”
15 Simiang Siyiex tak sivied ka pui Isarelax, kieh kix vuhvied awm gawng priem ka daux rawm mai tak reeig ti tik pui Isarelax khaing haktiex in, pa hoik tawx Nawh Cao ka keeing kix mai kieh prung prang ka plak toi rawm klawng Yufrethi kheu jao yuh kix riang Asherax mai so kieh Simiang Siyiex song rhawm heue.
16 Mai Nawh Cao tak tik vud ka pui Isarelax, kheu phimap Yerobom pa yuh nawh phimap mai kieh pui Isarelax lud.
17 Moeng Yerobom yaog ti ing khaing tan, yam hoek nawh ka diang siviex veng Tiraza, kawn nyawm an hoik yum heue.
18 Pui Isarelax sipaung nawh mai yiiem doe son nawh, awm gumlox pa hoik krai Simiang Siyiex ka kawncau tix cao jhai Ahiyax heue.
19 Pa yuh Yerobom khankix mai pa yuh nawh naing pa kwang nawh ka haktiex khankix, hoik tiem ti deuh ka daux phuk lai been simiang pui Isarelax heue.
20 Yerobom kwang ka haktiex tixnga ra num mai laux lee tix tau mai keeing nawh khankix mai kawn simex nawh Nadat deeh plud khaix nawh heue.
Kwang Rehobom Ka Meung Yudax
(2Been 12:1-16)
21 Rehobom kawn simex Sawlamon kwang meung Yudax, yam jah Rehobom ti kwang haktiex koe tixpon tix num mai kwang ka veng Yerusaliem kao aliah num, veng pa hoik laug Simiang Siyiex ti deuh khaing daux ceu pui Isarelax mai pa sonsang deuh min ceu kaux tix tan, miex nawh mawh Nema pui Amonix heue.
22 Pui Yudax khankix yuh ceu pa caox caig ka plak sivoe ngai Simiang Siyiex mai kix hoik kieh Nawh Cao song rhawm ka phimap pa yuh tix mai lheu khaing pa yuh keeing kix heue.
23 Mai kix baox deeh sum dee pa lhaong khankix mai rong khaox sigang khankix mai riang grang Asherax ka piang gawng piang lua pa lhaong ku mu mai ka greem khaox klai khankix ka son tix heue.Ref 14:23 2Sim 17:9-10.
24 Mai simex coh kaux khankixRef 14:24 Pi 23:17. koe ka daux haktiex an, kix hawt yuh pa seeing brai pa yuh pui khankix, pa hoik grheu Simiang Siyiex khaing sivoe pui Isarelax heue.
25 Yam kwang simiang Rerobom ka haktiex phwan num tix num, Shishak simiang Ejiptux, hoek ti puing ka veng YerusaliemRef 14:25 2Been 12:2-8. heue.
26 Yam rhim ti viex sinngao daux nyiex bwan Simiang Siyiex mai sinngao nyiex haw simiang mai kraung kuceu ing mai tix, nawh baox viex kraung plah tiebtie khri pa yuh Sawlamon heue.Ref 14:26 1Sim 10:16-17; 2Been 9:15-16.
27 Simiang Rehobom deeh plud ti yuh plah tiebtie tawng mai ap an ka cao kaing pau ju simiang, pa pau diang siviex nyiex simiang heue.
28 Yam laig simiang ka nyiex bwan Simiang Siyiex yam mawx ang ah, cao pau ju khankix viex kraung plah pa tiebtie hawt khaix nawh, kix deeh viex hoek priex ka daux lawg dee pau kix heue.
29 Can kaing pa deuk mai pa hoik yuh Rehobom khankix mai khaing pa yuh nawh khankix hoik tiem ti deuh daux phuk lai been simiang pui Yudax ang mawh lie?
30 Mai naing koe sinax Rehobom mai Yerobom sijheeng heue.
31 Rehobom laux lee ti tau mai keeing ti mai sipaung tau mai keeing nawh Davit, ceu kaux miex nawh mawh Nema pui Amawrix, Abiyax kawn simex nawh deeh plud khaix nawh heue.