13
Grawng Lox Pa Viex Pui Siyiex
1 Mai jhak heue, pui Siyiex tix kaux lih hu khaing meung Yudax mai hoek ka daux veng Betelax awm gumlox pa tawm Simiang Siyiex, yam cung Yerobom hawt khu dee tan sonsang gleeing nyawng bhawng heue.
2 Mai nawh deuh phimap ka khu dee tan an kok yo gumlox pa tawm Simiang Siyiex ah nin, “Khu dee tan, khu dee tan eue, Simiang Siyiex ah nin, jhak heue, kawn simex pa kaux Yosiyax tak keh khaing doeh nyiex ma Davit, kaw an tak pah cao giex kaing li pa appong krax tan ka dee pa lhaong khankix, pa gleeing nyawng ka piang maix mai si-ang pui khankix tak gleeing tix ka piang maix heue.”Ref 13:2 2Sim 23:15-16.
3 Mai nawh hoik tawx mhai tix ceu ka daux singaix an ah nin, “In mawh mhai pa hoik krai Simiang Siyiex, khu dee tan in tak max mai nyaox pa koe piang nawh khankix tak roik heue”
4 Yam mhong Yerobom ka lox pa ah pui Siyiex, pa deuh phimap ka khu dee tan daux veng Betelax, nawh nyeu taix tix lih piang khu dee tan ah nin, “Giex nawh, “taix pa nyeu nawh lih, hoik kroh hu mai ang lai deeh pon bluh hoek ka tokaux tix heue.
5 Mai khu dee tan an hoik max mai nyaox khankix roik khaing piang khu dee tan, awm mhai pa krai pui Siyiex an, kheu gumlox Simiang Siyiex heue.
6 Simiang ah nin ka pui Siyiex an, “Yuh bwanson deeh khyox khaw ka Simiang Siyiex maix mai rawg bwan ka son aux, sonsang deeh mawie taix aux!” Mai pui Siyiex deeh khyox khaw ka Simiang Siyiex mai taix simiang deeh mawie mai deeh awm phao voe heue.
7 Mai simiang ah nin ka pui Siyiex, “Hoek ka nyiex tau mai aux, kieh tokaux maix koe riang rao mai aux tak tawx totaix ka maix heue.”
8 Pui Siyiex deeh ah nin ka simiang, “Viang maix sang tawx nyiex haw ka aux tix plak kawx, aux ang pon hu tau mai maix, Aux ang pon ih blah mai ang pon nyaux rawm baoh in,
9 mawh kheu Simiang Siyiex hoik tawm lox ka aux ah nin, maix tak ang pon ti ih blah, ang pon ti nyaux rawm mai ang pon ti deeh ing ka krax pa hoek maix heue”
10 Mawh kheu nan, nawh deeh hu ka krax tang nyaing mai nawh ang lai ing ka krax kaoh tix khaing veng Betelax heue.
Grawng Yum Pui Siyiex
11 Yam an cao jhai pa riex ju tix kaux, pa ot daux veng Betelax kawn simex nawh hoek mai krai keeing tix mhong kaing pa yuh pui Siyiex khawmuik ka daux veng Betelax, mai lox pa hoik krai nawh ka simiang heue.
12 Mai keeing kix deeh ah nin, “Mawh ing nawh krax mawx?” Mai kawn simex nawh jhi krax ing pui Siyiex, pa kaoh khaing meung Yudax heue.
13 Nawh ah nin ka kawn simex tix, “Sau an brug son aux ka piang la, ” Mai kix sau an brug son nawh mai nawh brug la,
14 mai hawt khaix pui Siyiex mai yaox ka ngawm nawh greem khaox tiah ah nin ka nawh, “Mawh maix pui Siyiex pa kaoh khaing meung Yudax lie?” Mai nawh ah nin, “Aux mawh pui an heue.”
15 Mai nawh ah nin ka nawh, “Hoek daux nyiex mai ih priex tau mai aux heue.”
16 Mai nawh ah nin, “Aux ang pon ing, ang pon ih priex mai ang pon nyaux rawm tau mai maix baoh in heue.
17 Mawh kheu gumlox khaing Simiang Siyiex krai ah nin ka aux, maix tak ang pon ti ih blah mai ang pon ti nyaux rawm baoh tan mai ang lai pon ti ing ka krax kaoh maix heue.”
18 Nawh ah nin ka nawh, “Aux kawx mawh cao jhai tix kaux awm maix mai kawncau Siyiex hoek ti krai gumlox pa tawm Simiang Siyiex ka aux ah nin, viex nawh hoek tau mai maix ka daux nyiex sonsang ih priex mai nyaux rawm heue.” Viang mawh nan, nawh hoik pie lhen ka nawh heue.
19 Nawh deeh ing tau mai nawh mai ih priex mai nyaux rawm ka daux nyiex nawh heue.
20 Yam ngawm hawt pheen, gumlox Simiang Siyiex bleeh ka cao jhai pa viex nawh hoek tan,
21 mai nawh kok ah nin ka pui Siyiex pa kaoh khaing meung Yudax, Simiang Siyiex ah nin, mawh kheu jao ang maix nghiet lox Simiang Siyiex mai ang priex ka lox tawm pingnyap pa tawm Simiang Siyiex ka maix,
22 viang mawh nan, deeh hoek ti ih priex mai nyaux rawm ka dah dee pa hoik tawm Simiang Siyiex ka maix yuh nin, “Paw ih priex mai paw nyaux rawm, tokaux yum maix tak ang pon ti hoek ka simeeig keeing maix khankix heue”
23 Khaix hoik ih nawh priex mai nyaux rawm, cao jhai viex nawh hoek dee an, sau an brug ka piang la son nawh heue.
24 Yam lih hu nawh khaing tan, sivai sangsi sipub nawh ka daux krax mai kiied nawh mai tokaux yum nawh cod ka daux krax, la brug nawh mai sivai sangsi cung hawt praok nawh heue.
25 Pui hu hawt baoh tan, yaox ka tokaux yum pa cod daux krax mai sivai sangsi pa cung praok nawh, kix krai grawng an ka daux veng ot cao jhai riex ju heue.
26 Yam mhong cao jhai pa deeh viex nawh hoek khaing daux krax, ka grawng an, nawh ah nin, “An mawh pui Siyiex pa nghiet ka gumlox Simiang Siyiex, mawh kheu nan, Simiang Siyiex hoik ap ka sivai sangsi, kieh kiied nawh yum, awm gumlox pa hoik krai Simiang Siyiex ka nawh heue.”
27 Mai nawh ah nin ka kawn simex tix khankix, “Sau an brug ka piang la son aux, ” Mai kix kawx sau an brug ka piang la heue.
28 Nawh lih hu mai yaox tokaux yum an ka daux krax, la mai sivai sangsi kawn cung praok tokaux yum an, sivai sangsi ang nyang ih tokaux yum an mai ang nyang kiied ka la an heue.
29 Mai cao jhai riex ju an yaog ti teei tokaux yum pui Siyiex, tang nawh ka piang la mai viex nawh ing ka daux veng, nawh yiiem doe mai sipaung ka nawh heue.
30 Mai nawh deuh tokaux yum ka daux simeeig tix mai kix yiiem doe ka son nawh ah nin, “O pux aux eue, ”
31 Khaix hoik sipaung kix ka nawh, nawh ah nin ka kawn simex tix khankix, “Yam yum aux sax sipaung aux ka daux simeeig dee sipaung aux pui Siyiex in mai deuh si-ang aux ka praok si-ang nawh heue.”
32 Mawh kheu lox pa riag yo nawh kheu gumlox Simiang Siyiex pa deuh phimap ka khu dee tan, ka veng Betelax mai ka nyiex krub khankix pa koe ka dee pa lhaong mai pa koe ka veng Samarix grum naog tete heue.
33 Khaix hoik ceu an, Yerobom ang nyang veeh tix khaing krax pa caox caig yuh tix, lheu khaing an nawh baox yaog cao giex kaing khankix khaing daux cub pui kuceu, son dee pa lhaong khankix, can pui pa koe rhawm rhi ti yuh cao giex kaing li khankix nawh hoik yuh kix singax mai kieh kix mawh cao giex kaing li ka dee pa lhaong heue.
34 Mai ceu in hoik mawh phimap ka doeh nyiex ma Yerobom, sonsang tat ti tik mai yuh nawh laux leeing khaing piang haktiex in heue.