11
Sawlamon Veeh Rhawm Khaing Siyiex
1 Simiang Sawlamon moh ka bun tang praix tom nie, lheu khaing kawn bun Pharaw, nawh baox moh bun Mawbax, bun Amawnix, bun Edom, bun Sidom, bun Hetax khankix,
2 Simiang Siyiex krai grawng pa dex mai pui tang praix ka pui Isarelax ah nin, “Pex tak ang pon teei ti mex moeng ka kix mai kix kawx tak ang pon ti teei pex, “Mawh kheu kix tak kieh sok rhawm pex veeh tix singai mai hawt khaix siyiex kix, Ref 11:2 Lih 34:16; Pi 7:3-4. simiang Sawlamon kied koe rhawm ghoing ka bun tang praix heue.
3 Mai nawh koe moeng aliah kaux mai moeng iak loe yieh kaux mai moeng nawh khankix hoik kieh sok rhawm nawh veeh hu heue.
4 Yam hoik kuad Sawlamon moeng nawh khankix kieh rhawm nawh veeh hu khaix siyiex tang kaux khankix, mai rhawm nawh ang lai kaux sijax ka Simiang Siyiex, awm rhawm pa koe keeing nawh Davit heue.
5 Mawh kheu jao in, simiang hawt khaix Ashatariet siyiex pui Sidom mai Milakbom, siyiex pa seeing brai pui Amonix khankix heue.
6 Sawlamon yuh pa caox plak sivoe ngai Simiang Siyiex mai ang lai hawt grawng lawng khaix Simiang Siyiex grum naog, awm pa yuh keeing nawh Davit heue.
7 Sawlamon sum dee pa lhaong son Khemawsha siyiex pa seeing brai pa krub pui Mawbax, ka piang gawng pa koe ka plak lih singaix ka veng Yerusaliem mai ka son Mawliet siyiex pa seeing brai pa krub pui Amawnix khankix heue.
8 Mai nawh yuh khu ka son moeng tix pui tang praix khankix, sonsang gleeing nyawng bhawng mai tan ka siyiex kix heue.
9 Mai Simiang Siyiex song rhawm ka Sawlamon, kheu jao hoik veeh rhawm nawh ti singai khaing Simiang Siyiex pui Isarelax, pa hoik lih bleeh ka nawh ra bawg,
10 mai hoik tawm grawng pa dex son in ka nawh, sonsang ang nawh lai hawt khaix siyiex tang kaux khankix, viang mawh nan, nawh ang lai cu nghiet ka lox pa hoik tawm Simiang Siyiex heue.
11 Mai Simiang Siyiex ah nin ka Sawlamon, “Kheu jao yuh maix ceu in mai kheu jao ang maix priex rien ka sijax mukheu Aux mai lox lai beenli pa hoik tawx Aux ka maix khankix, Aux tak teei meung haktiex khaing maix mai tawx ka kawncau maix heue.
12 Viang mawh nan, Aux kawn kia pakngai keeing maix Davit mai ang nyang yuh ceu an yam kawn im ju maix, viang mawh nan, Aux tak deeh teei meung haktiex ka daux tawm taix kawn simex maix heue.
13 Viang mawh nan, Aux tak ang teei meung haktiex khawmuik, mai Aux tak tawx ceu pui tix cub ka kawn simex maix, kheu jao jhak Aux pakngai kawncau Aux keeing maix Davit mai veng Yerusaliem pa hoik laug Aux ti deuh heue.”
14 Simiang Siyiex so rhawm Hadat pui Edom, pa mawh doeh ru simiang Edom tieh feen ka Sawlamon heue.
15 Mawh kheu yam ot Davit ka daux Edom daux bawg yam pa hoik luan, Yuabax cao kaing naing ting lih hu sonsang sipaung ka simex pui Edom pa hoik pah kix ka heue.
16 Mawh kheu Yuabax mai pui Isarelax, kawn ot tan liah khix, tom hoik sidah pah nawh simex Edom ku kaux heue.
17 Yam an Hadat lih to ka meung Ejiptux tau mai pui Edom pa mawh kawncau keeing nawh, yam an Hadat kawn iak ka heue.
18 Kix lih khaing haktiex Midian mai hoek ka haktiex Param mai viex pui Param hu mai ti tom hoek ka Ejiptux, bleeh ka Pharaw meung Ejiptux, mai simiang tawx nyiex tix lhang mai pa ih mai haktiex ka son nawh heue.
19 Hadat yuh pa khaw ka sivoe Pharaw, mawh kheu nan, nawh tom tawx Hadat moeng pux moeng tix, bun an mawh pux laux simiang Tapheniet heue.
20 Mai pux Tapheniet keh kawn simex pa kaux Genubat, Tapheniet hoik eei nawh ting ka daux nyiex haw Pharaw mai Genubat ot tau mai kawn nyiex ma Pharaw mai sinax kawn simex Pharaw heue.
21 Yam mhong Hadat ka yum Davit tau mai keeing nawh mai yam hoik yum Yuabax cao kaing naing ting pui Isarelax, yam ot kix ka daux meung Ejiptux, Hadat ah nin ka Pharaw, “Kieh aux lih sonsang ing aux ka haktiex tix heue.”
22 Pharaw deeh ah nin ka nawh, glang ot maix tin ang maix fah rhawm ka ceu tix maix lai sawg krax pa sang deeh ing tix, ka haktiex cao tix? “Nawh deeh pawk lox ah nin, ang koe tidtix, ca kieh aux ing ngie heue.”
23 Mai Siyiex deeh so rhawm tang kaux pa mawh Rezon kawn simex Eliyadax pa to khaing cao simiang tix Hadadeza simiang haktiex Zawbax tieh feen ka nawh heue.
24 Nawh khrawm pui khankix hoek ka tix, mai mawh cao kaing ka piang cub pui pa tieh feen, yam pah Davit pui ka haktiex Zawbax mai kix hu ka veng Damase mai ot tan, nawh mawh simiang ka veng Damase heue.
25 Rezon tieh feen ka pui Isarelax, singaix yam kawn im ju Sawlamon, nawh yuh pa caox awm pa hoik yuh Hadat mai, nawh kwang ka haktiex Surix mai seeing ka pui Isarelax heue.
Pa Deeh Tieh Feen Yerobom
26 Kawncau Sawlamon Yerobom kawn simex Nebat, pui Epharem yaong Zeredax yaog tix tieh feen ka simiang, ceu kaux miex nawh mawh Zerua pa mawh miexmai heue.
27 Mai in mawh grawng pa tieh feen nawh ka simiang, kheu sum Sawlamon veng Milaw mai deeh cox guh veng pa laux leeing keeing nawh Davit heue.
28 Yerobom mawh pui pa ting riang mai pui vao tix kaux mai Sawlamon yaox mawh pui pa awn ju pa kied coca tix mai yaog nawh mawh cao kwang ka piang cao yuh kaing nyiex Yosiep heue.
29 Ka daux tix ngaix yam lih hu Yerobom khaing Yerusaliem, cao jhai Ahiyax pui veng Shilaw ceep kraung khraox mai hoek rieb nawh ka daux krax, mai kiex ot ka daux kaung nong nong heue.
30 Ahiyax peeik kraung khraox ceep tix mai riah lih kao ra siag heue.
31 Nawh ah nin ka Yerobom, “Teei ti cie in kao siag, mawh kheu Simiang Siyiex pui Isarelax ah nin, aux rud ti teei meung haktiex khaing daux tawm taix Sawlamon mai tak tawx ceu pui kao ceu ka maix,
32 viang mawh nan, nawh tak pon ti cie tix ceu ngie, mawh kheu jhak Aux ngai kawncau tix Davit mai veng Yerusaliem pa mawh veng pa hoik laug Aux lih khaing daux ceu pui Isarelax,
33 mawh kheu nawh hoik tik vud ka Aux mai krub ka siyiex Ashatariet, siyiex pui Sidom mai ka Milakhom siyiex pui Amawrix khankix mai ang lai lawng daux krax Aux, sonsang yuh tix ceu pa mawh pa meh ka sivoe ngai Aux mai nawh ang lai hawt lox lai beenli mai lox tat jhawm prawng pa deuh Aux awm keeing tix Davit heue.
34 Viang yuh nan kawx Aux tak ang lai teei meung haktiex khaing daux taix nawh khawmuik, mawh kheu Aux hoik yaog nawh mawh cao kwang baux singaix im ju nawh, kheu jao kawncau Aux Davit, pa hoik laug Aux pa hoik hawt lox tawm pingnyap mai lox lai beenli pa deuh Aux heue.
35 Aux tak teei meung haktiex khaing tawm taix kawn simex Sawlamon mai deeh tawx ceu pui ka maix kao ceu heue.
36 Son kawn simex nawh, Aux tak tawx ceu pui tix ceu, sonsang riang kawk ngu kawncau Aux Davit jheung jheung, plak sivoe Aux ka veng Yerusaliem, pa mawh veng pa hoik laug Aux sonsang deuh ceu kaux tix tan heue.
37 Aux tak teei maix mawh cao kwang awm pa koe rhawm maix khawmuik mai maix tak mawh simiang ka piang pui Isarelax heue
38 Phan maix nghiet lox tawm Aux mai lawng daux krax Aux mai yuh pa rahsee ka plak sivoe Aux mai priex ka lox lai beenli pa deuh Aux mai lox tawm pingnyap Aux khankix, awm pa hoik yuh kawncau Aux Davit, Aux tak ot tau mai maix mai Aux tak sum ti tawx nyiex pa kaux cong ka son maix, awm pa hoik sum Aux son Davit mai Aux tak tawx ceu pui Isarelax ka maix heue.
39 Kheu jao in Aux tak tawx krax kha rhawm ka doeh ru Davit, viang mawh nan, ang mawh leeing ju heue.”
40 Sawlamon sawg ti pah ka Yerobom, viang mawh nan, Yerobom to ka simiang Shishak meung Ejiptux mai ot tan tom yum Sawlamon heue.
Pa Yum Sawlamon
(2Been 9:29-31)
41 Grawng kaing pa deuk mai can pa hoik yuh Sawlamon mai grawng pa koe pingnya cuyi nawh khankix, hoik tiem ti deuh ka daux phuk lai simiang Sawlamon ang mawh lie?
42 Mai nawh ot ka veng Yerusaliem mai kwang ka piang pui Isarelax tixpon num heue.
43 Sawlamon hoik laux lee tix tau mai keeing tix khankix mai kix sipaung nawh ka daux veng keeing nawh Davit, mai Rehobom kawn simex nawh deeh plud ti kwang khaix nawh heue.