18
Gwieh Haktiex Pa Kawn Deuk
1 Khaix an, cub pui hun pui Isarelax khawmuik, khrawm paox ti tau ka veng Shilaw mai sum nyiex gox bwan man bang kum tan heue. Pui haktiex khankix hoik ot ka greem pa kwang kix heue.
2 Khaing daux sinax doeh ru pui Isarelax khankix, pa kawn deuk aliah cub, ang nyang bax pon ti rieb sinngao cie tix kawn koe heue.
3 Kheu nan, Yawsux deeh ah nin ka pui Isarelax khankix, “Pex ang cu ti hu mai teei ti cie haktiex pa hoik tawx Siyiex leeing ju nawh ka keeing pex khankix glang gleeing yuh ka mawx lie?”
4 “Laug ti teei pui loe kaux khaing daux sinax pex, son doeh ru pex ku cub mai aux tak ploi kix hu heue. Kix tak yaog ti hu hoek ka haktiex kudah tiiem mai viex haktiex ankix awm pa simie kix tix pon sinngao cie kix mai deeh ing hoek ti krai ka aux awx.
5 Kix tak gwieh haktiex ankix aliah son. Ceu pui Yudax tak mawh pa kawn ot ka dee kwang kix ka plak seh mai doeh nyiex ma Yosiep tak mawh pa kawn ot ka haktiex dee kwang kix ka plak laong heue.
6 Mawh kheu nan, pex tak gwieh haktiex an aliah son mai viex riang haktiex an hoek ka aux tin, sonsang pon aux ti kieh pex cawk nieb ka son cao pex tin, ka plak sivoe ngai Siyiex leeing ju ex heue.
7 Viang mawh nan, pui Lewix khankix, tak mawh pa ang pon ti cie tix son kawx khaing daux sinax pex heue. Grawh grawng nawh, krax grawng pa yuh kix cao giex kaing li Siyiex leeing ju hoik mawh sinngao pa pon kix heue. Ceu pui Gat, ceu pui Rubin mai doh doe ru Manashe khankix tix plak, hoik mawh pa pon sinngao cie tix ka plak toi rawm klawng Yawdan, ka plak lih singaix, pa hoik tawx Mose, pa mawh kawncau Siyiex leeing ju ka kix heue”
8 Khaix an, pui khankix yaog ti kaoh mai hu ka dee singai mai Yawsux tawm gumlox tix ka pui pa hu sawg ti tiiem mhai haktiex khankix ah nin. “Hu lailing ti jhak haktiex kudah mai yuh riang haktiex ankix mhawm mhawm mai deeh hoek ka aux, sonsang pon yuh aux ti tawx krax pa cawk nieb ka son pex, ka plak sivoe Siyiex leeing ju, ka daux veng Shilaw tin heue.”
9 Mawh kheu nan, pui ankix hu ka daux haktiex ankix kudah mai tiiem mhai tix viex riang haktiex aliah son, ka daux phuk lai tix mu, awm pa koe veng an khankix heue. Kix deeh hoek ka Yawsux, ka dee bang kix ka daux veng Shilaw heue.
10 Khaix an, Yawsux yuh krax pa cawk nieb, ka son kix ka daux veng Shilaw, ka plak sivoe Siyiex leeing ju heue. Yawsux gwieh ti tawx haktiex ka pui Isarelax khankix tan, awm pa koe cub kix heue.
Haktiex Cie Cub Binyamin
11 Yam in, nieb cie doeh pui Binyamin khankix, mawh pa caw ti lih sivoe awm pa koe doeh nyiex ma kix heue. Haktiex dee pa kwang kix, hoik mawh pa lih khaing pa cawk kix nieb ka daux sinax kawn praix Yudax khankix mai kawn praix Yosiep khankix heue.
12 Haktiex cie kix ka plak laong, mawh pa jah tix ka rawm klawng Yawdan mai mee haktiex an deeh hu ka praok veng Yerikho, ka plak laong heue. Mee haktiex an, deeh lih hu ka piang gawng khankix pa koe ka plak klip singaix heue. Mee haktiex an deeh hu sidah ka daux tiag Bietavin heue.
13 Mee haktiex kix deeh hu khaing tan mai hu ka plak see veng Luza mai tiang hawt praok veng Luza, pa mawh veng Betelax, ka baoh plak seh heue. Mee haktiex deeh lih hu ka plak veng Atarot, pa dex mai gawng khankix, pa koe ka plak seh mai ka dee tiem haktiex hawt veng Biethawron heue.
14 Khaix an, mee haktiex deeh baox jawn ti lang khaing tan, hawt vung viang plak klip singaix mai hoek ka baoh plak seh, khaing plak greem caong gawng Khanan, deeh hu sidah ka veng Kirayatbalax, pa mawh veng Kirayatyarim, pa mawh veng cie pui Yudax khankix tix veng heue. In mawh mee haktiex pa koe plak klip singaix heue.
15 Mee haktiex praok plak seh mawh pa jah tix ka dee sidah veng Kirayatyarim mai mee haktiex an deeh sitoe ti hu ka plak klip singaix mai deeh lih hu ka dee lih rawm keut Nephataw heue.
16 Khaix an, mee haktiex an deeh lih jee mai hu ka plak dee sidah gawng khankix, pa koe ka plak sivoe daux ngawd kawn simex Hinnun, pa koe ka daux ngawd ceu pui Epharem khankix ka plak laong, mai mee haktiex an, deeh lih ka daux ngawd Hinnun mai hoek ka praok veng ceu pui Yebusix khankix, ka baoh plak seh mai mee haktiex an deeh lih hu ka yaong Engrawgalax heue.
17 Mee haktiex an, deeh hu hawt vung viang plak laong mai deeh lih ka yaong Engshemiet mai deeh sitoe tix lang tom hoek plak see yaong Gelilot, pa koe ka praok caong gawng Adumim mai deeh lih ka simaox Bawhan, pa mawh kawn simex Rubin heue.
18 Khaix an, mee haktiex deeh tiang ti hu hawt see plak laong veng Arabax mai deeh lih jee ka veng Arabax heue.
19 Mee haktiex deeh tiang ti hu ka plak laong veng Biethawgalax heue. Khaix an, mee haktiex deeh hu sidah ka dee kawk rawm plak laong rawm sigrit sigra kih, hawt dee sidah rawm klawng Yawdan ka plak seh heue. In mawh mee haktiex kix ka plak seh heue.
20 Rawm klawng Yawdan hoik mawh mee haktiex nawh ka plak lih singaix heue. In hoik mawh sinngao cub pui Binyamin khankix, awm pa hoik koe mee haktiex kix hawt vung viang baoh tan khawmuik mai awm pa koe doeh nyiex ma kix heue.
21 Yam in, veng cie doeh pui Binyamin khankix, awm pa koe doeh nyiex ma kix, hoik mawh veng Yerikho, veng Biethawgalax, veng Emietkezix,
22 veng Bietarabax, veng Zamarem, veng Betelax,
23 veng Avin, veng Para, veng Ophara,
24 veng Khephahamawni, veng Ophani mai veng Gaba khankix, pa mawh veng kao ra veng tau mai yaong pa koe hawt vung viang nawh khankix,
25 veng Gibun, veng Ramax, veng Berut,
26 veng Mizapa, veng Khephirax, veng Mawzax,
27 veng Rekim, veng Irapelax, veng Taralax,
28 veng Zelax, veng Alat, veng Yebusix (Pa mawh veng Yerusaliem), veng Gibat mai veng Kirayat khankix, pa mawh veng kao pon veng, tau mai yaong pa koe hawt vung viang veng an khankix heue. In mawh sinngao cie kawn praix Binyamin khankix, awm pa koe doeh nyiex ma kix heue.