17
Doeh Ru Manashe
1 Krax pa pon cawk nieb hoik mawh pa caw ka doeh ru cub Manashe khankix, kheu jao hoik mawh nawh kawn Ai Yosiep pa kok kix ceu kaux nawh mawh Makhirax, pa mawh kawn Ai Manashe, pa mawh keeing ka Gilat mai kheu jao hoik mawh nawh pui naing tix kaux heue. Mawh kheu nan, kix tawx haktiex Gilat mai haktiex Bashan ka nawh heue.
2 Krax pa cawk nieb khankix hoik mawh pa caw ka kawn praix pa ghoik khaing cub Manashe, awm pa koe doeh nyiex ma kix mai son kawn praix Abiza, kawn praix Heliet, kawn praix Asarie, kawn praix Shekhim, kawn praix Hepha mai kawn praix Shemida khankix heue. Inkix mawh kawn simex Manashe, pa mawh kawn simex Yosiep, awm pa koe doeh nyiex ma kix heue.
3 Viang mawh nan, Zelophihat, pa mawh kawn simex Hepha, kawn simex Gilat, kawn simex Makhirax, kawn simex Manashe khankix, ang koe kawn simex pie tix kaux kawx mai nawh koe ngie kawn bun khankix heue. Inkix mawh ceu kaux kawn bun nawh khankix, pa mawh Mala, Nawa, Hawgalax, Milakha mai Tiza khankix heue.
4 Kix hoek dex ka plak sivoe cao giex kaing li Eliza mai ka plak sivoe Yawsux, pa mawh kawn simex Nun mai ka plak sivoe cao pa kwang pa bung khankix ah nin. “Siyiex leeing ju hoik tawm gumlox ka Mose, sonsang tawx nawh sinngao cie yix khainng daux sinax puxaik yixRef 17:4 Si 27:1-7. khankix heue. Mawh kheu nan, awm pa hoik koe gumlox pingnyap Siyiex, nawh hoik tawx sinngao ka kix khaing daux sinax puxaik keeing kix heue.
5 Lheu khaing haktiex Gilat mai haktiex Bashan khankix, pa koe plak toi rawm klawng Yawdan khankix kao son tix son, hoik mawh cie cub Manashe khankix heue.
6 Grawh grawng nawh, kawn bun Manashe khankix, hoik mawh pa pon ti cie sinngao khaing daux sinax kawn saux simex kawn simex Manashe, pa kawn deuk khankix, hoik mawh pa pon ti cie haktiex Gilat heue.
7 Haktiex dee kwang Manashe, hoik mawh pa jah tix khaing veng Asha, tom hoek ka veng Mikmetat, pa koe hawt plak lih singaix khaing veng Shekhim heue. Mee haktiex deeh lih hu ka plak seh tom hoek ka dee ot pui veng Engtapua khankix heue.
8 Manashe hoik pon ti cie veng Tapua. Viang mawh nan, veng Tapua, pa koe piang mee haktiex veng Manashe, hoik mawh cie kawn praix cub Epharem khankix heue.
9 Mee haktiex an deeh lih jee ka rawm klawng iak Kana, pa koe ka plak seh. Veng cie Epharem inkix, mawh pa koe daux sinax veng cie Manashe khankix heue. Haktiex cie Manashe, mawh pa koe plak laong khaing rawm klawng iak an mai mee haktiex an hu ghoik ti sidah ka rawm sigrit sigra heue.
10 Ankix pa koe baoh plak seh, hoik mawh cie Epharem heue, pa koe plak laong, hoik mawh cie Manashe mai rawm sigrit sigra hoik mawh mee haktiex nawh heue. Dee kwang Manashe mawh pa sideet mai haktiex veng Asha, hawt plak laong mai haktiex veng Issakha, mawh pa koe plak lih singaix khaing nawh heue.
11 Ka daux mee haktiex dee kwang Issakha mai Asha, veng cie Manashe khankix caw ti mawh veng Bietshan mai veng khawm yaong khankix, veng Ibalam mai veng mai yaong khankix, can pui pa ot ka daux veng Dawrax mai veng mai yaong khankix, can pui pa ot ka daux veng Engdawrax, veng mai yaong khankix, can pui pa ot ka daux veng Tanak, veng mai yaong khankix mai can pui pa ot ka daux veng Megidaw, veng mai yaong khankix, pa mawh dee koe gawng lua baoh an loe dah heue.
12 Viang mawh nan, kawn praix Manashe khankix, ang lai pon grheu pui pa ot ka daux veng ankix hu heue. Mawh kheu nan, ceu pui Khanan khankix hoik tat rhawm rhi tix ot ka daux haktiex an heue.
13 Ceu ankix hoik lih ti koe, yam hoik kied koe riang rao pui Isarelax khankix, kix khin ti kieh ceu pui Khanan mawh pa yuh kaing son tix heue. Viang mawh nan, kix ang lai grheu ti tik lih khaing tan khawmuik heue.Ref 17:12-13 Cao 1:27-28.
Haktiex Baox Son Epharem Mai Manashe
14 Khaix an, kawn praix Yosiep khankix deeh ah nin ka Yawsux. “Mawh kheu jao patix mai lai tawx ngie krax pa cawk yix nieb, sonsang pon yix sinngao tix dah khaing yuh ka mawx? Yix kawx hoik mawh cub caw pui pa kied ting tix cub, awm pa hoik nawb Siyiex leeing ju bwanson ka yix tom nie heue.”
15 Mawh kheu nan, Yawsux deeh pawk ah nin. “Phan pex mawh cub pui pa kied ting tix cub, pex hu ka plak haktiex daux nong khankix mai soh dah dee son cao pex ka daux haktiex ceu pui Parazix khankix mai dee ot cub pui pa ting lhaong khankix, kheu hoik kied sikhox baoh gawng lua Epharem ka son pex heue.”
16 Kawn praix Yosiep khankix deeh ah nin. “Haktiex gawng lua an khankix ang lai mawh pa kub ti ot ka son yix heue. Ceu pui Khanan khawmuik pa ot ka daux ngawd daux lung khankix, hoik mawh pa koe ling lawx brung naing pa yuh tix ka rhiem khankix, khawm pui ankix, pa ot ka daux veng Bietshan mai khawm pui pa ot hawt baoh veng nawh khankix mai khawm can pui ankix, pa koe ka daux ngawd veng Yezerelax khankix heue.”
17 Yawsux deeh krai ka doeh nyiex ma Yosiep mai khawm doeh nyiex ma Epharem mai Manashe khankix ah nin. “Pex mawh cub pui pa kied ting mai hoik koe sibrawm pa kied ting heue. Pex tak ang pon ti mawh pa pon nieb tix mu ngie heue.”
18 Viang mawh nan, haktiex piang gawng lua khankix, tak mawh cie pex heue. Viang dee ankix mawh pa kied haoh khaox ox kawx, pex tak kid ti tik mai haktiex pa sang deeh baox nie vieh an khankix, tak mawh cie pex heue. Pex tak mawh pa grheu ti tik ceu pui Khanan khankix khaing tan, viang kix mawh pa hoik koe ling lawx brung naing pa yuh tix ka rhiem mai viang kix mawh pa kied ting riang rao kawx heue.