1 “To hu to hoek ka daux krax daux veng Yerusaliem, hawt jhak mai sawk ti yaox ka plak praix khawm plak taoh plak caw khankix, sonsang pon ti yaox pui pa hawt ti yuh pa rahsee mai pa mawh meh, pie tix kaux tan mai Aux tak pluat ploi phimap veng Yerusaliem an heue. 2 Viang kix ah mawh Siyiex pa im ju kawx, kix kawn tiextu ka daux pa ang mawh meh tete heue. 3 Siyiex eue, ngai Maix Cao mawh pa simi ti jhak piang pa mawh meh ang mawh lie? Maix Cao hoik siviet tix gau ka kix, viang mawh nan, kix cu tix tieh loh rhawm tix, Maix Cao hoik yuh kix laux leeing, viang mawh nan, kix hoik thiang ti tik ka ceu pa sidiex gau maix heue. Kix hoik kieh pakngai tix lheu kiien khaing simaox, kix hoik thiang tix ang deeh ing heue. 4 Mawh kheu nan, Aux ah nin, pui in kix mawh pa hot sibhawm, grawh grawng nawh, kix ang tawng daux krax Siyiex mai ang tawng ka alo Siyiex kix heue. 5 Aux tak sang hu ka pui ting khankix mai krai ka kix, mawh kheu kix tawng daux krax Siyiex mai khawm lox Siyiex kix heue. Viang mawh kawx nan, kix hoik raig ti tik ka khaox glawm mai ka gumlox sijax mukheu khankix heue. 6 Mawh kheu nan, sivai sangsi pa kaoh khaing daux tiag tak sang pah kix yum, sox tiag pa lailing pon sawm, tak sang yuh kix laux leeing, sivai maox, ca pau tix jhak ka veng kix mai tak kiied ka pui pa lih khaing veng ku kaux, dud baux mawx baux an heue. Grawh grawng nawh, krax pa lud kix mawh pa kied nie mai krax pa tieh feen kix hoik baox nie gawp tix heue. 7 Aux tak sang pon pluat ploi phimap maix son in yuh ka mawx lie? Kawn praix maix khankix hoik tik vud Aux mai hoik tiextu tix ka pui pa ang tie mawh siyiex khankix heue. Viang aux hoik tawx kix ih priex preem tom sak, kix hoik lud ka moeng kawn pui mai khrawm paox tix hu ka daux nyiex bun coh kaux heue. 8 Kix hoik awm brung pa sak tix mu ponngawb caocao, pui ku kaux hoik riag hawt khaix moeng paox plawg tix heue. 9 Siyiex ah nin, “Mawh ang Aux khaw tix tawx krax kham geu ka kix, son grawng ceu in kix lie? mawh ang Aux khaw tix pawk bix ka kix tom vah rhawm tix ka lie?” 10 Hu ka piang guh veng nawh khankix mai yuh laux leeing, viang mawh nan, paw yuh laux khawmuik, tat ti tik taix caong nawh mawh kheu ang mawh cie Siyiex heue. 11 Grawh grawng nawh, nyiex ma ceu pui Isarelax mai nyiex ma ceu pui Yudax khankix, ang lai kaux sijax ka Aux heue, Siyiex ah nin heue. 12 Kix hoik thiang ti tik ka grawng Siyiex ah nin, Ang tie mawh Nawh Cao, ceu pa caox caig tak ang pon hoek piang ex mai ex ang sipup ti yaox ka vaik lawm mai ka krax hot sibawm heue. 13 Cao jhai khankix mawh bhaung, kheu ang gumlox Siyiex koe ka daux kix, awm pa sidiex kix tak lih mawh piang kix heue. 14 Mawh kheu nan, Siyiex Cao kru naing raoma ah nin, mawh kheu jao sikah kix lox in, jhak heue, Aux tak kieh gumlox sikah Aux khankix awm ngu ka daux jheeh pex mai ceu pui in tak mawh khix mai an tak gleeing ka kix heue. 15 Siyiex ah nin, “Ceu pui Isarelax khankix eue, jhak heue, Aux tak sang viex ceu pui tix cub hoek khaing ka dee pa kied singai tix puing kix ka pex mawh ceu pui pa kied ting riang mai mawh ceu pui pa dawk koe tom dixdix, mawh pui ang pex tawng lox sikah kix mai ang tawng ka ceu pa krai kix heue. 16 Te cie kix awm daux simeeig pa paoh ti deuh mai kix mawh pui pa kied ting riang rao khawmuik heue. 17 Kix tak teei ti ih plix nghox plix koi can pa vawg maix mai khawm blah pa sang ih kawn simex kawn bun maix ka. Kix tak teei ti ih cub yung cub mawie maix khankix, kix tak ih nhu plix siiet khawm gawng khaox ruh maix, kix tak yuh veng pa kaux cong pa een maix rhawm tix ka laux leeing ka vaig heue. 18 Siyiex ah nin, “Viang yuh ka mawx kawx, ka daux singaix an, Aux tak ang nyang yuh krax laux leeing ka maix, tom grum naog heue.” 19 Pui khankix ah nin, “Siyiex pa mawh Siyiex ex, lai yuh ceu in khankix piang ex kheu jao patix lie? Khaix an maix tak deeh pawk ah nin ka kix, mawh kheu tik vud pex ka Aux mai hu yuh kaing son siyiex pui tang kaux tang hak ka daux haktiex cao tix, mawh kheu nan maix tak yuh kaing son pui tang praix klawng ka daux haktiex, pa ang mawh cie maix heue. 20 Krai pao ka ceu in ka nyiex ma ceu pui Yakop mai ka haktiex Yudax ah nin, 21 Pui caox caig mai pa ang koe krax tawng yung khankix eue, koe ngai ang chix yaox mai koe yhaok ang chix mhong heue.Ref 5:21 Isa 6:9-10; Yez 12:2; Mat 13:10-15; Mak 8:17-18 22 Siyiex ah nin, “Ang maix lhat ka Aux lie? ang maix koe pa sikua rhawm plak sivoe ngai Aux, pa hoik tawm lox tix gum mai kieh mhaik khankix mawh vie lawng ka rawm sigrit sigra, son ang an pon tiang tix hu ka plak toi an leeing ju lie? Viang puk pak rawm khankix pukpak miex ding kawx mai ang chix pex ka heue. Viang kix sinum siaox miex ding kawx, kix ang pon jao piang an heue.Ref 5:22 Job 38:8-11 23 Mawh kheu ceu pui in khankix koe rhawm chix lud chix feen mai kix ca tieh feen jheung jheung heue.” 24 Kix ang sax ah nin ka daux rhawm tix, “Kieh ex lhat graung ka Siyiex pa mawh Siyiex ex, pa tawx rawm lhiex cao mai rawm lhiex lha tau mai bawg yam praix klawng heue. Nawh Cao pon ti deuh bawg yam vang twah vawg nghox khankix son ex heue.” 25 Krax lud pex khankix hoik plak ti tik ceu in khankix luan mai phimap pex khankix hoik tiebtie ceu pa mhawm khankix khaing pex heue. 26 Grawh grawng nawh, Aux yaox pui pa caox caig ka sinax pui Aux khankix heue, kix jawm tix pau pui pa taong jhawk, sonsang taong ti giex pui khankix ka heue. 27 Awm naog sim daux grau, nyiex kix kawx mawh pa naog ka ceu pie lhen heue. Mawh kheu nan, kix hoik ting lhaong mai haok hwan ka krax pa magmi heue. 28 Kix hoik kluing mai plang ngai baoh, mawh heue. Kix baox nie lheu yuh kaing pa caox caig, kix ang prawng rahsee ka grawh grawng pui pa ang koe miex keeing khankix. Viang yuh nan kawx, kix ca kawn koe krax hwan mai kix ang tiebtie ka pa khaw caw pui pa cud cha khankix tix pon ka heue. 29 Siyiex ah nin, mawh ang Aux khaw ti tawx krax pa kham geu ka kix, son grawng ceu in lie? Mawh ang Aux khaw tix deeh pawk bix ka kix tom fah rhawm tix ka kix lie? 30 Krax pa daox deng mai pa kied lhat graung, ceu pa seeing brai mawh pa lih ti koe ka daux haktiex, 31 cao jhai khankix ah lox jhai pa ang mawh ang meh mai cao giex kaing li khankix kawx rieb ti teei ka sibrawm pa kwang tix mai pui Aux khankix kawx khaw rhawm ka ceu an awm paox tix heue. Yam sidah ceu an khankix pex tak sang yuh ka mawx lie?