1 Pex pa mawh kawn praix Benyamin khankix eue, khrawm paox pex to khaing sigreung veng Yerusaliem sonsang glawd tix heue, phlu teettawng ka daux yaong Tekaw mai yaog ti deuh rong ngu mhai rug ka daux yaong Biethararim, mawh kheu pa caox caig mai khawm krax laux leeing pa kied ting lhaong hoek khaing plak laong heue. 2 Aux sang yuh ka kawn bun Zion pa kied mhawm grang mai pa awn kaux hak khankix laux heue. 3 Cao liang yung mai yung khankix, tak hoek bleeh ka nawh. Kix tak sum nyiex gox tix plak hawt vung viang nawh khawmuik. Kix tang kuah tix ih dee ot pui mawx pui an heue. 4 Khre rien tix mai yuh naing ka nawh, kaoh mai kieh ex haok puing ka nawh yam jung singaix heue. Krax laux rhawm hoik koe ka ex, kheu hoik klip singaix, mawh kheu kied lang veei ponbo heue. 5 Kaoh mai kieh ex haok puing plak ponsawm mai kieh ex hu yuh nyiex haw simiang khankix laux leeing heue. 6 Grawh grawng nawh, Siyiex Cao kru naing raoma ah nin, “Kid ti tik ka khaox an khankix mai yuh guh tiex ka plak toi veng Yerusaliem heue. In mawh veng pa sang pon krax pa sidiex gau heue. Ka daux nawh hoik naog ka ceu pa yeen ya khaing heue. 7 Awm mhawm lih rawm keut khaing daux tix, veng an kawx ceu pa caox caig lih khaing nawh. Ex mhong grawng pa tud rhim mai pa kied kin khaing daux nawh. Ka plak sivoe Aux koe ngie krax saux ngia mai krax mat lheet jheung jheung heue. 8 Veng Yerusaliem eue, rieb ti teei ka pa sidiex gau, phan ang mawh nan, khwan Aux tak lih hu khaing maix, Aux tak kieh dee ot maix yiien mai mawh haktiex dee ang pui ot ka heue.” 9 Siyiex Cao kru naing raoma ah nin, “Kix tak mawh pa pieh tix khawmuik awm plix siiet pa kawn deuk khaing nhu tix, ka pui Isarelax pa kawn deuk khankix kawx tak pieh awm an heue. Baox teei taix maix pieh ka hawt kak khankix awm pui pa khrawm ka plix siiet heue.” 10 Sonsang nghiet kix lox tawx Aux satix, Aux sang krai ka pui mawx lie? Yhaok kix mawh yhaok pa ang nyang pat hak mai kix ang nghiet heue. Jhak heue, gumlox Siyiex mawh ceu pa sibriem kix ka mai kix ang gaux rhawm ka daux an heue. 11 Mawh kheu nan, krax pa meet rhawm Siyiex hoik naog ka daux aux heue. Aux taug mao ka giex tix an heue. “Aux tak klup an lih piang kawn nyawm pa ot daux krax mai piang pui awn ju pa kraix khrawm tix tau heue. Grawh grawng nawh, mex moeng khawm ra tak teei tix hu tau, khawm pui riex ju pa koe tau mai nawh khankix heue. 12 Siyiex ah nin, nyiex kix tak loe tix ka pui tang kaux tau mai ma kaung mai moeng kix khankix heue. Grawh grawng nawh, Aux tak nyeu taix tix mai tawx krax kham krax geu piang pui pa ot ka daux haktiex an khankix heue.”Ref 6:12-15 Ye 8:10-12 13 “Grawh grawng nawh, jah ka pui iak tom hoek ka pui ting khawmuik, kix ku kaux hoik ghoing ka sinngao pa ang rahsee heue. Jah ka cao jhai tom hoek ka cao giex kaing li khankix, kix ku kaux yuh pa lud loe heue. 14 Kix hoik pai dee saux kawn bun ceu pui Aux khankix ceeix khaing ah nin, ‘Yam ang lai koe pa nhim, kix ah pa nhim,Ref 6:14 Yez 13:10 pa nhim,’ 15 Siyiex ah nin, “Mawh hoik kaig kix khaix yuh tix ka ceu pa seeing brai lie? Ang mawh, kix pon ang koe krax kaig ceeix kawx, mai kix ang tawng tix laux pakngai heue. Mawh kheu nan, kix tak goh piang paox tix, tix kaux lai tix kaux, yam tawx Aux krax kham krax geu ka kix mai kix tak hoek ka daux pa yeen kix tiem heue. 16 Siyiex ah nin, “Cung ka daux krax mai jhak ti yaox mai chawk ka krax prim an, ka dee koe krax pa mhawm mai lawng hu ka daux krax an heue. Khaix an ju pex tak yaox dee laux lee tix heue. Viang mawh nan kix ah nin, ‘Ex tak ang lawng hu ka daux krax an heue.’ 17 Aux deuh pui pau yam khankix piang pex ah nin, ‘Nghiet ka lox teettawng,’ viang mawh nan, kix ah nin, ‘Yix ang nghiet heue.’ 18 Mawh kheu nan, pex pa mawh ceu pui tang ceu khankix eue, nghiet heue, cub pui hun khankix eue, kieh tawng ka ceu pa koe piang kix heue. 19 Pui haktiex khankix eue, nghiet mai jhak heue, Aux tak viex krax pa ting kha rhawm hoek piang ceu pui in awm plix simie pa keud kix khankix heue. Mawh kheu ang kix nghiet ka gumlox Aux mai thiang ti tik ka lox tat jhawm prawng Aux khankix heue. 20 Pex lai viex Lawpan khaing haktiex Shebax mai ox mex pa tie khaing haktiex pa kied singai, khankix hoek ka Aux yuh ka mawx lie? Krax tan pa gleeing pex ang lai rieb mai krax tan pa appong pa nyawm cie pex kawx Aux ang lai khaw rhawm ka heue.” 21 Mawh kheu nan, Siyiex ah nin, “Jhak heue, Aux tak sang deuh ceu pa sideeing khankix ka plak sivoe ceu pui in, keeing mai kawn tak goh piang an tau, paox plawg mai paox grawm nawh khankix tak laux leeing tau heue.” 22 Siyiex ah nin, “Jhak heue, ceu pui tix cub tak sang hoek khaing haktiex plak laong mai ceu pui pa kied ting tix ceu tak yaog ti kaoh khaing tom dee die haktiex heue. 23 Kix tak sang giex ak mai pliah; kix mawh pui pa lang teung ca nyhau mai ang koe krax caux rhawm mai lox sikah kix siaox sinum awm rawm sigrit sigra, kawn bun Zion eue, kix brug brung hoek awm pui naing khankix pa hoik khre tix hoek puing ka pex heue.” 24 Ex hoik mhong ka grawh grawng satang an mai taix ex kawx awn riang ka heue. Krax kha rhawm hoik giex piang ex awm saux bun keh heue. 25 Paw hu ka daux kaung mai paw hu ka daux krax. Mawh kheu koe vaig pui koeng, pa lhat graung ku plak heue. 26 Kawn bun ceu pui Aux khankix eue, ceep ka chee rhix mai lu lieh tix ka daux nyaox heue. Kieh yiiem awm yiiem ka yum kawn simex tix kaux mai koe pa kied khi rhawm ka heue. Grawh grawng nawh, pui tud rhim tak hoek sijaox ka ex heue. 27 Aux hoik deuh maix mawh cao ciied awm nyiex tab lhaong tix mu ka sinax ceu pui Aux, sonsang ciied maix tix tawng daux krax hu kix heue. 28 Kix mawh pui pa kied tieh feen pa chix coh lox sikah khawmuik heue. Kix mawh tawng lheung mai rhiem giex going mai mawh pa yuh laux leeing heue. 29 Jhauh hoik phlu bhaung lih sigrien sigre, sivun kawx hoik rawm ka ngu, cao pa raug pa ciied kawx mawh pa giex going heue. Grawh grawng nawh, ceu pa caox caig ang pon bluh lih heue. 30 Pui khankix tak kok kix mawh pa hoik tik pui ka, kheu jao hoik tik Siyiex ka kix heue.”