1 Siyiex ah nin, “Ceu pui Isarelax eue, phan maix sang deeh hoek, deeh hoek ka Aux heue. Phan maix koe rhawm ti sang tik pa seeing brai tix khankix luan singai khaing daux ngai Aux, khaix an paw lai gah ti hu khaing Aux heue. 2 Maix tak tiextu ti ah nin, ‘Awm im ju Siyiex,’ ka daux krax pa mawh meh mai ka daux krax prawng ca mai ka daux krax pa rahsee, ceu pui khankix tak nawb bwan ka daux Nawh Cao mai kix tak yaw rangdi ka daux Nawh Cao heue.” 3 Mawh kheu Siyiex ah nin ka pui haktiex meung Yudax mai pui veng Yerusaliem khankix “Thai ka kaung pex mai paw ruat simie sinax pang kat khankix heue.Ref 4:3 Ho 10:12 4 Pex pa mawh pui haktiex meung Yudax mai pui ot ka daux veng Yerusaliem khankix eue, pat doeh hak cao maix son Siyiex mai pat ti tik toeh hak rhawm pex heue. Phan ang yuh nan, krax pa song rhawm Aux tak lih hoek awm ngu mai gleeing tom ang pui tix kaux kawx pon preet ka, mawh kheu ceu pa caox caig yuh pex khankix heue.”

5 Krai pao ka daux haktiex meung Yudax mai pao kok yo ka daux veng Yerusaliem ah nin, “Phlu teettawng ka daux haktiex Yudax, kok yo lox tix mai kieh pui tawng pa ah nin, khrawm paox tix kieh ex hu laig ka daux veng pa kaux cong khankix heue.” 6 Jung ti deuh chix piang gawng Zion, nied ti to hu sonsang glawd, paw lai kaok lai cung, grawh grawng nawh, Aux tak sang viex pa laux leeing hoek khaing plak laong mai khawm pa laux leeing ting lhaong heue.” 7 Sivai sangsi hoik lih khaing daux yeem ot tix mai pui pa sang yuh krax laux leeing haktiex khankix, hoik hoek hawt krax. Nawh hoik lih khaing dee ot tix, sonsang yuh haktiex ot maix mawh pa yiien hu pui ka heue. Veng pex khankix tak mawh pa hoik laux leeing tom ang pui pa ot lai koe ka heue. 8 Mawh kheu grawng in, ceep ka kraung chee rhix mai yiiem riag yo ka heue. Grawh grawng nawh, krax pa kied song rhawm Siyiex ang nyang bax luan hu khaing ex heue.” 9 Siyiex ah nin, “Ceu pa tak sang lih ti mawh singaix yam an, rhawm simiang mai rhawm cub simiang greem nawh khankix tak sang laux hu heue. Cao giex kaing li khankix tak daox deng mai cao jhai khankix tak daox deng ka heue. 10 Khaix an aux deeh ah nin, “Siyiex eue, Maix Cao hoik pie lhen ka pui veng mai Yerusaliem tete, viang maix hoik ah nin, ‘Pex tak koe pa nhim rhawm,’ tom hoik krox gawn ka sok rhawm heue.” 11 Ka daux bawg yam an, tak ah ka pui in kix mai ka pui veng Yerusaliem khankix heue. “Bhaung pa hax khaing dee lhaong tak phlu hu ka daux tiag ka plak see kawn bun pui aux khankix mai ang mawh bhaung pa sang vi sang boe mai ang mawh bhaung pa sang yuh singax heue. 12 Bhaung pa kied ting riang khaing an, tak hoek ka sonsang yuh alo Aux naok heue. Yam an Aux tak sang chawk cheng mai prawng ca piang kix heue. 13 Nawh tak sang hoek bleeh awm paiawm mai ling lawx naing nawh khankix tak mawh pa awm keu kang lux tix mu heue. Bhaung Nawh khankix mawh pa nie lheu phai khaing klang krih an heue. 14 “Veng Yerusaliem eue, kieh rhawm maix luan khaing ceu pa caox caig, sonsang pon maix tix hoek krax taoh. kawn sang kieh maix krax pa caox khankix ot ka daux rhawm tix been miex greeng lie?” 15 Grawh grawng nawh, lox pa pao tix gum, kaoh khaing haktiex Dan mai krai grawng pa kha rhawm khaing gawng Epharem, 16 tawx satix ka pui haktiex an mai krai pao piang veng Yerusaliem, cao pau veng khankix hoek khaing haktiex pa kied singai mai yo lox tix lih piang veng haktiex Yudax heue. 17 Kix hoik vung viang ka haktiex Yudax awm cao pa pau ka kaung heue. Grawh grawng nawh, haktiex an, hoik tieh feen ka aux, Siyiex ah nan heue. 18 Daux krax maix mai grawng pa yuh maix, hoik kieh ceu in hoek piang maix heue. In mawh grawng pa caox caig cie maix heue. Grawh grawng nawh, an mawh ceu pa kied song kied saik ka rhawm maix kheu grawng hoek an ka daux rhawm maix heue.”

19 Khwan ju aux eue, khwan ju aux eue, Aux hoik kied saux rhawm teeg rhawm tete, rhawm aux hoik kied si aoh ka daux aux. Aux ang lai pon ot yiien yawg tix, khwan ju aux eue, grawh grawng nawh maix hoik mhong ka lox sinum teettawng mai lox sinum naing heue. 20 Riag yo lox ti ah nin, krax pa laux leeing piang pa laux leeing, haktiex khawmuik khawm leeing mawh pa hoik laux leeing heue. Nyiex gox aux khankix kawx hoik laux leeing sijaox mai man tieb aux khankix mawh pa hoik laux leeing dom mawx dom an heue. 21 Aux tak sang pon yaox ka chix an mai mhong ka lox sinum teettawng khankix reung been miex greeng lie? 22 Grawh grawng nawh, pui Aux khankix mawh pa daox pa aw mai kix ang tawng ka Aux heue. Kix mawh kawn nyawm pa ang koe rhawm keut mai kix ang koe krax tawng yung, kix koe cuyi tix sang yuh pa caox, viang mawh nan, kix ang tawng ti yuh ceu pa mhawm heue. 23 Aux jhak ti yaox ka haktiex hoik yi mai ang lai koe tidtix heue. Aux deeh jhak ti yaox ka raoma khankix mai ang koe pa riang heue. 24 Aux jhak ti yaox gawng khankix mai kix hoik siyaung mai ton khankix khawmuik hoik yung yang heue. 25 Aux jhak ti yaox mai ang lai yaox pui tix kaux kawx mai sim raoma khankix khawmuik hoik to luan heue. 26 Aux jhak ti yaox, haktiex pa naok ka plix haoh hun hoik lih mawh daux tiagtu heue. Veng khankix khawmuik hoik grup hoik laux, ka plak sivoe ngai Siyiex, kheu krax pa kied song rhawm Nawh Cao heue. 27 Mawh kheu Siyiex ah nin, “Haktiex khawmuik tak mawh pa laux leeing heue. Viang mawh nan, Aux tak ang yuh laux khawmuik heue. 28 Son grawng in, haktiex tak koe krax pa ngia ka mai raoma tak lung vaik kheu lox pa hoik ah Aux mai rhawm pa hoik keut Aux mai, Aux ang lai deeh chix tieh chix loh rhawm khaing an heue.” 29 Pui veng khankix khawmuik tak to tix lih hu, mawh kheu mhong ka lox sinum pui naing brung mai pui naing ak khankix, kix to daux tiag mai haok piang rang khankix heue. Veng ku veng tak mawh pa hoik tik vud tix mai ang lai koe pui pa ot ka daux veng tix kaux kawx heue. 30 Yam hoek ceu pa laux leeing ka maix, mawh sang yuh maix ka mawx? Viang maix ceep ka kraung pa raoh kawx mai viang maix jawg tokaux tix ka kraung khri kawx, viang mai kraix ngai tix ka sidah awt kawx, pa yuh maix grang tix an mawh pa giex going heue. Paox moh maix khankix tak seeing ka maix mai tak sang sawk ti teei ju maix yum heue. 31 Mawh kheu Aux hoik mhong lox pa awm lox ngia bun keh pa ang sax keh kawn tix mai lox ngia pa saux nawh awm bun pa liang ti keh kawn tix, awm an lox yo kawn bun veng Zion ka daux pa ngia nawh pa neh taix tix ah nin, “Aux koe krax kha rhawm yam in heue. Aux kied koe krax pa laux rhawm kheu jao grawng cao pa pah pui khankix heue.”