1 Lox hoek ka Yeramix son grawng pa dex dawd mai pui meung Yudax khawmuik, baux num kwang simiang Yehoyakim kawn simex Yosiyax Simiang Yudax pon num tix num, pa hoik mawh baux num jah Nebukhaneza Simiang Babulon ti kwang ka haktiex.Ref 25:1 2Sim 24:1; 2Been 36:5-7; Dan 1:1-2 2 Cao jhai Yeramix krai lox ka pui pa ot haktiex Yudax mai ka pui ot ka daux veng Yerusaliem khawmuik ah nin, 3 “Jah khaing num hoik kwang Yosiyax kawn simex Amon simiang meung Yudax kao loe num tix num, tom hoek ka daux in singaix, ka daux tixnga loe num in, awm hoik hoek gumlox Siyiex ka aux mai aux hoik krai lox inkix ka pex yam kaoh tix caocao, viang mawh nan, pex ang nghiet heue. 4 Siyiex kaoh caocao mai ploi kawncau tix khankix pa mawh cao jhai hu ka pex lawxlawx, viang mawh nan, pex ang nghiet mai ang veeh yhaok tix sonsang mhong ka heue.” 5 Kix ah nin, “Deeh veeh khaing pa caox mai kaing pa caox yuh pex ku kaux mai ot ka daux haktiex pa hoik tawx Siyiex ka pex mai ka keeing pex khankix leeing ju heue.” 6 “Paw hawt siyiex tang kaux tang hak, paw yuh kaing jhaw kix, paw krub ka kix mai paw so Aux song rhawm ka kaing taix yuh pex, mai Aux tak ang lai yuh krax kha rhawm ka pex heue. 7 Siyiex ah nin, “Viang krai yuh nan kawx, pex ang nghiet ka Aux, mawh kheu so pex Aux song rhawm ka kaing taix yuh tix, sonsang baox krax kha rhawm cao tix heue. 8 Mawh kheu nan, Siyiex Cao kru naing raoma ah nin, mawh kheu ang pex nghiet ka gumlox Aux, 9 jhak heue, Aux tak sang ploi mai teei nyiex ma pui khaing plak laong mai kawncau Aux Nebukhaneza simiang Babulon mai viex kix hoek puing ka daux haktiex in, ka pui pa ot ka daux nawh mai ka ceu pui pa ot hawt vung viang nawh khawmuik mai tak yuh kix laux lak pak leeing mai kieh kix koe pa daox deng mai lox pa sibriem mai dee pa yiien pui sijheeng heue. 10 Lheu khaing an, Aux tak kieh lox nyawm rhawm, lox gaux rhawm, lox sinaw, lox bunkrih yuh ka paox, lox sinum krid mhaw mai pa riang kawk ngu yeet grai khaing kix heue.Ref 25:10 Ye 7:34, 16:9; Jhi 18:22-23 11 Haktiex in khawmuik khawm leeing, tak sang mawh dee yiien pui mai ceu pa daox deng ka mai ceu pui in khankix tak yuh kaing jhaw simiang Babulon atixgliah num heue.Ref 25:11 2Been 36:21; Ye 29:10; Dan 9:2 12 Khaix hoik grum naog atixgliah num, Aux tak sang ciyang ka Simiang Babulon mai haktiex pui Khaladie khankix, kheu pa lud kix mai Aux tak kieh dee an mawh pa yiien pui sijheeng, Siyiex ah nan heue. 13 Aux tak kieh gumlox Aux khawmuik, pa hoik krai pao Aux piang nawh, can pa hoik tiem ka daux phuk lai in khawmuik mai pa hoik jhai Yeramix son grawng pa dex dawd mai ceu pui meung an khawmuik hoek piang haktiex an heue. 14 Ceu pui tom nie mai simiang pa kied ting lhaong khankix, tak sang kieh ceu pui Khaladie yuh siliex cawng ka son tix mai Aux tak deeh pawk bix ka kix awm kaing caox pa hoik yuh kix heue.”

15 15 Ref 25:15: Ye 51:7; Jhi 14:8,10; 16:19; 17:4; 18:3Siyiex, pa mawh Siyiex ceu pui Isarelax ah nin ka aux, “Teei kawk rawm plix siiet krax meet rhawm in khaing daux tawm taix Aux mai kieh ceu pui pa ploi Aux maix hu ka khawmuik nyaux heue. 16 Kix tak nyaux mai tutiex awm pui yhot, kheu vaig lawm pa sang ploi Aux hoek ka sinax kix heue. 17 Khaix an aux teei kawk nyaux khaing daux tawm taix Siyiex mai tawx ceu pui khankix nyaux, ka pui pa hoik ploi Siyiex aux hu ka, 18 pa mawh pui veng Yerusaliem mai pui veng meung Yudax mai simiang mai cub cao kaing, kieh dee an mawh dee yiien pui, dee pa daox deng mai dee koe lox sibriem mai lox jhax lawg awm pa koe ka daux in singaix, 19 khawm Pharaw simiang Ejiptux mai kawncau nawh khankix mai cao kaing nawh khankix mai pui nawh khawmuik, 20 mai pui tang ceu pa khon tix ot tau mai kix khawmuik, Simiang haktiex Uzax khankix, simiang haktiex Philitix khankix pa kok mawh ceu pui haktiex Ashakelon, pui haktiex Gaza, pui haktiex Ekaron mai pui pa kawn deuk khaing haktiex Ashadok khankix, 21 pui haktiex Edom, pui haktiex Mawbax mai pui haktiex Amon khankix, 22 simiang haktiex Turux khankix, simiang Sidon khankix mai simiang pa ot praok toi rawm sigrit sigra khankix, 23 pui haktiex Dedan, pui haktiex Tema, pui haktiex Buza mai ceu pui haktiex pa khlao hauk daog kaing tix khankix, 24 simiang Arebiyax khankix mai simiang pui tang ceu pa khon tix ot ka daux tiag khankix, 25 simiang Zimrix khankix mai simiang pui tang ceu pa khon tix ot ka daux tiag khankix, 26 simiang haktiex plak laong khankix, dee singai dee dex mai paox tix, tix kaux lai tix kaux, can meung pa koe piang ca haktiex khawmuik nyaux ka mai simiang haktiex Sheshiet tak baox nyaux khaix kix heue. 27 Mawh kheu nan maix tak ah nin ka kix, Siyiex Cao kru naing raoma, pa mawh Siyiex ceu pui Isarelax ah nin, nyaux heue, nyaux tom yoek mai hao, goh mai paw lai kaoh khaix in tix bawg kawx, kheu vaig lawm pa ploi Aux hoek ka sinax pex. 28 Phan kix thiang tix ang teei kawk an khaing daux taix maix sonsang nyaux ka maix tak ah nin ka kix, Siyiex Cao kru naing raoma ah nin, pex tak caw tix nyaux tete heue. 29 Grawh grawng nawh, jhak heue, Aux jah tix viex krax kha rhawm hoek piang veng, pa hoik kok ka ceu kaux Aux mai mawh pex pa ang pon krax ciyang pak lawg lie? pex tak ang mawh pa pon luan khaing pa ciyang heue. Grawh grawng nawh, Aux tak sang kok vaig lawm tix kre hoek piang can pui pa ot piang ca haktiex khawmuik, Siyiex Cao kru naing raoma ah nin heue. 30 Mawh kheu nan, krai lox jhai pa tieh feen in khawmuik ka kix, Siyiex kok yo lox sinum khaing dee lhaong mai ah lox lih khaing dee ot pa singax singeh Nawh Cao, Nawh Cao kok yo lox sinum pa kied ting piang dee ot Nawh Cao heue. Nawh Cao tak riag yo lox tix awm riag yo pui dig plix siiet, ka pui pa ot piang haktiex khawmuik heue. 31 Lox pa sinum tak sang tah hoek ka dee sidah sidu haktiex. Grawh grawng nawh, Siyiex tak sang simah tau mai ceu pui khankix, Nawh Cao tak prawng ca ka can pa koe nex nham khawmuik. Nawh Cao tak sang ap pui pa caox caig ka lawm vaig, Siyiex ah nin heue. 32 Siyiex Cao kru naing raoma ah nin, Jhak heue, krax kha rhawm tak sang lih hoek khaing haktiex tix meung hoik tix meung mai bhaung keukanglux pa kied kin ting tak taih khaing sidah sidu haktiex heue. 33 Ka daux singaix an, krax pa pah Siyiex tak sang koe, jah khaing dee sidah haktiex plak in tom hoek ka dee sidah haktiex plak an heue. Tak ang lai koe pa yiiem doe kix mai pa deeh khrawm kix mai pa sipaung kix, kix tak sang mawh aing pa seeing brai piang tiex heue. 34 Cao pa liang yung khankix eue, yiiem grai riag yo heue. Pex pa mawh cao thong cao bung ka cub phung yung khankix eue, lu lieh pex ka daux nyaox. Grawh grawng nawh, bawg yam singaix pa sang pah ka pex mai singaix pa sang prung prang rairuat pex hoik grum hoik naog; pex tak sang goh awm kawn yung mhaing pa mhawm kluing tix mu heue. 35 Cao liang yung khankix tak ang lai koe krax to mai cao thong bung phung yung khankix tak ang koe krax glawd heue. 36 Nghiet ka lox riag yo cao liang yung mai lox yiiem grai cao thong bung phung yung khankix, mawh kheu Siyiex hoik yieh laux ka gwang rib sawm kix heue. 37 Kheu jao pa kied kin song rhawm Siyiex mai kawg yung pa koe krax nhim hoik yiien hu heue. 38 Nawh Cao hoik prah dee laux tix awm sivai sangsi awn ju, haktiex hoik mawh dee yiien pui, kheu jao kied kin pui pa yeen ya piang kix mai jao pa kied kin krax song rhawm Nawh Cao heue.