1 Yam jah simiang Yehoyakim, kawn simex Yosiyax, simiang meung Yudax ti kwang ka haktiex, gumlox hoek khaing Siyiex ah nin,Ref 26:1 2Sim 23:36-24:6; 2Been 36:5-7 2 Siyiex ah nin, “Cung ka brawk nyiex bwan Siyiex mai krai ka pui veng Yudax khankix, pa hoek tix krub ka daux nyiex bwan Siyiex, can gumlox tawm Aux maix krai ka kix khawmuik, paw mox ka gumlox an pie tix gum kawx. 3 Pui ku kaux tee sang nghiet mai tee veeh khaing krax pa caox caig tix, sonsang doh keud Aux, ka grawng pa dex mai pa kha rhawm, pa keud Aux tix sang viex hoek piang kix, kheu jao pa caox caig yuh kix, 4 maix tak ah nin ka kix, Siyiex ah nin, ‘Phan pex ang nghiet ka Aux mai ang hawt lox tat jhawm prawng pa deuh Aux ka plak sivoe pex, 5 awm ang pex nghiet lox kawncau cao jhai Aux khankix pa ploi Aux hoek ka pex lawxlawx mai yam in phan pex ang nghiet ka, 6 Aux tak kieh nyiex bwan in awm Shilaw mai tak kieh veng in mawh dee jhax lawg ceu pui piang haktiex khawmuik.”Ref 26:6 Josh 18:1; Ps 78:60; Ye 7:12-14 7 Mawh kheu nan cao giex kaing li, cao jhai mawh pui hun khankix, hoik mhong gumlox krai Yeramix inkix ka daux nyiex bwan Siyiex heue. 8 Yam hoik naox Yeramix ka lox krai tix pa hoik tawm Siyiex nawh krai ka pui khankix, cao giex kaing li, cao jhai mai pui hun khankix giex ka nawh ah nin, Maix tak caw tix yum tete heue. 9 Maix chix nab krai lox jhai ka daux ceu kaux Siyiex ah nin, nyiex bwan in tak sang awm yaong Shilaw mai veng in tak sang mawh dee pa yiien pui mai pa ang pui lai ot ka pie tix kaux kawx, kheu jao pa yuh ka mawx lie?” mai pui hun khrawm paox tix hoek ka Yeramix, ka daux nyiex bwan Simiang Siyiex heue. 10 Yam hoik mhong cao kaing meung Yudax khankix ka ceu inkix mai kix kaoh khaing daux nyiex haw mai hoek bleeh ka nyiex bwan Siyiex mai ngawm ka daux diang siviex khraox nyiex bwan Siyiex heue. 11 Cao gaix kaing li mai cao jhai khankix hoik krai lox ka cao kaing mai ka pui hun khankix ah nin, pui in keung ti yum heue. Mawh kheu nawh hoik krai lox jhai pa tieh feen piang veng in, awm hoik mhong pex nawh ka yhaok ti heue. 12 Khaix an Yeramix krai ka cao kaing mai ka pui hun khankix ah nin, “Siyiex hoik ploi aux krai lox jhai inkix piang nyiex bwan in mai piang veng in, ka gumlox sikah, pa hoik mhong pex khawmuik heue. 13 Mawh kheu nan, yam in deeh tieh loh krax hu pex mai krax pa yuh pex khankix mai cu nghiet ka lox Siyiex pex heue. Khaix an Siyiex tak deeh doh keud grawng pa dex dawd mai pa hoik krai pao Nawh Cao tix sang ciyang ka pex heue. 14 Phan mawh aux, aux hoik koe ka daux tawm taix pex, yuh krax pa yaogyaw pex mawh ceu pa mhawm mai pa khaw caw ka pex piang aux heue. 15 Viang mawh nan, priex tix tawng tom kriem, phan pex hoik pah aux yum, pex tak kieh nham pui pa ang koe map grham hoek piang tokaux cao tix tete mai ka veng in khawm pui pa ot ka daux veng khankix, mawh kheu Siyiex hoik ploi Aux hoek ka pex tete mai krai gumlox in kix khawmuik sonsang mhong pex nawh ka yhaok tix heue. 16 Mawh kheu nan, cao kaing mai pui hun khankix ah nin ka cao giex kaing li mai ka cao jhai khankix, “Pui in ang keung tix yum heue. Mawh kheu nawh hoik krai ka ex ka daux ceu kaux Siyiex pa mawh Siyiex ex heue.” 17 Khaix an kuad song haktiex khankix tiblah, yaog ti kaoh mai krai ka cub pui hun bang kum khankix ah nin, 18 “Mikha pui yaong Moreshiet hoik gruh krai lox jhai ka daux baux ju singaix Hezakiyax simiang meung Yudax mai krai ka pui haktiex Yudax khankix ka daux pa ah nin, Siyiex Cao kru naing raoma ah nin, Ref 26:18 Mi 3:12 gawng Zion tak thai ti awm gwang kaung, veng Yerusaliem tak sang mawh pum tiex khankix mai gawng nyiex bwan kawx tak sang awm nong yu heue.” 19 Mawh hoik pah Hezakiyax simiang meung Yudax mai pui Yudax khankix nawh yum lie? Mawh ang Hezakiyax lhat graung ka Siyiex mai khyox khaw tix ka sivoe ngai Siyiex lie? Siyiex hoik deeh doh keud ka grawng pa dex dawd pa hoik krai pao Nawh Cao tix sang ciyang piang kix. Viang mawh nan, ex kawn ca yuh ceu pa caox pa kied ting piang tokaux tix heue. 20 Kawn koe pui tix kaux, pa gruh krai lox jhai ka daux ceu kaux Siyiex, pa mawh Uriyax kawn simex Shemayax pui veng Kiriyat Yarim, pa hoik gruh krai lox jhai sonsang ciyang ka veng in mai ka haktiex in, awm gumlox krai Yeramix khawmuik heue. 21 Yam hoik mhong simiang Yehoyakim tau mai pui ting riang rao nawh mai cao kaing khankix ka gumlox an, simiang sawg tix sang pah nawh yum heue. Yam hoik mhong Uriyax ka an nawh hoik lhat graung mai yaog tix to hu ka meung Ejiptux heue. 22 Khaix an simiang Yehoyakim ploi pui hu ka meung Ejiptux, pa mawh Elanatan kawn simex Akhabo mai pui tang kaux, pa hu tau mai nawh ka meung Ejiptux heue. 23 Kix deeh viex Uriyax ing khaing meung Ejiptux mai viex nawh hoek ka simiang Yehoyakim, khaix an simiang pah nawh ka vaig mai tik tokaux yum nawh ka daux simeeig pui hot shia heue. 24 Viang mawh nan, plawng taix Ahikam kawn simex Shephan kawn teem ka Yeramix, son ang sang ap nawh ka daux tawm taix pui khankix pa sang pah nawh yum heue.”