1 Siyiex jhi Aux yaox ka khrawng plix ruh ra mu pa deuh ka plak sivoe nyiex bwan Siyiex, khaix hoik teei Nebukhaneza simiang veng Babulon Yekhonix kawn simex Yehoyakim, simiang meung Yudax mai cub cao kaing Yudax khankix mai cao pa chix kaing taix mai pa chix kaing kaing khaox, kaing rhiem khankix hu mawh pui pa giex laung khaing veng Yerusaliem mai rhim kix hu ka veng Babulon khawmuik heue.Ref 24:1 2Sim 24:12-16; 2Been 36:10 2 Ka daux khrawng tix mu koe plix ruh pa kied mhawm awm plix ruh pa teem phao voe mai ka daux khrawng an tang mu, hoik koe plix ruh pa kied laux pa ang lai chix ih ka heue. 3 Khaix an Siyiex chawk ah nin ka aux, “Yeramix eue, yaox maix ceu patix?” Aux ah nin, “Aux yaox plix ruh, plix pa mhawm khankix kawx kieh mhawm mai pa laux kawx kied laux tom ang lai chix ih ka heue.” 4 Gumlox Siyiex baox hoek ka aux ah nin, 5 “Siyiex pa mawh Siyiex ceu pui Isarelax ah nin, pui pa hoik ploi Aux mawh pa giex laung, khaing meung Yudax, Aux tak sang deuh tix tawng, kix awm plix ruh pa mhawm mai kieh kix mhawm ka daux haktiex pui Khaladie heue. 6 Grawh grawng nawh, Aux tak sang kia ngien piang kix mai kieh kix pon bwanson pa mhawm mai Aux tak sang deeh viex kix hoek ka haktiex in mai Aux tak sang pang kix mai ang lai yieh kix laux, aux tak sang sum kix mai ang lai reeig ka kix heue. 7 Khaix an Aux tak sang tawx rhawm pa tawng kix ka Aux mai grawng mawh Aux Siyiex, kix tak sang mawh pui Aux mai Aux tak sang mawh Siyiex kix, grawh grawng nawh, kix tak sang deeh hoek ka Aux tau khawm rhawm tix heue. 8 Siyiex ah nin, “Aux tak sang tik vud ka Zedekix simiang meung Yudax, khawm cub cao kaing nawh mai pui veng Yerusaliem, pa kawn deuk ka daux haktiex in mai pui pa kawn ot ka daux meung Ejiptux khankix, awm plix ruh pa kied laux pa ang lai chix tix ih heue. 9 Aux tak kieh kix koe krax kha rhawm ka daux meung haktiex pui, ka lox salao pui mai ka lox jhax lawg pui, ka can dee hoik grheu Aux kix to heue. 10 Aux tak kieh vaig lawm, sibhawm praix mai jhawm saux preng khankix hoek piang kix tom hoik sidah sidu laux leeing kix khaing haktiex pa tawx Aux ka kix mai ka keeing kix heue.”