1 Siyiex ah nin, “Cao pa liang yung khankix, pa yuh krax laux leeing mai kieh yung khankix prung prang khaing daux gwang rib Aux koe krax kha rhawm heue. 2 Mawh kheu nan, Siyiex pa mawh Siyiex ceu pui Isarelax ah nin ka cao liang yung khankix pa tawx pa ih ka pui Aux khankix, pex hoik kieh yung Aux khankix prung prang mai hoik grheu kix luan mai ang kia ang ngien ka kix heue. Jhak heue, Aux tak sang jhak tix viied ka ceu pa caox caig yuh pex khankix, Siyiex ah nan heue. 3 Aux tak deeh khrawm cub kawn yung Aux pa kawn deuk khankix khaing haktiex pa hoik grheu Aux kix lih mai deeh viex kix hoek ka daux kawg yung kix mai kix tak baox pre nie haoh hun heue. 4 Aux tak yaog ti deuh cao liang yung pa kwang piang kix, pa sang tawx kix ih priex preem mai kix tak ang lai koe krax lhat graung krax yaoh yee khaix in pie tix bawg kawx mai ang lai koe krax cud krax cha, Siyiex ah nan heue. 5 Siyiex ah nin, jhak heue, singaix bawg yam khankix hoik hoek, Aux tak sang yaok ti kieh kak pa rahsee glaoh khaing Davit, pa mawh simiang tix kaux pa naog mai piangnya cuyi mai kwang, prawng ca ka daux pa rahsee mai pa mawh meh ka piang haktiex heue.Ref 23:5-6 Isa 4:2; Ye 33:14-16; Ze 3:8; 6:12 6 Singaix bawg yam nawh khankix, meung Yudax tak pon krax taoh mai ceu pui Isarelax khankix tak yaox ti ot yiien yawg, yam in ceu kaux Nawh Cao tak kok mawh “Siyiex mawh pa rahsee ex heue.” 7 Mawh kheu nan, Siyiex ah nin, jhak heue, Singaix bawg yam pa ang kix lai tiextu ah nin tak sang hoek, Siyiex pa hoik viex kawn praix ceu pui Isarelax lih khaing meung Ejiptux mawh pa im ju, 8 Viang mawh nan, tak tiextu ti ah nin, Siyiex pa im ju hoik teei doeh ru nyiex ma ceu pui Isarelax khankix, lih khaing haktiex plak laong mai khaing ka daux haktiex an khawmuik, pa hoik grheu Aux kix to kix tak sang yaox ti ot ka daux haktiex cao tix heue.”

9 Rhawm Aux hoik koe krax tug kha ka daux aux, kheu pa dex dawd mai cao jhai khankix, si-ang aux khawmuik hoik siyaung heue. Aux hoik awm pui pa yoek ka rawm plix siiet, mawh kheu Siyiex mai kheu gumlox pa singax singeh Nawh Cao khankix heue. 10 Grawh grawng nawh, haktiex hoik naog ka pui pa lud vao, mawh kheu pa jhax lawg, haktiex koe krax yiiem grai ka. Daux tiag tu khankix, hoik groing, krax hu kix mawh pa caox mai riang rao sibrawm kix ang lai rahsee heue. 11 Grawh grawng nawh, cao jhai mai cao giex kaing li khawm ra, mawh pa ang singax singeh, Aux hoik yaox pa caox caig yuh kix ka daux nyiex Aux, Siyiex ah nan heue. 12 Mawh kheu nan, krax hu kix tak awm krax pa nyu ka daux pa faik mai kix tak mawh pa grheu tix mai goh ka daux krax an heue. Aux tak sang viex krax laux leeing hoek piang kix, yam hoek daux num pa ciyang ka kix, Siyiex ah nan heue. 13 Aux hoik yaox rhawm pa vao pa caox ka daux cao jhai veng Samarix, kix ah lox jhai khaing siyiex Balax mai hoik kieh ceu pui Aux Isarelax khankix lud heue. 14 Aux hoik yaox ceu pa seeing brai ka daux cao jhai veng Yerusaliem khankix, Ref 23:14 Jah 18:20; Yez 16:49kix lud vao mai hu ka daux pie lhen, kix tawx riang rao ka taix pui pa yuh pa caox caig pui tix kaux kawx, ang lai deeh veeh khaing pa caox caig yuh tix heue. Kix khawmuik hoik awm pui veng Sawdom ka Aux mai pui ot ka daux veng Yerusaliem khankix, awm pui pa ot ka daux veng Gawmawrax heue. 15 Mawh kheu nan, Siyiex Cao kru naing raoma ah nin, son grawng pa dex dawd mai cao jhai khankix jhak heue, Aux tak sang tawx kix ih ceu plix song mai tawx kix nyaux rawm ghin song, mawh kheu kaing pa ang singax singeh khaing cao jhai Yerusaliem khankix, hoik tah hu ka daux haktiex khawmuik heue.” 16 Siyiex Cao kru naing raoma ah nin, “Paw nghiet ka lox cao jhai khankix, pa krai lox jhai ka pex heue. Kix sidiex pex ka lox pa giex going, kix sikah ngie lox riang susai khaing daux rhawm tix mai ang tie mawh pa kaoh khaing daux jheeh Siyiex heue. 17 Kix ah nin ka pui pa nunai ka aux jheung jheung, Siyiex ah nin, “pex tak sang koe krax pa nhim, mai baox ah nin ka pui ku kaux pa tang hoek hu awm alo rhawm cao tix, ceu pa caox tak ang lai hoek piang pex heue.” 18 Grawh grawng nawh, mawh pui mawx pa pon cung tix kum tau mai Siyiex mai hoik tawng hoik yaox mai hoik mhong ka gumlox Nawh Cao lie? Mawh pui mawx pa hoik mhai ti deuh gumlox Nawh Cao mai hoik mhong ka an lie? 19 Jhak heue, bhaung keukanglux Siyiex hoik lih ka daux pa meet rhawm pa mawh bhaung keukanglux pa kied kin, An tak sang tah piang kaing pui caox caig heue. 20 Krax song rhawm Siyiex lai veet tix plak khaix, tom hoek bawg yam ang Nawh nyang bax ciyang awm pa hoik keud Nawh Cao daux rhawm tix heue. Ka daux singaix khaix khankix, pex tak sang tawng ka grawng an heue. 21 Aux ang nyang bax ploi cao jhai ankix, viang mawh nan, kix hoik to hu heue. Aux ang nyang sikah ka kix, viang mawh nan, kix hoik krai lox jhai heue. 22 Viang mawh kawx nan, phan kix hoik mawh pa cung tix kum tau mai Aux mai kieh pui Aux khankix mhong ka gumlox Aux, khaix an kix tak khaw deeh veeh khaing daux krax pa caox caig tix mai khaing pa caox caig yuh tix heue.” 23 Siyiex ah nin, “Mawh Aux Siyiex pa ot dee dex, ang lai mawh Siyiex pa ot dee pa kied singai lie? 24 Siyiex ah nin, mawh sang pon mox pui tix kaux tokaux tix daux dee glip, son ang Aux sang yaox ka nawh lie? Siyiex ah nin, Mawh ang Aux tah ot ka raoma mai haktiex lie? 25 Aux hoik mhong ka ah cao jhai khankix, ka lox jhai pie lhen ka daux min ceu kaux Aux ah nin, aux hoik camaox ti yaox, aux hoik caomaox ti yaox heue. 26 Cao jhai khankix kawn sang krai lox jhai pie lhen pa koe khaing daux rhawm tix reung miex greung lie? Kix mawh cao jhai pie lhen awm rhawm cao tix, 27 kix coca ti kieh pui Aux khankix piawm ka ceu kaux aux kheu camaox tix, ka ceu pa krai pui ku kaux ka paox plawg tix khankix, awm hoik piawm keeing kix ceu kaux Aux, kheu jao siyiex Balax heue. 28 Cao jhai pa koe krax pa camaox kieh nawh krai grawng camaox an, mai pui pa pon ka gumlox Aux, kieh nawh krai gumlox Aux ka daux pa kaux sijax heue. Siyiex ah nin, grhip nghox sang pon tiag tix mai nghox yuh ka mawx lie? 29 Siyiex ah nin, “Mawh ang gumlox Aux awm ngu lie?, ang awm daix ting pa tawk rang khankix phawng lie? 30 Mawh kheu nan, Siyiex ah nin, jhak heue, Aux tak sang tieh feen ka cao jhai khankix, pa krai ka gumlox Aux, ka pui tix kaux lai tix kaux khaing paox plawg tix heue. 31 Siyiex ah nin, Jhak heue, Aux tak sang tieh feen ka cao jhai khankix, pa shiao dak kix ah nin, Nawh Cao ah nin heue. 32 Siyiex ah nin, jhak heue, Aux tak tieh feen ka cao jhai pa krai lox jhai pie lhen grawng camaox khankix, pa krai pa kieh pui Aux khankix lud loe ka ceu pie lhen kix mai pa tang yaw kix tix heue. Viang mawh nan, aux ang ploi kix mai ang tie tawm lox ka kix heue. Mawh kheu nan, kix krai lox pa ang tie koe bwanson ka ceu pui in khawmuik, Siyiex ah nan heue. 33 Mawh kheu nan, yam pui inkix ang ah, cao jhai ang ah, cao giex kaing li ang ah, chawk ah nin ka maix, pa plak jhi Siyiex mawh ceu patix lie? Khaix an maix tak ah nin ka kix, pa plak jhi Siyiex ah nin, jhi ceu patix? Aux tak sang tik vud ka pex. 34 Ka cao jhai, cao giex kaing li mai pui khankix pa ah nin, an mawh pa plak jhi Siyiex, Aux tak sang ciyang ka pui an mai nyiex ma nawh heue. 35 Awm an, pui ku kaux daux pex, tak ah nin ka paox plawg tix mai ka puxaik tix ku kaux, mawh hoik deeh pawk Siyiex lox ceu patix lie? Hoik krai Siyiex lox ceu patix lie? 36 Pex tak ang lai pon tix krai grawh grawng pa plak jhi Siyiex khaix in heue. Grawh grawng nawh, gumlox pa plak jhi pui ku kaux, mawh gumlox pa tang kaoh khaing tokaux pex, mawh kheu pex hoik tik gumlox Siyiex Cao kru naing raoma pa mawh Siyiex ex heue. 37 Awm an, pex tak ah nin ka cao jhai, mawh hoik deeh pawk Siyiex lox patix ka maix lie? hoik krai Siyiex lox patix lie? 38 Viang mawh nan, phan pex ah nin, mawh pa plak jhi Siyiex, mawh kheu nan, Siyiex ah nin, mawh kheu krai pex gumlox in mawh pa plak jhi Siyiex, Aux ploi pui ah nin ka pex, paw ah nin, an mawh pa plak jhi Siyiex, 39 mawh kheu nan, jhak heue, Aux tak piawm ka pex mai tik vud ka pex mai ka veng pa hoik tawx Aux ka pex mai ka keeing pex khankix kawx, Aux tak sang teei ti tik pex khaing plak sivoe ngai Aux heue. 40 Aux tak viex lox pa sibriem krax kaig tua hoek piang pex leeing ju, pa ang lai chix piawm ka jheung jheung heue.”