1 Siyiex ah yuh nin, “Lih hu ka nyiex haw simiang meung Yudax mai krai lox in tan 2 ah nin, simiang meung Yudax, pa ngawm piang dang ngeung simiang Davit maix mai khawm kawncau maix mai pui maix khankix pa laig ka daux siviex veng inkix eue, nghiet ka gumlox Siyiex heue. 3 Siyiex ah nin, “Prawng ca ka daux pa rahsee mai deeh taoh ka pui pa kham krax tud rhim khankix lih khaing daux tawm taix pui pa yeen ya. Paw yuh krax lud krax loe mai paw yuh krax pa kin ka nyo sinie mai ka pa ang koe miex koe keeing mai miexmai khankix mai paw kieh nham pui pa ang koe map koe grham jauh ka dee in heue. 4 “Grawh grawng nawh, phan pex hawt yuh ceu in mhawm mhawm, khaix an simiang pa ngawm piang dang ngeung simiang Davit khankix, pa brug brung mai pa brug ling lawx brung khankix, hoek khawm kawncau mau soi mai pui haktiex khankix, tak sang yaox tix laig ka diang siviex nyiex haw in heue. 5 Mawh kheu nan, phan pex ang nghiet ka gumlox in khankix, Siyiex ah nin, Aux tiextu ka tokaux tix mai nyiex haw in tak lih mawh dee yiien pui ka heue.”Ref 22:5 Mat 23:38; Luk 13:35 6 Mawh kheu nan, “Siyiex ah nin ka grawng nyiex haw simiang meung Yudax, viang mawh haktiex Gilat mai choek gawng Lebanon ka son Aux kawx; Aux tak sang kieh maix mawh daux tiagtu mai veng pa ang pui lai ot ka heue. 7 Aux tak sang khre pui pa yuh krax laux leeing piang maix, tau mai pa viex kraung naing tix ku kaux, kix tak sang kid khaox Arit pa kied mhawm maix khankix mai taing laig ka daux ngu heue. 8 Ceu pui khankix tom nie tak lailing hawt baoh veng in mai pui ku kaux tak ah nin ka paox plawg tix, Siyiex lai yuh ceu pa yuh nin ka veng ting in yuh ka mawx lie?” 9 Khaix an kix tak deeh pawk ah nin, “Mawh kheu kix hoik piawm ka gumlox sijax mukheu Siyiex pa mawh Siyiex kix mai hoik krub ka siyiex tang kaux tang hak mai hoik yuh kaing jhaw kix heue. 10 Paw yiiem grai son pui pa yum mai paw laux rhawm ka son nawh, viang mawh nan, yiiem grai sigrien sigre son pui pa hu dee singai, mawh kheu nawh tak ang lai deeh hoek khaix in pie tix bawg kawx mai ang lai yaox ka haktiex dee keh dee kung tix heue.”

11 Grawh grawng nawh, Siyiex ah nin, son grawng pa dex dawd mai Shalum, kawn simex Yosiyax, pa mawh simiang meung Yudax, pa plud ti kwang haktiex khaix keeing tix Yosiyax mai pa hoik lih hu khaing dee in, “Nawh tak ang lai dee hoek tin khaix in pie tix bawg kawx,Ref 22:11 2Sim 23:31-34; 2Been 36:1-4 12 nawh tak yum ka dee pa hoik viex kix nawh mawh pui pa giex laung tan mai ang lai yaox ka haktiex in tix bawg kawx heue. 13 Kieh krax kha rhawm koe ka pui pa sum nyiex ka daux pa ang rahsee mai pa yuh lawg ot tix khankix ka daux pa ang khaw caw mai pa cau paox plawg tix khankix ka daux pa ang tawx ngawh riang, tidtix ka son kaing pa yuh nawh. 14 Nawh ah nin, aux tak sang sum tix cie nyiex pa kied ting mai laug pa kied va son tix mai paoh siviex iak son an mai sau braux ka khaox Arit mai kraix ka rawm san plang raoh khankix heue. 15 Mawh tak sang mawh maix simiang, kheu jao sum tix ot ka nyiex khaox Arit lie? Mawh ang keeing maix hoik ih nyaux mai yuh tix pa rahsee mai pa mawh meh lie? Khaix an mawh kheu an hoik mawh pa mhawm ka son nawh heue. 16 Nawh hoik prawng ca ka pui hot shia mai pui cud cha, mawh kheu an hoik mawh ceu pa mhawm heue. Siyiex ah nin, Ang an hoik mawh pa tawng pa yung ka Aux lie? 17 Viang mawh nan, ngai maix mai rhawm maix mawh ngie son pa ghoing mai son nham pui pa ang koe map grham jauh mai krax pa yeen ya mai krax kin khankix heue.” 18 Mawh kheu nan, Siyiex ah nin ka grawng pa dex dawd mai Yehoyakim kawn simex Yosiyax pa mawh simiang meung Yudax, Ref 22:18 2Sim 23:36-24:6; 2Been 36:5-7kix tak ang lai yaox ti yuh krax yiiem doe son nawh, pa ah nin, “Puxke eue phan ang mawh nan, pux nan eue kix tak ang lai yaox ti yuh krax yiiem doe son nawh, pa ah nin, cao simiang aux eue phan ang mawh nan, min sibrawm cao simiang aux eue. 19 Tak sang sipaung nawh awm sipaung la tix mu mai sileed ti tik nawh khaing diang siviex Yerusaliem heue. 20 Haok yiiem ka gawng Lebanon mai riag yo lox tix sinum ka haktiex Bashan mai yiiem ka baoh haktiex Abarim, mawh kheu paox grawm can pa moh maix khankix hoik laux leeing heue. 21 Aux hoik krai ka maix yam kawn haok hwan mhawm ot maix, viang mawh nan maix hoik ah nin, aux ang lai nghiet heue. In hoik dawg mawh jhawm pa yuh maix tom yam iak ju maix, son ang maix sang cu nghiet ka lox Aux heue. 22 Bhaung tak sang ih ka cao pa liang yung maix khankix mai paox grawm can pa moh maix khankix tak sang yaox ti hu awm pa giex laung, khaix an maix tak kaig tua mai laux rhawm, kheu jao pa caox caig yuh tix heue. 23 Pui pa ot piang gawng Lebanon pa yuh mheem piang khaox Arit khankix eue, krax kha rhawm tak sang hoek piang maix awm krax saux ngia yam keh bun kawn tix, tak sang mawh pa koe krax caux rhawm ka maix miex ding lie?”

24 Siyiex ah nin, “Awm im ju Aux, viang Khonix pa mawh kawn simex Yehoyakim simiang meung Yudax, hoik mawh cum jeep giien piang taix dawm Aux kawx, Aux tak sang peeik ti tik maix,Ref 22:24 2Sim 24:8-15; 2Been 36:9-10 25 Aux tak sang ap maix ka daux tawm taix pui pa sawg tix pah ka ju maix mai ka daux tawm taix pui pa kied lhat graung maix ka, pa mawh Nebukhaneza, simiang Babulon mai ka daux tawm taix ceu pui Khaladie khankix heue. 26 Mawh kheu nan, aux tak sang grheu maix lih mai khawm miex pa hoik keh maix, ka haktiex tang dah ka dee ang maix keh mai maix tak yum tan heue. 27 Viang mawh nan, ka haktiex pa keud maix tix sang deeh ing maix tak ang lai yaox ti deeh ing ka heue. 28 Pa mawh Khonix in hoik mawh riang rao pa hoik graig pa nunai pui ka lie? Mawh nawh kraung shiao pa ang pui lai khaw rhawm ka lie? nawh mai khawm doeh ru nawh khankix, lai mawh pa hoik tik tix ka daux haktiex pa ang kix tawng, kheu jao pa yuh ka mawh lie? 29 Haktiex, Haktiex, Haktiex eue, Nghiet ka gumlox Siyiex heue, 30 Siyiex ah nin, “Tiiem ti deuh grawng pui in, sawn mawh pui pa ang lai koe kawn, mawh pui pa ang sax koe krax haoh krax hwan ka daux baux ju nawh khankix, grawh grawng nawh, doeh ru nawh, tak ang koe krax haok hwan pie tix kaux kawx mai ang yaox tix ngawm piang dang ngeung simiang Davit mai ang lai yaox tix kwang ka haktiex Yudax pie tix bawg kawx heue.”