1 Yam an pui Isarelax lih hoek khawmuik, jah khaing veng Dan tom hoek ka veng Berashebax tau mai haktiex Gilat khankix, hoik mawh rhawm tix mu tau mai khrawm paox tix ka plak sivoe ngai Simiang Siyiex ka daux veng Mizapa heue. 2 Cao kaing doeh ru pui Isarelax khawmuik khrawm paox tix hoek ka dee kum kawng pui Siyiex ti tau mai nyawm lien pa giex vaig pon sien kaux heue. 3 Pui Benyamin mhong ka lih hu pui Isarelax ka veng Mizapa, Yam an pui Isarelax chawk ah nin, “Krai yix mhong grawng kaing pa caox caig in ti koe yuh ka mawx?” 4 Pui Lewix pa mawh mex bun pa hoik yum an deeh pawk lox ah nin, “Moeng iak aux mai aux hoek ka daux veng Giba veng pui Benyamin, sonsang laux lee ti tan daux sawm an heue.” 5 “Pui veng Giba khankix hoek lai lawm nyiex paung aux, daux sawm an sonsang pah ka aux, kix hoik map nai moeng iak aux, tom hoik yum kiex heue.” 6 “Mawh kheu nan aux teei tokaux yum moeng iak tix mai tat mawh baux mawx baux an mai roi hu daux haktiex sinngao dee kwang pui Isarelax khawmuik, mawh kheu kix hoik lud mai khin ti yuh pa caox caig ka daux sinax pui Isarelax heue.” 7 “Pex mawh pui Isarelax, tawx krax keud mai keud ti yaox tin yam in tau liak.” 8 Khaix an pui khawmuik yaog ti kaoh awm pa koe rhawm pui tix kaux khaing ah nin, yix tak ang lai ing nyiex gox tix, phan ang mawh nan ka nyiex cao tix, tix kaux kawx heue. 9 Viang mawh nan in mawh ceu pa sang yuh ex ka pui veng Giba yam in, “Ex tak hu puing veng an, ka daux pa cawk nieb heue.” 10 “Ex tak laug pui khaing doeh ru pui Isarelax khawmuik, khaing pui tix yieh kao kaux, khaing pui tix rheng tix yieh kaux mai khaing pui tix mheen tix rheng kaux, sonsang hu tawx priex preem ka son pui naing khankix, yam hoek kix ka veng Giba, ka daux haktiex Benyamin, kix tak pon ti deeh pawk pa caox caig pa hoik yuh kix ka pui Isarelax heue.” 11 Mawh kheu nan pui Isarelax khrawm paox tix, daux pa rob rum grum phroik mai puing ka veng an heue. 12 Pui Isarelax ploi pui hu ka dee ot pui Benyamin ah nin, “Krax caox caig pa hoik yaox ex in ka daux sinax pex, mawh pa yuh ka mawx?” 13 “Yam in ap pui khankix pa hoik yuh pa caox ka daux veng Giba, sonsang pah yix kix yum mai sonsang teei yix ti tik pa caox caig in khaing daux pui Isarelax, “viang mawh nan kawn praix pui Benyamin, ang nghiet ka lox krai puxaik kix pui Isarelax heue. 14 Pui Benyamin deeh khrawm paox ti khaing veng cao kix ku veng mai hoek ka veng Giba, sonsang yuh naing ka pui Isarelax heue. 15 Yam an pui Benyamin pa kaoh khaing daux veng cao kix ku veng, pa giex vaig tix lih hoek ra mheen liah rheng kaux, ka piang an pui pa ot ka daux veng Giba pa hoik laug kix ti deuh, koe aliah yieh kaux heue. 16 Ka daux sinax pui in kix khawmuik, pa hoik laug kix ti deuh aliah yieh kaux, mawh pui pa koe riang taix khawn gwieh mai mawh pa chix puing lon simaox ka ak maox vuh vied, pa ang lai khluk khlaik pie ka gawng hauk tix gawng heue. 17 Lheu khaing pui Benyamin pui Isarelax, pa hoik simin kix ti deuh pa viex vaig tix koe pon sien, pui in khankix mawh pui naing khawmuik heue. 18 Pui Isarelax kaoh mai hu daux nyiex bwan Siyiex mai chawk ah nin ka Siyiex daux cub yix, “Mawh cub mawx pa caw tix puing ka pui Benyamin siveo lie?” Simiang Siyiex ah nin ka kix mawh cub pui Yudax pa caw ti lih hu sivoe heue.” 19 Pui Isarelax khankix kaoh caocao plak ponngawb mai hu yuh tab hawt veng Giba heue. 20 Pui Isarelax lih hu puing naing ka pui Benyamin mai yuh naing ka kix sivoe veng Giba heue. 21 Yam an pui Benyamin lih khaing daux veng Giba mai pah pui Isarelax goh piang tiex, ra mheen kaux daux singaix an heue. 22 Pui Isarelax teei rhawm vao sau riang tix mai baox yuh naing ka dee hoik yuh kix naing daux singaix phao ka heue. 23 Khaix an pui Isarelax hu mai yiiem yo ka plak sivoe Simiang Siyiex tom hoek plak bo mai chawk Simiang Siyiex ah nin, “Mawh kawn sang yaox yix ti hu yuh naing ka puxaik yix pui Benyamin lie?” Simiang Siyiex ah nin, “lih hu mai puing ka nawh heue.” 24 Mawh kheu nan pui Isarelax, deeh hoek dex pui Benyamin ka daux ra ngaix tix ngaix heue. 25 Pui Benyamin lih khaing veng Giba daux ra ngaix tix ngaix mai pah kru naing vaig pui Isarelax, goh piang tiex tix mheen daix rheng kaux heue. 26 Khaix an cub pui hun Isarelax hu ka nyiex bwan Siyiex tau mai yiiem tix, kix ot ka plak sivoe Simiang Siyiex mai twah pa ih leeing singaix, tom hoek plak bo mai kix tan krax tan pa gleeing mai krax tan pa nhim ka plak sivoe Simiang Siyiex heue. 27 Mawh kheu nan pui Isarelax, deeh chawk cheng ti yaox ka Simiang Siyiex yam an, teug bwan sijax mukheu Siyiex kawn koe ka daux veng Betalax, 28 yam an mawh Phenihat kawn simex Eliza kawn saux Arun, mawh pa cung ka plak sivoe teug bwan sijax mukheu Siyiex, kix chawk ah nin, “Mawh kawn caw yix ti baox lih hu puing ka puxaik yix pui Benyamin lie? Phan ang mawh nan ang lai caw ti hu lie?” Mai Simiang Siyiex deeh ah nin, “Lih hu heue, pasax, Aux tak ap kix ka daux taix pex heue.” 29 Khaix an pui Isarelax ploi pui hu yuh naing jawm hawt vung viang veng Giba khawmuik heue. 30 Pui Isarelax lih hu puing ka pui Benyamin, ka daux loe singaix tix ngaix mai yaog tix laig daux bang naing mai kix puing ka veng Giba awm bawg sivoe heue. 31 Mawh kheu nan pui Benyamin lih hu puing ka pui khankix mai kix hoik singai hu khaing daux veng, kix jah ti pah pui tiblah, awm singaix ka piang krax ting pa hu ka veng Betelax mai krax pa hu ka veng Giba daux kaung, kix pah pui Isarelax yum tixngoe kaux heue. 32 Pui Benyamin deeh ah nin, “Kix hoik som ka plak sivoe ngai ex, awm singaix ka heue.” Viang mawh nan pui Isarelax ah nin, “Kieh ex to mai nyaw kix lih hu singai khaing veng ka piang krax ting heue.” 33 Mawh kheu nan pui Isarelax khawmuik yaog ti kaoh khaing dee ot tix mai puing ka kix hawt veng Balax Tama, pui Isarelax pa yuh naing jawm kawx kaoh khaing dee ot tix ka daux lung Giba heue. 34 Mai simex pa hoik laug kix ti deuh tix mheen kaux khaing daux pui Isarelax, hoek ti puing ka veng Giba mai naing hoik kied kin tete, viang mawh nan pui Benyamin ang nyang tawng pa dex sang hoek krax pa laux leeing ka piang tix heue. 35 Simiang Siyiex hoik kieh pui Benyamin som ka plak sivoe pui Isarelax mai pui Isarelax hoik yuh kru naing giex vaig pui Benyamin laux leeing ra mheen phwan rheng tix yieh kaux daux singaix an heue. 36 Mawh kheu nan pui Benyamin hoik tawng ka hoik som tix, pui Isarelax deeh plak khaix sivoe pui Benyamin, mawh kheu hoik een rhawm tix ka pui pa sang yuh naing jawm khankix pa hoik deuh kix hawt sivoe veng Giba tan heue. 37 Pui pa pau ti yuh naing jawm khankix, yaog tix jaox mai laig puing daux veng Giba, hoik tah daux veng khawmuik mai pah kix ka lawm vaig tix heue. 38 Mhai pa hoik tat kix ti deuh sinax pui Isarelax mai can pui pa yuh naing jawm khankix, mawh nin, kix tak kieh taox ngu pa ting tix mu, yaog tix haok khaing daux veng, 39 Yam deeh pui Isarelax plak khaix tix daux bang naing, pui Benyamin hoik jah ti pah pui Isarelax been tixngoe kaux mai kix ah nin, “Kix hoik baox som ka plak sivoe ngai ex awm daux naing bawg tix heue.” 40 Viang mawh nan yam hoik jah taox ngu ti haok awm ceep paiawm khaing daux veng, pui Benyamin jhak ka plak khaix tix mai yaox haok taox ngu ka raoma, khaing daux veng khawmuik heue. 41 Yam an pui Isarelax deeh veeh ti hawt ka plak khaix kix, pui Benyamin hoik koe krax pa daox ding kah, mawh kheu hoik yaox kix hoek krax laux leeing ka piang tix heue. 42 Mawh kheu nan kix daox deng ka mai veeh ti to sivoe pui Isarelax, plak see daux tiag, viang mawh nan pui naing deeh krup kix tan mai yuh can pui pa hoik lih khaing daux veng daux yaong khankix, laux leeing ka daux sigreung kix heue. 43 Kix hoik lai lawm pui Benyamin mai nied ti baox pheet kix mai hoik pon ti dugdig kix jah ka yaong Nukha tom hoek sivoe veng Giba plak lih singaix heue. 44 Pui Benyamin hoik goh ti yum tix mheen daix rheng kaux, pui in kix khawmuik mawh pa koe rhawm vao rhawm cong heue. 45 Pui pa kawn deuk khankix deeh veeh ti to plak daux tiag ka rang Rimon, cao pa pheet hawt pon mug kix yum phwan rheng kaux hawt krax, kix deeh nied ti hawt khaix kix, tom hoek ka veng Gideon mai baox pah kix yum ra rheng kaux heue. 46 Mawh kheu nan pui naing pa koe rhawm kwa rhawm vao pa giex vaig daux naing son pui Benyamin pa hoik yum daux singaix an, koe ra mheen phwan rheng kaux heue. 47 Viang mawh nan pui liah yieh kaux, deeh veeh ti to ka plak rang Rimon mai kix kut tix ot daux rang Rimon an pon khix heue. 48 Pui Isarelax deeh veeh ti ing mai baox puing ka pui Benyamin mai mug kix yum ka lawm vaig tix, can pui mai to brie pa yaox ti khawmuik ka daux veng mai kix keeig ti tik yaong mai veng can pa yaox tix khawmuik heue.