19
Grawng Moeng iak Pui Lewix
1 Daux baux yam ang simiang nyang koe ka daux pui Isarelax, koe pui Lewix tix kaux pa hu bang tix ot ka praok caong gawng Epharem, nawh teei moeng iak ka daux veng Bieliehiem daux meung Yudax heue.
2 Bun an lud ka nawh mai deeh ing ka nyiex keeing tix daux veng Bieliehiem daux meung Yudax mai ot tan pon khix heue.
3 Khaix an mex nawh hawt khaix nawh, sonsang deeh nyaw nawh ing, nawh viex kawncau tix kaux mai la ra mu hu tau mai tix, bun an viex nawh laig daux nyiex keeing tix, yam yaox keeing bun an ka kheue tix, kied koe krax gaux rhawm ka heue.
4 Paox nawh pa mawh keeing bun an, gang ti deuh nawh mai nawh ot mai paox ti loe singaix, mawh kheu nan kix ih nyaux mai paung tan heue.
5 Yam hoek ponngaix tix ngaix, kix kaoh caocao ponngawb mai khre tix sang hu khaing tan, viang mawh nan keeing bun an ah nin ka kheue tix, “Ih blah ceeix ha, sonsang koe riang pex, khaix an pex hu krax pa sang hu pex heue.”
6 Mawh kheu nan kiex deeh ngawm khawm ra mai ih nyaux tau, khaix an keeing bun an, deeh ah nin ka nawh, “Yuh bwanson laux tix tin sawm in ha mai kieh pax koe krax gaux rhawm ka heue.”
7 Yam deeh khre nawh ti sang hu, paox nawh deeh nyaw nawh ot, mawh kheu nan nawh baox yaox ti paung tan heue.
8 Yam hoek phwan ngaix tix ngaix nawh kaoh caocao ponngawb sonsang hu tix, keeing bun an ah nin, “Yuh bwanson baox naok riang pex ha mai gun tom hoek yam jung singaix mai kiex khawm ra baox ih ka pa khan kheu nawh heue.”
9 Yam deeh khre nawh ti sang hu tau mai moeng iak tix khawm kawncau nawh, paox nawh pa mawh keeing bun an ah nin ka nawh, “Ponngaix hoik dex uik mai dex hoek plak ponbo, yuh bwanson paung tin sonsang koe krax gaux rhawm, kaoh ponngawb caocao pasax mai hu ka krax hu pex, phan yuh nan pex tak pon ti hoek ka nyiex tix heue.”
10 Viang mawh nan nawh ang lai koe rhawm ti sang it tan daux sawm an, mawh kheu nan nawh sau lhang ka piang kawn la ra mu mai yaog ti kaoh hu tau mai moeng iak tix mai hoek ka dah dee tix dah, pa koe sivoe veng Yebok pa mawh veng Yerusaliem heue.
11 Kix hoek dex veng Yebok mai praix dex sang faik ka kix tan mai kawncau an ah nin ka cao simiang tix, “Kieh ex veh daux veng in, dee koe pui Yebusix mai paung ka heue.”
12 Viang mawh nan cao simiang nawh deeh ah nin, “Ex ang pon ti veh daux veng pui tang ceu pa mawh pui Isarelax, ex tak hu ka veng Giba heue.”
13 Mawh kheu nan nawh ah nin ka kawncau tix, “Hoek heue, kieh ex hu tom hoek ka veng Giba, phan ang mawh nan veng Rama ang ah mai it tan sawm in heue.”
14 Kix lih khaing tan mai hu krax hu tix, singaix klip ka kix hawt dex veng Giba daux haktiex pui Benyamin heue.
15 Yam laig kix dau veng Giba sonsang paung tan, ang koe pui pa viex kix laig ka dee paung, nawh ngawm ka daux bing pak daux veng heue.
16 Yam an kix yaox tax kuad tix kaux, pa kaoh khaing dee yuh tix kaing daux tong kaung hoek bleeh ka kix plak ponbo, nawh mawh pui pa kaoh khaing gawng Epharem pa hoek paung ka veng Giba, ka daux veng Giba mawh pui Benyamin pa ot ka heue.
17 Yam maong nawh ti jhak nawh yaox ka pui hu krax an kix pa ngawm daux bing pak daux veng mai kuad an ah nin ka kix, “Sang hu pex krax mawx, kaoh pex khaing dee mawx?”
18 Mai nawh deeh ah nin, “Yix kaoh khaing veng Bieliehiem daux meung Yudax mai yix sang hu ka plak praok caong gawng Epharem, aux mawh pui pa ot tan, aux hoik hu ka veng Bieliehiem, daux meung Yudax mai yam in sang hu ka nyiex bwan Simiang Siyiex, pui rieb aux laig daux nyiex tix ang koe tix kaux kawx heue.
19 Yix koe brex nghox mai rib kroh son la yix mai blah khawm rawm plix siiet son cao tix, khawm son moeng, son kawncau bun pa ot tau mai tix, yix ang lai lo tix ceu kawx heue.”
20 Pui kuad an ah nin ka kix, “Kieh pa nhim koe tau mai maix liak, can ceu pa lo maix khankix kieh mawh beeh glawm aux, paw doh it ka daux bing pak daux sawm in”
21 Nawh viex kix laig ka daux nyiex tix mai tawx la kix sawm mai kix khoek caong tix mai ih nyaux heue.
Grawng Yuh See Veng Gibeah
22 Yam tak yuh kix pa nyawm rhawm cao tix, pui caox tiblah hoek ti lai lawm ka nyiex mai klah ka siviex, kix ah nin ka kuad cao nyiex, “Teei pui pa hoek paung daux nyiex maix lih plak praix, sonsang lud vao yix tau mai nawh heue.”
23 Yam an cao nyiex lih plak praix ah nin ka kix, “Puxaik khankix eue, ang chix! aux khyox khaw ka pex, paw doh yuh pa caox caig pa kied ting liak! Pui in mawh pa hoek paung ka daux nyiex aux, paw yuh kaing ceu pa seeing brai yuh nin liak.”
24 “Kawn bun krih aux mai moeng iak simex in koe tin, kieh aux viex kiex lih ka praix yam in, map nai kiex mai yuh can pa koe rhawm pex ti yuh ka kiex, viang mawh nan paw doh yuh ceu pa caox ka kaw simex in!”
25 Viang mawh nan pui an kix ang nghiet lox nawh, mawh kheu nan pui Lewix an, teei moeng iak tix mai viex lih plak praix ka kix, kix lud vao mai nawh leeing sawm tom hoek ponngawb, yam jah praix ti riang, kix deeh ploi bun an lih hu heue.
26 Yam bah riang praix bun an deeh hoek ka nyiex dee paung mex tix mai goh it hawt siviex nyiex tan tom lih singaix heue.
27 Yam hoik kaoh mex nawh khaing it tix ponngawb, nawh paoh siviex nyiex sonsang lih hu krax hu tix, nawh yaox ka it moeng iak tix hawt diang siviex nyiex mai deuh taix ti ka piang siviex heue.
28 Mai nawh ah nin ka bun an, “Kaoh, hu ex phao, “Viang mawh nan bun an ang pon pawk lox nawh, mawh kheu nan simex an yaog tix sau nawh ka piang la mai ing ka dee ot tix heue.
29 Yam hoek nawh daux nyiex tix, nawh teei vaig tix kre mai tat nex moeng iak tix khawm si ang, koe kao ra baux mai tawx hu ka can dee ot pui Isarelax khawmuik heue.
30 Can pui pa yaox ka ceu in khawmuik, kix ah nin, “Kaing ceu in ang mawx sax yuh mai ang sax koe, jah tom singaix, lih pui Isarelax khaing haktiex Ejiptux tom hoek daux in singaix, keud ti yaox grawh grawng in mai kum paox tix grawng sang caw ti yuh ka mawx heue.”