21
Tawx Pui Benyamin Koe Moeng
1 Pui Isarelax hoik tiextu, ka daux veng Mizapa ah nin, “Ex tix kaux kawx tak ang pon ti tawx pui Benyamin teei ti moeng kawn bun tix heue.”
2 Pui khankix hoek ka nyiex bwan Siyiex mai ot ka plak sivoe Siyiex tan tom hoek plak bo, kix riag yo tix yiiem,
3 Mai ah nin, “Simiang Siyiex pui Isarelax eue, kaing pa sang kieh ru pui tix cub grai khaing daux pui Isarelax, daux in singaix lih koe kheu patix?”
4 Mawh kheu nan pui khankix yaog ti kaoh ponngawb caocao mai sum khu dee tan tix mu tan mai tan krax tan pa gleeing, khawm krax tan pa nhim heue.
5 Pui Isarelax khankix ah nin, “Pui mawx ang hoek kum ka plak sivoe Simiang Siyiex tau mai paox tix, khaing daux doeh ru pui Isarelax lie?” Mawh kheu kix hoik yuh krax tiextu pa kied ting, son grawng pa dex mai pui pa ang hoek ka plak sivoe Simiang Siyiex daux veng Mizapa tak pah nawh yum heue.”
6 Pui Isarelax kied laux rhawm ka son pux kix Benyamin mai kix ah nin, “Doeh ru pui tix cub hoik grai khaing pui Isarelax daux in singaix heue.”
7 “Mawh kheu hoik tiextu ex ka Simiang Siyiex, son ang ex lai tawx kix moeng kawn bun tix, ex tak sang yuh ka mawx, sonsang koe moeng pui pa kawn deuk an khankix lie?”
8 Mai kix ah nin, “Khaing daux doeh ru pui Isarelax, mawh pui mawx pa ang hoek ka veng Mizapa ka plak sivoe Simiang Siyiex lie?” Yam an kix yaox mawh pui veng Yabiet pa ot daux haktiex Gilat pa ang hoek dee bang dee khrawm pui khankix paox tix, tix kaux kawx heue.
9 Mawh kheu yam simin kix ti yaox ka pui khankix, pui pa ot ka daux veng Yebiet, daux haktiex Gilat, ang lai koe pie tix kaux kawx tan heue.
10 Mawh kheu nan cub pui hun deeh ploi pui pa kied koe rhawm kwa rhawm vao tix mheen ra rheng kaux hu tan mai tawm kix ah nin, “Hu mai pah ti tik pui pa ot ka daux veng Yabiet, daux haktiex Gilat khankix ka lawm vaig pex, simex, bun mai kawn nyawm khankix heue.”
11 “Pa sang caw pex ti yuh, pex tak yuh simex, bun ku kaux pa hoik koe mex khankix laux lak pak leeing heue.”
12 Mawh kheu nan kix yaox bun krih pa ang nyang koe mex pon yieh kaux, daux sinax pui pa ot daux veng Yebiet daux haktiex Gilat mai kix viex kix hoek ka dee bang dee paung tix daux veng Shilaw daux haktiex Khanan heue.
13 Khaix an cub pui hun khawmuik deeh ploi pui hu krai ka pui Benyamin, pa ot hawt rang Rimon mai krai pao lox pa nhim rhawm ka kix heue.
14 Mawh kheu nan pui Benyamin deeh hoek daux bawg yam an, pui Isarelax tawx kix moeng bun pa hoik deuh kix im ju, pa mawh bun veng Yebiet daux haktiex Gilat, viang mawh nan bun ang nyang kub son kix heue.
15 Pui Isarelax kied koe krax laux rhawm son pui Benyamin, mawh kheu Simiang Siyiex hoik yuh ceu pa laux leeing koe daux doeh ru pui Isarelax heue.
16 Khaix an kuad cao kaing cub pui hun khankix ah nin, “Mawh kheu hoik laux leeing bun pui Benyamin, ex sang yaox bun dee mawx son pui pa kawn deuk khankix heue.”
17 Mai kix ah nin, “Son ang doeh ru pui tix cub lai grai khaing daux pui Isarelax, caw ti koe haktiex sinngao son pui Benyamin, dee pa pon glawt ti dah heue.
18 “Viang yuh ka mawx kawx, ex ang pon ti tawx kix moeng kawn bun ex heue. Mawh kheu pui Isarelax hoik koe lox pa tiextu ah nin, “Kieh krax pa jhax lawg koe ka piang pui pa tawx kawn bun tix mex ka ceu pui Benyamin heue.”
19 Mai kix ah nin, “Pawie Simiang Siyiex koe tix num tix bawg daux veng Shilaw, plak laong veng Betelax plak lih singaix ka krax pa hu, jah ka veng Betelax tom hoek ka veng Shekhim, pa koe plak seh veng Lebawna heue.
20 Mawh kheu nan kix tawx lox ka pui Benyamin ah nin, “Hu mai jawm ti pau daux sipeem plix siiet khankix,
21 Yam lih hu kawn bun veng Shilaw daux pawie mai graoh tix, pex lih khaing daux sipeem plix siiet mai hu giex ti moeng bun an kix son cao tix mai viex ing ka haktiex pui Benyamin heue.
22 Phan keeing kix mai puxaik kix hoek ti ah grawng see ka yix mai yix tak ah nin ka kix, “Koe krax pa caux rhawm ka kix mai jhak ka pakngai yix liak, mawh kheu yix ang lai deuh moeng kix pie tix kaux kawx son kix ka daux naing, jao ang tie mawh pex pa teei ti tawx kawn bun inkix ka kix daux bawg yam in, phan koe krax lud ka lox pa hoik tiextu pex heue.”
23 Pui Benyamin hoek ti yuh awm an mai teei moeng son cao tix awm ding koe kix, khaing daux kawn bun pa hoek graoh tan mai giex kix ing ka daux haktiex sinngao cao tix mai kix deeh cox ti sum veng mai ot ka daux heue.
24 Mawh kheu nan bawg yam an pui Isarelax lih hu khaing tan mai ing ka dee ot cao tix mai doeh nyiex ma cao tix, ka daux haktiex sinngao cao tix heue.
25 Ka daux baux yam an pui Isarelax ang nyang koe simiang, pui ku kaux tang yuh awm pa yaox nawh mawh pa khaw caw ka ngai cao tix heue.Ref 21:25 Cao 17:6.