1 Ka daux baux yam ang pui Isarelax nyang koe simiang, doeh pui Dan kawn sawg haktiex sinngao pa caw kix ti pon tom yam an, kix ang nyang bax pon sinngao haktiex cie cao tix, khaing sinax doeh ru pui Isarelax heue. 2 Mawh kheu nan pui Dan laug pui pa ting riang daux pao nyiex kix phwan kaux khaing veng Zawrax mai veng Eshatawlax mai ploi hu sonsang jiang ka haktiex mai tawm lox ah nin ka kix, “Lih hu sawg ti yaox ka haktiex, ” Mawh kheu nan kix hu ka piang gawng Epharem mai hoek ka nyiex Mikha mai paung tan heue. 3 Yam kawn ot kix daux nyiex Mikha, kix pon ci ka lox sikah pui awn ju Lewix an, kix laig ka dee ot nawh ah nin ka nawh, “Mawh pui mawx pa viex maix hoek tin? Yuh maix ti ka dee in? Mawh koe grawng ceu patix ka son maix tin?” 4 Nawh ah nin ka kix, “Mawh Mikha pa yuh grawng ceu in ka aux, nawh hoik vai aux mai kieh aux mawh cao giex kaing li tix heue.” 5 Mawh kheu nan kix ah nin ka nawh, “Yuh bwanson chawk cheng sonsang tawng yix krax pa sang hu tix ka Siyiex liak, pon lie?” 6 Mai cao giex kaing li ah nin ka kix, “Hu daux pa nhim rhawm, Simiang Siyiex tak ot tau mai pex, ka daux krax hu pex heue.” 7 Mawh kheu nan pui an kix phwan kaux, lih hu khaing tan mai hoek ka veng Lesha, kix yaox ka krax ot pui pa ot tan, hoik awm krax ot pui Sidon, pa ang koe krax khi ot yiien yawg tix, cao kwang haktiex pa sang sidiex gau kix kawx ang koe tix kaux kawx, kix hoik singai khaing pui Sidon mai ang lai sitoe tix ka pui tix kaux kawx heue. 8 Khaix an cao pa jiang deeh ing ka puxaik kix pa ot daux veng Zawrax mai veng Eshatawlax, puxaik kix ah nin ka kix, “Koe grawng pa sang krai pex ceu patix?” 9 Kix deeh ah nin, “Yaog tix kaoh, kieh ex hu puing kix, mawh kheu ex hoik yaox haktiex an, mawh pa kied mhawm tete, pex lai kawn kaog yuh nin yuh ka mawx? Paw lai nhim sonsang laig puing ex mai teei ti cie haktiex an heue.” 10 “Yam hu pex, pex tak hoek ka dee ot pui ang koe satix mai ka dee va haktiex, mawh kheu Siyiex hoik tawx in ka daux taix pex, dee an mawh dee ang cud cha ka can pa koe ka piang haktiex in tix ceu kawx heue.” 11 Pui liah yieh kaux, khaing pao nyiex Dan, lih hu khaing veng Zawrax mai veng Eshatawlax tau mai kraung naing tix sonsang puing naing heue. 12 Khaix an kix lih hu mai bang ka daux veng Kirayat Yarim, daux meung Yudax, mawh kheu nan, kix kok ceu kaux dee an mawh dee bang dee paung pui Dan tom hoek daux in singaix, dee an koe plak klip singaix veng Kirayat Yarim heue. 13 Kix lih khaing tan mai hu ka piang gawng Epharem mai hoek bleeh ka nyiex Mikha heue. 14 Yam an pui phwan kaux pa hu jiang haktiex Lesha krai ah nin ka puxaik tix, “Ang pex tawng koe sibex dhah mai riang grang Asherax siyiex khawm riang grang Asherax pa saik mai riang grang Asherax pa raug, ka daux nyiex inkix lie? sang caw ti yuh ka mawx keud ti yaox yam in heue.” 15 Mawh kheu nan kix veh tan mai laig ka nyiex pui awn ju Lewix an, ka nyiex Mikha mai kix singeuh taix nawh heue. 16 Pui Dan khankix pa viex kraung naing liah yieh kaux, hoik cung daux siviex heue. 17 Pui phwan kaux pa hu jiang ka haktiex laig ka daux nyiex, kix teei riang grang Asherax pa hoik saik mai sibex dhah mai riang grang Asherax pa koe ka daux nyiex mai riang grang Asherax pa raug ti khawmuik, cao giex kaing li mai pui pa viex kraung naing liah yieh, cung hawt diang siviex tau heue. 18 Yam laig kix daux nyiex Mikha mai teei riang grang Asherax pa saik mai sibex dhah mai riang grang Asherax pa koe daux nyiex, khawm riang grang Asherax pa raug khankix, cao giex kaing li ah nin ka kix, “Mawh yuh pex ceu patix?” 19 Mai kix deeh ah nin ka nawh, “Yawk ti thox jheeh maix mai hawt khaix yix mai deeh mawh keeing mai mawh cao giex kaing li tix kaux ka son yix, khaing sang yuh maix cao giex kaing li ka son pui tix kaux ngie, phan maix yuh cao giex kaing li ka son doeh pui tix cub mai ka daux pao nyiex pui Isarelax khankix nie lheu mhawm son maix ang mawh lie?” 20 Mawh kheu nan cao giex kaing li an koe krax gaux rhawm mai teei sibex dhah mai riang grang Asherax pa koe daux nyiex daux ma khankix mai riang grang Asherax pa saik mai laig hu sinax pui khankix heue. 21 Kix deeh veeh tix mai lih khaing tan, kix kieh kawn nyawm iak mai to brie, kraung khrai pa pon kix hu sivoe kix heue. 22 Yam hoik hoek kix dee singai khaing nyiex Mikha, pui pa ot hawt rawb rim Mikha khankix, deeh khrawm paox tix hawt pheet pui Dan tom krup heue. 23 Mai kix kok yo ka pui Dan khankix, mawh kheu nan pui Dan deeh gi ti jhak ah nin ka Mikha, mawh koe grawng ceu patix maix lai khrawm pui ding dod hawt khaix yix!” 24 Mikha deeh ah nin, “Pex hoik teei ti viex siyiex pa yuh aux khankix khawm cao giex kaing li hu, lheu khaing in aux kawn deuk ceu patix? Pex lai kawn ah nin, mawh koe grawng ceu patix ka aux?” 25 Pui Dan khankix deeh ah nin ka nawh, “Paw lai kieh yix mhong lox maix, phan ang mawh nan ha pui pa song rhawm in kix kox puing maix mai kieh ju maix khawm paox nyiex maix khankix hoek krax som nai heue.” 26 Khaix an pui Dan hu krax hu tix, yam yaox Mikha ka hoik kied ting riang rao kix khaing tix, nawh deeh veeh ti ing ka nyiex tix heue. 27 Mawh kheu nan kix teei can pa hoik yuh Mikha mai cao giex kaing li pa ot tau mai nawh hu mai kix deeh hu ka veng Lesha, ka pui pa ot daux pa ang koe satix khankix mai pah pui ankix ka lawm vaig mai gleeing veng an ka ngu heue. 28 Pui pa sang deeh taoh ka kix ang lai koe, mawh kheu dee ot kix mawh pa singai khaing veng Sidom mai kix ang tie sitoe tau mai pui tix kaux kawx, veng an koe dex ngawd veng Biet Rehawbax, mawh kheu nan kix baox deeh sum veng khraox mai kix ot tan heue. 29 Kix sum ceu kaux veng an hawt ceu kaux keeing kix, pa hoik keh kaing pui Isarelax pa kaux Dan mai kok mawh veng Dan, ceu kaux veng an glang ka dex mawh veng Lesha heue. 30 Pui Dan khankix deeh kaw deeh pang ti deuh riang grang Asherax pa saik Mikha ka son cao kix mai kix kieh Yawnatan kawn simex Geshom, kawn simex Manashe mai kawn simex nawh khawmuik, mawh cao giex kaing li ka doeh ru Dan tom hoek bawg yam pa giex kix hu khaing haktiex heue. 31 Mawh kheu nan kix hoik pang hoik kaw ti deuh riang grang Asherax pa hoik saik Mikha, ka son cao kix, glang bawg yam kawn koe nyiex bwan Siyiex ka daux veng Shilaw heue.