17
Rieng Rao Mikha
1 Koe pui tix kaux khaing ka piang gawng Epharem mai ceu kaux nawh mawh Mikha heue.
2 Nawh ah nin ka miex tix, “Mau kawn pa hoik grai khaing pax tix rheng tix yieh shekhe mai pa mhong aux hoik jhax lawg pax ka koe mai aux, aux hoik teei ti deuh, ” Mai miex nawh deeh ah nin, “Kawn simex aux eue, kieh Simiang Siyiex nawb bwan ka piang maix heue.”
3 Yam deeh tawx nawh lon mau an tix rheng tix yieh shekhe ka miex tix, miex nawh ah nin, “Aux hoik tan lon mau pa koe an khawmuik ka Simiang Siyiex sonsang raug maix riang grang Asherax tix mu, mawh kheu nan yam in aux tak deeh tawx an ka maix heue.”
4 Mawh kheu nan nawh deeh tawx lon mau an ka miex tix, miex nawh teei lon mau an ra yieh shekhe mai tawx pa chix kraung mau yuh riang grang Asherax pa saik tix mu mai riang grang Asherax pa raug tix mu mai deuh riang grang Asherax an ka daux nyiex Mikha heue.
5 Pui Mikha an koe nyiex krub tix mu mai nawh yuh ti deuh sibex dhah tix pheen mai riang grang Asherax pa krub kix son daux nyiex daux ma tix mai nawh hoik yaog kawn simex tix, tix kaux mawh cao giex kaing li tix heue.
6 Baux yam an simiang ang koe ka daux pui Isarelax, pui ku kaux tang yuh awm rhawm keud cao tix khaing heue.Ref 17:6 Cao 21:25.
7 Koe pui pa awn ju pa ot daux veng Bieliehiem khaing meung Yudax, pa kaoh khaing pui Yudax, nawh mawh pui Lewix tix kaux, nawh hoek ti paung daux veng Bieliehiem heue.
8 Pui an lih khaing veng Bieliehiem meung Yudax, sonsang ot dee yaox ti dee mhawm praix tix dah mai nawh bleeh ka gawng Epharem mai paung ka nyiex Mikha, yam kawn hu nawh krax hu tix heue.
9 Mikha ah nin ka nawh, “Kaoh maix khaing dee mawx?” nawh deeh ah nin, “Aux mawh pui Lewix khaing veng Bieliehiem meung Yudax, aux hu sawg dee paung tix heue.”
10 Mikha ah nin ka nawh, “Ot mai aux tin mai mawh keeing khawm cao giex kaing li ka son aux, aux tak tawx mau ka maix kao shekhe ku num, khawm kraung ceep tix jung mai priex ih maix, ” Mawh kheu nan pui Lewix an laig ka daux nyiex nawh heue.
11 Pui Lewix an fah rhawm ka ot tix mai pui an mai pui awn ju an, lih ti awm kawn simex ka son nawh heue.
12 Mawh kheu nan Mikha yaog pui Lewix an mawh cao giex kaing li mai pui awn ju an lih ti mawh cao giex kaing li nawh mai ot ka daux nyiex Mikha heue.
13 Mai Mikha ah nin ka nawh, “Yam in aux hoik tawng Simiang Siyiex tak yuh ceu pa mhawm ka piang aux, kheu hoik pon aux pui Lewix tix kaux mawh cao giex kaing li heue.”