16
Grawng Samson mai Delila
1 Khaix an Samson hu ka plak veng Gaza, nawh yaox ka bun coh kaux tix kaux mai nawh laig ot tau mai nawh heue.
2 Yam mhong pui veng Gaza ka hoek Samson daux veng kix, kix lai lawm ti pau nawh, leeing sawm hawt dex diang siviex veng, kix ot yiien yawg leeing sawm ah nin, “Yam bah riang praix plak ponngawb, ex pah nawh yum heue.”
3 Samson it tom hoek greung sawm, nawh yaog ti kaoh greung sawm mai nawh hu laoh ti viex siviex veng mai pang siviex ra mu mai jhong siviex khawmuik mai klawm ka piang klip tix viex hu ka piang choek gawng pa koe siveo veng Hebaron heue.
4 Khaix an nawh baox deeh moh ka bun pa ot ka daux ngawd Sawriet tix kaux, ceu kaux nawh mawh Delila heue.
5 Simiang pui Philitix hoek ka bun an ah nin, “Nyaw glaw mai yuh tix tawng dee koe riang rao nawh mai sonsang pon phyawk ex nawh ka ceu patix mai sonsang pon yuh ex krax kha rhawm ka nawh mai yix ku kaux tak tawx lon mau ka maix ti rheng tix yieh shekhe heue.”
6 Delila chawk ah nin ka Samson, “Yuh bwanson krai aux mhong dee ting riang rao maix mai grawng ceu pa sang pon phyawk pui maix ka maox mai sonsang pon yuh pui krax pa kha rhawm maix liak.”
7 Samson ah nin ka bun an, “Phan kix phyawk aux ka maox gan pa ang nyang kroh aliah nyaing, aux tak awn riang mai awm pui tang kaux heue.”
8 Mawh kheu nan cub simiang pui Philitix, viex maox gan klai pa ang nyang kroh aliah nyaing hoek ka nawh mai bun an phyawk nawh ka heue.
9 Pui tiblah mox tix, jawm nawh ka daux lawg it bun an, bun an ah nin ka nawh, “Samson eue, pui Philitix hoek ti puing maix, ” nawh rud ti tik maox gan an awm dud maox keei pa hoik gleeing ka ngu heue. Kix ang nyang tawng grawng deeh koe riang rao nawh heue.
10 Khaix an Delila ah nin ka Samson, “Maix hoik naknon mai pie lhen ka aux, yuh bwanson krai aux mhong ka grawng ceu pa sang pon phyawk ka maix liak.”
11 Nawh ah nin ka bun an, “Phan kix phyawk aux ka maox khraox, pa ang nyang sax shiao tix bawg kawx, aux tak awn riang mai awm pui tang kaux heue.”
12 Delila teei maox khraox mai phyawk ka nawh ah nin ka nawh, “Samson eue, pui Philitix hoek ti puing ka maix, ” pui tiblah mox tix, jawm nawh ka daux lawg, viang mawh nan nawh rud ti tik maox pa koe ka piang taix tix awm gawng keei tix nyaing heue.
13 Delila ah nin ka Samson, “Tom yam in maix naknon mai pie lhen ka aux, krai aux mhong ceu pa sang pon phyawk ka maix liak, ” Mai nawh ah nin ka nawh, “Phan maix taing hauk aux, ka daux kraung taing aliah brawm mai tawk ti deuh ka ding, riang rao aux tak awn hu mai aux tak awm pui tang kaux heue.”
14 Delila taing hauk kaing nawh tom kaux aliah brawm ka daux kraung taing mai tawk jim tom kaux ka piang ding ah nin ka nawh, “Samson eue, pui Philitix hoek ti puing ka maix, ” Samson si duad mai bluh ti tik maox pa hoik taing mai jim an khaing kraung taing heue.
15 Bun an ah nin ka nawh, “Maix lai ah moh tix ka aux khawm ang maix tie koe rhawm rhi ka aux yuh ka mawx? Maix hoik pie lhen ka aux loe bawg phao mai ang cu tix krai aux mhong grawng dee koe riang rao pa ting maix heue.”
16 Bun an ah lox thux mai lak lheet tix nawh ka lox kuceu, ku singaix rhawm rhi Samson hoik kied laux tom dex sang yum tix,
17 nawh hoik krai pa koe daux rhawm tix khawmuik ka bun an, “Ang sax khlao hauk kaing tix, tix bawg kawx, mawh kheu aux hoik mawh pui Nazarix son Siyiex tom daux vaig miex aux, phan aux khlao hauk kaing tix, riang rao aux tak lih khaing aux mai aux tak awn riang aux tak awm pui tang kaux heue.”
18 Yam yaox Delila ka krai nawh pa koe daux rhawm tix, nawh ploi pui kok ka simiang pui Philitix ah nin, “Deeh hoek tix bawg ha! mawh kheu hoik krai nawh aux mhong pa koe daux rhawm tix khawmuik, ” Mai cub simiang pui Philitix hoek ka nawh mai viex mau hoek heue.
19 Khaix an Delila teem nawh it ka piang ngawng tix mai kok pui tix kaux khlao hauk kaing brawm nawh aliah nyaing, khaing kaing nawh, nawh hoik jah ti yuh krax kha rhawm ka nawh mai riang nawh hoik grai hu heue.
20 Bun an ah nin ka nawh, “Samson eue, pui Philitix hoek ti puing ka maix, ” Mawh kheu nan nawh yaog ti kaoh khaing dee it tix ah nin, “Aux tak sang lih hu awm phao ka mai nawh sau riang rao tix, ” Viang mawh nan nawh ang tawng ka hoik tik Simiang Siyiex tix heue.
21 Pui Philitix hoek giex nawh mai kuat sok ngai nawh lih, kix deeh viex nawh hu ka veng Gaza, kix phyawk nawh ka maox tawng mai kieh nawh krid mhaw daux thawng heue.
22 Hauk kaing nawh baox deeh kuah, khaix khlao kix heue.
Samson Yum Tau Mai Pui Philitix
23 Cub simiang pui Philitix khrawm paox tix, sonsang tan krax tan pa appong pa ting lhaong ka siyiex Dagon cie kix mai yuh krax pa gaux rhawm mai kix ah nin, siyiex ex hoik ap Samson pa mawh pui koeng ex, ka daux taix ex heue.”
24 Yam yaox pui khankix ka Samson, kix yaogyaw ka siyiex tix ah nin, “Siyiex ex hoik ap pui koeng ex ka daux taix ex, pa yuh haktiex ex laux mai pa kieh pui ex yum tom nie heue.”
25 Yam gaux rhawm kix, kix ah nin, “Kok Samson hoek ti klieh ex yaox, ” Mawh kheu nan kix kok Samson khaing daux thawng mai yaox ti klieh kix yaox, kix phyawk nawh ot ka sinax rong nyiex heue.
26 Khaix an Samson ah nin ka kawn nyawm pa tuk ka taix nawh, “Kieh aux giex rong nyiex vad in sonsang neung aux tix ka heue.”
27 Pui naog ka daux nyiex vad khawm simex khawm bun mai cub simiang pui Philitix kawx ot tan khawmuik, ka piang an pui pa hoek ti jhak yam klieh Samson, simex, bun, pa ot piang braux nyiex koe pui loe rheng kaux heue.
28 Samson rawg bwan ka Simiang Siyiex ah nin, “Simiang Siyiex eue, doh keud ka aux liak! Aux rawg Maix Cao deeh baox tawx riang rao ka aux, pie bawg in tix bawg khaing, Siyiex eue, sonsang deeh pawk aux bix tix ka pui Philitix, son sok ngai aux ra mu tix dum neh liak.”
29 Samson giex ka rong pa koe daux sigreung pa joh nyiex vad ra mu, nawh teei riang tix ka rong an, plak khawn dawm tix mu, plak khawn gwiex tix mu heue.
30 Samson rawg bwan ah nin, “Kieh aux yum tau mai pui Philitix, ” Nawh sau riang rao tix lih khawmuik mai nyheen ka rong mai nyiex vad an grhup ka piang simiang mai pui pa ot daux an khawmuik, mawh kheu nan pui pa hoik pah nawh yum yam im ju tix nie lheu khaing pa pah nawh yum yam yum tix heue.
31 Puxaik nawh mai paox nyiex keeing nawh hoek mai teei tokaux yum nawh ing, kix sipaung nawh ka sinax veng Zawrax mai veng Eshatawlax daux simeeig keeing nawh Manaw, nawh hoik prawng see ka piang pui Isarelax tixnga num heue.