15
Grawng Pex Samson Ka Pui Philitix
1 Yam hoek bawg yam vawg kix nghox ca, Samson viex kawn pex tix mu hu fi ka moeng tix ah nin, “Kieh aux laig ka daux lawg moeng aux liak.” Viang mawh nan paox nawh ang tawx akhwang laig nawh ka daux heue.
2 Paox nawh ah nin ka nawh, “Aux keud maix hoik koeng ka nawh tete mai aux hoik tawx paox grawm maix moeng nawh, pux bun nawh nie lheu mhawm khaing nawh ang mawh lie? Teei maix cie pux tang pux ke heue.”
3 Mai Samson deeh ah nin ka nawh, “Aux mawh pa luan khaing pa deuh pui Philitix phimap son grawng daux pa yuh aux krax pa kha rhawm ka kix heue.”
4 Samson hu mai giex sox praix loe yieh mu mai phyawk sidax sox praix an kix ra mu tau mai nawh vien ngu proh ka sinax toh sidax sox praix an kix heue.
5 Nawh keeig ngu ka proh an mai kieh sox praix an kix hu ka daux biang kaung pui Philitix khankix mai gleeing lhiem nghox khawm gawng nghox mai khawm sipeem plix siiet, sipeem khaox Sanlun kix khawmuik heue.
6 Pui Philitix khankix ah nin, “Mawh pui mawx pa yuh ceu in, ” Mai kix pawk lox ah nin, “Mawh Samson heue” Pui veng Timana, mawh kheu hoik teei nawh ti tawx moeng Samson ka paox grawm nawh, mawh kheu nan pui Philitix hoek ti gleeing bun an mai keeing nawh ka ngu heue.
7 Samson ah nin ka kix, “Awm hoik yuh pex ceu in, aux tak deeh pawk bix tix ka piang pex, khaix an aux tak naox pa yuh tix heue.
8 Mawh kheu nan nawh klah piang si-ang khaix kix mai ba kix pot mai pah kix mai lih hu haok ot ka daux rang Etham heue.
9 Pui Philitix lih hu mai yuh tab ka daux haktiex Yudax mai ploi pui tix naog hawt baoh Lehi heue.
10 Pui Yudax ah nin, “Pex hoek ti puing ka yix yuh ka mawx?” Kix pawk ah nin, “Yix hoek sonsang giex Samson mai sang yuh ka nawh awm hoik yuh nawh ka piang yix heue.”
11 Pui Yudax loe rheng hu ka daux rang Etham ah nin ka Samson, “Mawh ang maix tawng ka kwang pui Philitix ka piang yix lie? Maix hoik yuh ceu in ka piang yix kheu jao patix?” Nawh deeh ah nin ka kix, “Aux yuh ka kix awm pa hoik yuh kix ka aux heue.”
12 Kix ah nin ka nawh, “Yix hoek ti giex maix sonsang tawx maix ka pui Philitix, ” Samson deeh ah nin ka kix, “Tiextu gumlox pex ka aux, son ang tokaux cao pex pah aux heue.”
13 Kix krai ah nin ka nawh, “Yix ang pah maix! yix tak phyawk maix tom kaux mai ap maix ka taix kix, yix ang doh pah ka maix, ” Mai kix phyawk nawh ka maox ra nyaing mai viex lih khaing rang heue.
14 Yam hoek nawh ka baox Lehi, pui Philitix hoek riag yo mai nawh, khaix an khwan Simiang baox lih hoek ka piang nawh tom nie, maox phyawk ka piang taix nawh awm maox pa hoik gleeing ngu mai hoik gah khaing taix nawh heue.
15 Nawh yaox kap la pa taug khraox tix mu mai nawh teei an pah pui tix rheng kaux ka heue.
16 Khaix an Samson ah nin, “Aux hoik pah ti pum pui tix rheng ka kap la heue.”
17 Khaix hoik krai nawh ceu an nawh sivun kap la an mai nawh kok ceu kaux dee an mawh “Ramat Lehi heue.”
18 Nawh kied simie ti nyaux rawm mai rawg bwan ka Simiang Siyiex ah nin, “Maix Cao hoik tawx krax taoh pa ting lhaong in, ka daux tawm taix kawncau Maix Cao, yam in aux dex sang yum ka sang nyau nie tix rawm mai aux tak sang hoek ka daux tawm taix pui pa ang pat hak khankix lie?”
19 Mawh kheu nan Siyiex paoh daux tiex ka daux ngawd Lehi tan mai kieh rawm lih khaing tan, khaix hoik nyaux nawh rawm an nawh deeh koe riang mai pon toek bhawm tix, mawh kheu nan nawh kok ceu kaux dee an mawh Hakawra, pa koe ka daux Lehi tom in singaix heue.
20 Mai nawh hoik prawng see ka piang pui Isarelax tixnga num, daux bawg singaix kwang pui Philitix khankix heue.