1 Yephata pa mawh pui Gilat, mawh pui pa koe riang mai koe rhawm kwa rhawm vao, nawh mawh kawn simex bun coh kaux mai keeing nawh mawh Gilat heue. 2 Moeng Gilat keh kawn simex tom nie yam hoik ting lhaong kix ku kaux, kix grheu Yephata lih hu khaing kix ah nin ka nawh, “Maix tak ang pon ti koe sinngao tix ceu kawx, ka daux nyiex ma keeing yix, mawh kheu maix hoik mawh kawn simex bun tang kaux heue.” 3 Khaix an Yephata to khaing puxaik nawh khankix mai hu ot ka daux haktiex Tawbax, cub pui pa lu lia vu vie pa ang mhawm jhawm khankix, khrawm paox tix mai Yephata mai kix hawt khaix nawh heue. 4 Khaix hoik luan bawg yam tix baux, pui Amon yuh naing ka pui Isarelax heue. 5 Yam yuh pui Amon naing ka pui Isarelax khankix, kuad simiang haktiex Gilat khrawm paox tix hu kok Yephata khaing daux haktiex Tawbax heue. 6 Mai kix ah nin ka Yephata, “Hoek mai yuh cao kaing naing ting yix, sonsang pon yix ti puing ka pui Amon khankix heue.” 7 Mai Yephata deeh ah nin ka kuad simiang haktiex Gilat, “Pex hoik koeng ka aux mai hoik grheu aux lih khaing daux nyiex ma keeing aux ang mawh? Yam in pex lai hoek ka aux, yam koe krax pa laux rhawm ti yuh ka mawx?” 8 Mai kuad simiang haktiex Gilat deeh ah nin ka Yephata, “Kheu jao an yix hoik baox hoek ka maix yam in, hu tau mai yix mai puing ka pui Amon khankix sonsang kieh yix maix mawh cao kaing ka piang pui pa ot daux haktiex Gilat khankix heue.” 9 Yephata deeh ah nin ka kuad simiang haktiex Gilat, “Pex deeh viex aux ing ka daux nyiex mai puing ka pui Amon khankix, phan Simiang Siyiex ap kix ka aux, mawh sang kieh pex aux mawh cao kaing pex?” 10 Mai kuad simiang haktiex Gilat ah nin ka Yephata, “Phan yix ang cu ti yuh awm lox krai maix khankix Simiang Siyiex tak mawh mhai rug sinax ex heue.” 11 Khaix an Yephata lih hu mai kuad simiang haktiex Gilat mai pui an kix yaog nawh mawh cao kaing naing ting ka piang kix mai Yephata deeh krai lox ka plak sivoe Simiang Siyiex ka daux veng Mizapa tan heue. 12 Yephata ploi pui cau tix hu ka simiang pui Amon mai kieh kix ah nin, “Mawh koe aux grawng ceu patix ka maix, maix lai sang hoek puing ka haktiex ot aux?” 13 Simiang pui Amon pawk ah nin ka pui cau Yephata, “Jao hoik teei pui Isarelax haktiex aux khaix hoik lih hu kix khaing haktiex Ejiptux, jah khaing rawm klawng Anon, rawm klawng Yabok tom hoek ka rawm klawng Yawdan, mawh kheu nan yam in deeh tawx haktiex an kix ka daux pa nhim heue.” 14 Mai Yephata baox ploi pui cau tix hu ka simiang pui Amon, 15 mai kieh kix ah nin, “Yephata ah yuh nin, pui Isarelax khankix ang teei haktiex Mawbax mai haktiex pui Amon khankix heue.” 16 Yam lih hoek pui Isarelax khaing haktiex Ejiptux, kix lawng hu ka daux tiag tom hoek ka rawm sigrit sigra raoh pa mawh rawm sigrit sigra Edom mai kix bleeh ka yaong Kadesha heue. 17 Pui Isarelax khankix deeh ploi pui cau tix hu ka simiang Edom ah nin, “Yuh bwan son kieh yix tiang ka daux haktiex maix liak.” Viang mawh nan simiang Edom ang nghiet lox kix, Ref 11:17 Si 20:14-21. awm an kix deeh ploi pui cau tix hu ka simiang haktiex Mawbax, viang mawh nan nawh ang nghiet, mawh kheu nan pui Isarelax kawn kut ti ot daux yaong Kadesha tan heue. 18 Mai kix lih hu ka plak krax daux tiag mai via haktiex EdomRef 11:18 Si 21:4. mai haktiex Mawbax mai kix hoek ka haktiex Mawbax plak lih singaix mai kix ot ka plak toi rawm klawng Anon, yam an kix ang laig ka daux haktiex Mawbax, kheu mawh rawm klawng Anon mee haktiex Mawbax heue. 19 Khaix an pui Isarelax deeh ploi pui cau tix hu ka Sihong simiang pui Amawrix kwang ka veng Heshabon mai pui Isarelax ah nin ka nawh, “Yuh bwanson kieh yix tiang ka daux haktiex maix, sonsang hu yix ka dee ot tix heue.” 20 Viang mawh nan Sihong ang yum rhawm ka pui Isarelax, sonsang tiang kix ka dee pa kwang nawh, mawh kheu nan Sihong deeh khrawm pui tix khawmuik mai hu bang ka daux veng Yahat mai puing ka pui Isarelax heue. 21 Simiang Siyiex pui Isarelax, hoik ap simiang Sihong, khawm pui nawh ka daux taix pui Isarelax mai hoik pex ka kix, mawh kheu nan pui Isarelax rhim ti cie haktiex mai kraung khrai pui Amawrix pa ot daux haktiex an khawmuik heue. 22 Kix teei ti cie kraung khrai dee kwang pui Amawrix khawmuik, jah ka rawm klawng Anon, tom hoek ka rawm klawng Yabok, jah ka daux tiag, tom hoek ka rawm klawng YawdanRef 11:19-22 Si 21:21-24. heue. 23 Mawh kheu Simiang Siyiex hoik grheu pui Amawrix ka plak sivoe pui Nawh Cao, pa mawh pui Isarelax maix khex sang deeh teei lie? 24 Mawh ang pex pon teei ti cie haktiex pa tawx siyiex Khemosha, ka pex lie? Mawh kheu nan can haktiex pa hoik grheu Simiang Siyiex ka plak sivoe yix khankix, yix hoik pon ti cie heue. 25 Mawh lheu mhawm pex khaing Baliet kawn simex Ziphaw simiang haktiex MawbaxRef 11:25 Si 22:1-6. lie? Mawh hoik sax tieh nawh ka pui Isarelax lie? Mawh hoik sax puing nawh ka kix lie? 26 Glang kawn ot pui Isarelax ka daux yaong daux veng Heshabon khankix mai ka daux yaong daux veng hawt rawm klawng Anon loe yieh num, pex lai ang deeh pon teei an kix yuh ka mawx? 27 Aux ang koe krax lud ka maix, viang mawh nan maix hoik lud ka aux, kheu jao puing maix aux, kieh Simiang Siyiex mawh cao prawng see mai tat see ka daux sinax pui Isarelax mai pui Anon daux in singaix heue. 28 Viang mawh nan simiang pui Anon ang nghiet ka lox pa hoik ploi Yephata ka nawh heue. 29 Khwan Simiang Siyiex lih ka piang Yephata mai nawh preeng hu ka haktiex Gilat mai haktiex Manashe mai phlat hu ka veng Mizapa pa koe ka daux haktiex Gilat mai hu ka dee ot pui Anon khankix heue. 30 Yephata yuh lox mukheu ka Simiang Siyiex ah nin, “Phan Maix Cao sang ap pui Anon ka daux tawm taix aux tete, 31 Can pui pa liang ti lih khaing daux diang siviex nyiex aux mai rieb ka aux, yam deeh hoek aux daux krax pa nhim khaing pui Anon, tak mawh cie Simiang Siyiex mai tak tan ti tawx pui an mawh son krax tan pa gleeing heue. 32 Yephata lih hu ka plak dee ot pui Anon mai puing ka kix mai Simiang Siyiex ap kix ka daux tawm taix nawh heue. 33 Nawh hoik pex ka kix, jah ka veng Araw, tom hoek ka veng Minnit, khawm veng Abelax Keramin khankix tixnga veng tau mai krax pa kied pah kix pui yum, mawh kheu nan pui Anon khankix hoik som, ka plak sivoe pui Isarelax khankix heue.

34 Yam deeh hoek Yephata ka nyiex tix daux veng Mizapa, kawn bun nawh lih hoek ti rieb nawh tau mai tah tix chang mai graoh, nawh mawh kawn bun tix kaux khaing, lheu khaing nawh Yephata ang koe kawn simex tix kaux kawx heue. 35 Yam yaox Yephata ka kawn bun tix, nawh riah kraung ceep tix ah nin, “Kawn bun aux eue mai hoik kied kieh aux laux rhawm maix hoik mawh pui tuktiak ka aux, mawh kheu aux hoik krai lox ka Simiang Siyiex mai aux ang lai chix deeh tieh khaing grawng ceu an heue.”Ref 11:35 Si 30:2. 36 Kawn bun nawh deeh ah nin ka nawh, “Keeing aux eue, phan maix hoik krai lox ka Simiang Siyiex, yuh ka aux awm ceu pa hoik lih khaing daux jheeh maix, mawh kheu Simiang Siyiex hoik pawk bix son maix ka pui koeng maix pui Anon khankix heue. 37 Nawh deeh ah nin ka keeing tix, “Tawx akhwang ka aux liak, kieh aux ot nong nong ra khix, sonsang lailing aux ka piang gawng mai yiiem yo grawng mawh aux bun krih tau mai paox grawm tix khankix heue.” 38 Keeing nawh ah nin, “Hu heue, ” mai ploi nawh hu been ra khix mai nawh lih hu tau mai paox grawm tix mai yiiem yo grawng mawh tix bun krih ka piang gawng heue. 39 Khaix hoik naog bawg yam ra khix nawh deeh ing ka keeing tix mai keeing nawh yuh awm pa hoik koe lox mukheu tix, kawn bun an mawh pa ang nyang sax dex dawd mai simex, 40 mai ceu an hoik lih ti mawh been pa priex pa deuh pui Isarelax khankix, kawn bun pui Isarelax khankix lih hu tix num pon ngaix ku num, sonsang yiiem yo kix ka kawn bun Yephata pa mawh pui Gilat heue.