10
Grawng Tawlax
1 Khaix Abimaliet cao pa sang deeh taoh ka pui Isarelax khankix deeh lih tix koe mai nawh mawh Tawlax kawn simex Pu-a pa mawh kawn simex Dodo ceu pui Issakha nawh ot ka daux veng Shamira ka piang gawng Epharem khankix heue.
2 Nawh prawng see ka piang pui Isarelax tixnga loe num, khaix an nawh yum mai kix sipaung nawh ka daux veng Shamira tan heue.
Grawng Ya-irax
3 Khaix nawh deeh mawh Ya-irax ceu pui Gilat, mawh pa prawng see ka piang pui Isarelax khankix tixnga ra num heue.
4 Nawh hoik koe kawn simex tixngoe kaux, pa hoik brug la tixngoe mu, kix baox koe veng tixngoe veng mai kok ceu kaux veng an mawh Havot Ya-irax tom in singaix mai veng an kix hoik koe ka daux haktiex Gilat heue.
5 Ya-irax yum mai kix sipaung nawh ka daux veng Khamon heue.
Pui Isarelax Yaox Krax Yeen
6 Khaix an pui Isarelax khankix, baox deeh yuh pa caox caig, ka plak sivoe ngai Simiang Siyiex mai yuh kaing jhaw siyiex Balax mai siyiex Ashatariet, siyiex, Shurix, siyiex Sidon, siyiex Mawbax, siyiex pui Amon mai siyiex pui Philitix khankix, kix hoik tik vud ka Simiang Siyiex mai ang lai yuh kaing jhaw Nawh Cao heue.
7 Mawh kheu nan krax pa kied song rhawm Simiang Siyiex, hoik lih ka piang pui Isarelax mai Nawh Cao coh kix ka daux taix pui Philitix mai pui Amon khankix heue.
8 Jah ka daux num an kix hoik yuh krax tuk krax kha mai yeen yah ka pui Isarelax khankix kao daix num, pa ot ka praok toi rawm klawng Yawdan, dee ot pui Amawrix ka daux haktiex Gilat heue.
9 Lheu khaing an pui Amon khankix hoik tiang hoek ka plak toi rawm Yawdan, sonsang puing ka pui Yudax mai ka pui Benyamin mai ka doeh nyiex ma pui Epharem khankix, mawh kheu nan pui Isarelax kied yaox krax kha rhawm heue.
10 Pui Isarelax riag yo ka Simiang Siyiex ah nin, “Yix hoik lud ka Maix Cao, mawh kheu hoik tik vud yix ka Simiang Siyiex tix mai hoik hu yuh kaing jhaw siyiex Balax heue.”
11 Mai Simiang Siyiex deeh ah nin ka pui Isarelax, “Ang mawh Aux pa hoik taoh pex khaing pui Ejiptux, khaing pui Amawrix khaing pui Amon mai khaing pui Philitix khankix lie?”
12 “Yam ciyang pui Sidon, pui Amaliet mai pui Mawnix ka piang pex, pex riag yo ka Aux mai Aux hoik taoh pex khaing daux taix kix heue.”
13 “Viang mawh nan pex hoik tik vud ka Aux mai hu yuh kaing jhaw siyiex tang kaux, mawh kheu nan Aux tak ang lai baox deeh taoh pex heue.”
14 “Lih hu mai riag yo ka siyiex pa laug pex ti teei khankix, kieh kix deeh taoh pex yam hoek pex krax laux rhawm heue.”
15 Khaix an pui Isarelax khankix deeh ah nin ka Simiang Siyiex, “Yix hoik lud, yuh ka yix awm pa koe alo Maix Cao, yix rawg Maix Cao deeh taoh yix daux in singaix khaing heue.”
16 Mawh kheu nan kix tik vud siyiex tang meung pa koe daux sinax kix mai deeh yuh kaing jhaw Simiang Siyiex mai rhawm rhi Nawh Cao, ang lai pon yaox krax kha rhawm pui Isarelax khankix heue.
17 Pui Amon khrawm paox tix mai hu yuh tab ka haktiex Gilat, pui Isarelax khankix kawx deeh baox khrawm paox tix mai hu yuh tab ka veng Mizapa heue.
18 Cao kaing haktiex Gilat khankix ah nin ka paox tix ti kaux lai ti kaux, “Mawh pui mawx pa sang jah ti puing ka pui Amon, nawh tak pon ti mawh cao kaing ka piang pui pa ot ka daux haktiex Gilat khankix heue.”