12
See Yephata Mai Pui Epharem
1 Pui Epharem khankix khrawm paox ti mai tiang hu ka plak veng Zaphon ah nin ka Yephata, “Yam hu puing ka pui Anon maix ang kok yix hu tau mai tix yuh ka mawx? Yix tak gleeing nyiex maix ka ngu ka piang maix heue.”
2 Yephata deeh ah nin ka kix, “Yam yuh lung pui aux khawm cao aux ti puing ka pui Anon khankix, yam kok aux ka maix, maix ang deeh taoh aux khaing daux tawm taix kix heue.
3 Yam hoik yaox aux ka ang maix taoh tix, aux tan ju tix mai hu puing ka pui Anon mai Simiang Siyiex ap kix ka daux tawm taix aux, pex lai sang hoek puing ka aux yuh ka mawx?”
4 Yephata deeh khrawm pui Gilat khawmuik mai puing ka pui Epharem khankix, pui Gilat pah ka pui Epharem, kheu jao ah kix nin, “Pex pa mawh pui Gilat hoik mawh pui Ephrem pa ot khaing sinax pui Epharem mai khaing sinax pui Manashe heue.”
5 Pui Gilat pau diang rawm klawng Yawdan sivoe pui Epharem, yam hoek pui Epharem pa pon to ti klawd tiblah ah nin, “Kieh aux tiang liak?” Pui Gilat deeh ah nin ka nawh, “Mawh maix pui Epharem lie?” Phan nawh ah ang mawh!
6 Kix tak sang ah nin ka nawh maix cheu ah gumlox Shibawliet, mai nawh deeh ah Sibawliet, mawh kheu kix ang chix ah gumlox an sidawng, kix tom giex nawh mai pah nawh hawt diang rawm klawng Yawdan, pui Epharem pa hoik yum yam an koe pon mheen ra rheng kaux heue.
7 Yephata hoik prawng see ka piang pui Isarelax liah num, Yephata pui Gilat yum mai kix sipaung nawh ka daux veng pa koe daux haktiex Gilat heue.
Grawng Ibazan, Elon Mai Abadon
8 Khaix Yephata pui veng Bieliehiem pa mawh Ibazan deeh yaog ti mawh cao prawng see ka pui Isarelax heue.
9 Nawh koe kawn simex tixngoe kaux mai kawn bun tixngoe kaux, nawh kieh kawn bun tix, teei pui tang ceu mai nawh deeh teei kawn bun pui tang ceu tixngoe kaux, son kawn simex tix khankix, nawh hoik prawng see ka piang pui Isarelax aliah num heue.
10 Khaix an Ibazan yum mai sipaung nawh ka daux veng Bieliehiem heue.
11 Khaix Ibazan, Elon ceu pui Zebulun deeh mawh cao prawng see ka piang pui Isarelax kao num heue.
12 Mai Elon ceu pui Zebulun yum mai kix sipaung nawh daux veng Aiyalon daux haktiex Zebulun heue.
13 Khaix Elon, Abadon kawn simex Hilelax pui veng Piraton deeh mawh cao prawng see ka piang pui Isarelax heue.
14 Nawh koe kawn simex tix pon kaux mai kawn saux tixngoe kaux, pa brug kawn la awn atixgliah mu, nawh hoik prawng see ka piang pui Isarelax daix num heue.
15 Khaix an Abadon kawn simex Hilelax pui veng Piraton yum, kix sipaung nawh ka daux veng Piraton, pa koe ka daux haktiex Epharem, ka piang gawng pui Amaliet heue.