1 Abimaliet kawn simex Yerubalax hu ka veng Shekhim, dee ot pux miex tix mai nawh sikah tau mai kix mai ka paox nyiex keeing nawh ah nin heue. 2 “Krai pui pa ot daux veng Shekhim khankix mhong, mhawm krax kwang kawn simex Yerubalax atixgliah kaux ka piang pex lie? Phan ang mawh nan mhawm krax pa kwang pui tix kaux ka piang pex lie? Doh keud ka mawh aux nex nham pex heue.” 3 Paox nyiex ma keeing nawh deeh krai pui veng Shekhim mhong lox in mai kix tat rhawm tix sonsang hawt khaix Abimaliet, mawh kheu kix hoik ah nin, “Nawh mawh puxaik yix heue.” 4 Mawh kheu nan kix teei ti tawx mau atixgliah shekhe khaing daux nyiex vad Balax Berit ka nawh, Abimaliet deeh cang pui pa lu lhia vu vie mai pui pa ang cu nghiet ka mau an heue. 5 Khaix an nawh hu ka nyiex keeing tix, ka daux veng Awpharax mai pah puxaik nawh khankix, pa mawh kawn simex Yerubalax atixgliah kaux ka piang rang, viang mawh nan Yawtan kawn ghoik Yerubak pon glawd kheu jao mox nawh tokaux tix heue. 6 Pui veng Shekhim mai pui veng Bietmilaw khankix khrawm paox tix mai yaog Abimaliet mawh simiang tix, hawt praok tiag khaox tiah, ka dee koe rong simaox ka daux veng Shekhim heue.

7 Yam hoik krai kix grawng an ka Yawtan, nawh lih hu mai cung ka piang choek gawng Gerazim, nawh yo lox tix ah nin ka kix, “Pex pui veng Shekhim khankix eue, sonsang nghiet Siyiex lox pex heue.” 8 Daux tix bawg, khaox khankix hu, sonsang yaog simiang tix kaux, pa sang kwang piang kix mai kix ah nin ka khaox Sanlun, “Kwang ka piang yix liak.” 9 Yam an khaox Sanlun deeh ah nin ka kix, “Mawh sang tik aux bee tix pa yaogyaw pui min plakngai Siyiex mai min plakngai kawn pui khankix mai kwang ka piang khaox ankix lie?” 10 “Khaix an, khaox an khankix, deeh ah nin ka khaox ruh, hoek maix kwang ka piang yix liak? 11 Mai khaox ruh deeh ah nin ka kix, mawh sang tik aux rawm pa tie tix mai khawm plix pa mhawm tix mai hu kwang ka piang khaox an kix lie?” 12 Khaix an khaox khankix deeh ah nin ka nhu plix siiet, “Hoek maix kwang ka piang yix liak.” 13 Mai nhu plix siiet deeh ah nin ka kix, “Mawh sang tik aux rawm plix siiet khraox tix, pa tawx krax nyawm rhawm ka Siyiex mai ka pui khankix mai hu kwang ka piang khaox an kix lie?” 14 Khaix an khaox khankix deeh ah nin ka pang kat, hoek maix kwang ka piang yix liak! 15 Mai pang kat deeh ah nin ka khaox khankix, phan pex sang yaog aux mawh simiang pa kwang ka piang pex tete, hoek ot greem veei aux, phan pex ang rhawm ot greem veei aux ngu tak lih khaing daux pang kat mai gleeing ti tik khaox gix, pa koe ka piang gawng Lebanon khankix heue. 16 “Yam in pex yaog Abimaliet mawh simiang tix, mawh hoik yuh pex ceu an ka daux pa mawh meh mai daux pa rahsee lie? Ka Yerubalax mai khawm paox nyiex nawh khankix kawx, pex caw ti yuh pa khaw pa mhawm, ceu pa yuh pex an kix mawh pa caw nawh ti pon ang mawh lie?” 17 “Keeing aux hoik puing naing son pex mai hoik kham ti tawx ju tix, sonsang deeh taoh pex, khaing daux tawm taix ceu pui Midian khankix heue.” 18 Viang mawh nan pex hoik tieh feen ka nyiex ma keeing aux, daux in singaix mai pah kawn simex nawh atixgliah kaux, ka piang rang mai pex hoik kieh Abimaliet kawn simex kawncau bun nawh, mawh simiang ka piang pui veng Shekhim, kheu hoik mawh nawh puxaik pex heue.” 19 “Yam in phan pex yuh ceu pa mawh meh mai pa rahsee ka Yerubalax tau mai pao nyiex nawh, kieh pex koe krax gaux rhawm tau mai Abimaliet mai nawh tak koe krax gaux rhawm tau mai pex heue.” 20 “Phan ang mawh nan kieh ngu lih khaing daux Abimaliet mai yuh pui veng Shekhim khankix mai pui veng Biet Milaw khankix laux leeing, phan ang mawh nan kieh ngu deeh lih khaing pui veng Shekhim mai khaing pui veng Biet Milaw khankix, deeh hu gleeing Abimaliet laux leeing heue.” 21 Khaix an Yawtan to hu ka veng Berax mai ot tan kheu jao lhat nawh ka pux ke tix Abimaliet heue.

22 Khaix hoik kwang Abimaliet ka pui Isarelax loe num, 23 Siyiex ploi khwan pa caox hoek ka piang Abimaliet mai pui veng Shekhim kix ang lai kaux sijax ka Abimaliet, 24 grawng see in mawh pa hoik yuh nawh ka piang kawn simex Yerubalax atixgliah kaux, pa deeh hoek ka piang nawh mai nham phimap kix tak mawh pa glup ka piang puxaik Abimaliet, pa hoik pah ka kix mai ka piang pui veng Shekhim, pa hoik teem nawh pah ka puxaik ti heue. 25 Pui veng Shekhim kieh pui kix yuh naing jhawm ka Abimaliet mai deuh pui ka piang choek gawng mai yuh con ka pui pa hu khre hawt baoh an khawmuik, Abimaliet deeh mhong ka grawng an heue. 26 Galax kawn simex Ebiet mai puxaik ti khankix hoek ka veng Shekhim, pui veng Shekhim deuh rhawm ti ka nawh heue. 27 Kix lih hu ka daux kaung mai teei plix siiet, khaing daux sipeem plix siiet, sonsang yuh kix krax gaux rhawm kix biiet rawm plix siiet mai an kix laig ka daux nyiex siyiex tix mai nyaux rawm plix siiet tan mai jhax lawg ka Abimaliet heue. 28 Galax kawn simex Ebiet ah nin, sonsang yuh ex kaing jhaw nawh, Abimaliet mawh pui pa yuh ka mawx? Mai Shekhim kawx mawh pa yuh ka mawx? Nawh mawh kawn simex Yerubalax mai Zebulax hoik mawh cao kaing nawh ang mawh lie? Kieh ex yuh kaing jhaw pui Hamaw, pa mawh keeing Shekhim, jao patix ex lai sang yuh kaing jhaw Abimaliet” 29 “Phan pui inkix hoik ot ka daux tawm taix aux, aux tak gah Abimaliet, mai krai ah nin ka Abimaliet, baox khre kru naing maix mai lih hoek heue.” 30 Yam mhong Zebulax pa kwang veng ka gumlox Galax kawn simex Ebiet, krax song rhawm nawh hoik kaoh dom mawx dom an heue. 31 Nawh yuh cuyi mai ploi cao cau khankix hu ka Abimaliet mai kieh kix ah nin ka nawh, “Galax kawn simex Ebiet mai puxaik nawh khankix, hoik hoek ka veng Shekhim mai kix ot tin, ” yam in kix hoik yuh veng tix kaux cong sonsang puing ka maix heue. 32 “Mawh kheu nan daux sawm in maix khawm pui pa ot tau mai maix khankix, kaoh mai hu jawm ti pau kix ka daux kaung heue.” 33 Maix kaoh plak ponngawb caocao yam lih singaix mai hu laig sijaox ka daux veng, yam lih hoek nawh tau mai pui nawh khankix ka maix, maix tak pon ti yuh ka kix, awm pa khaw maix ti yuh heue.” 34 Mawh kheu nan Abimaliet mai pui pa ot tau mai nawh khankix, kaoh ka daux ponsawm mai hu jawm ti pau veng Shekhim tau mai pui naing pon cub heue. 35 Yam lih cung Galax kawn simex Ebiet mai pui nawh ka diang siviex veng, Abimaliet mai pui ot tau mai nawh, yaog ti kaoh khaing dee jawm kix ti pau heue. 36 Yam hoik yaox Galax ka pui khankix nawh ah nin ka Zebulax, “Jhak heue, pui khankix hoik lih khaing choek gawng, viang mawh nan Zebulax deeh ah nin ka nawh, maix hoik yaox veei gawng awm mawh jung pui khankix heue.” 37 Mai Galax baox ah nin, “Jhak heue, pui khankix hoik lih jee khaing sigreung gawng mai an tix cub kaoh khaing Divina pa mawh Mawnenim, dee koe khaox tiah khankix heue.” 38 Khaix an Zebulax deeh ah nin ka nawh, “Awm pa hoik ah maix, ex lai sang yuh kaing jhaw nawh, Abimaliet mawh pui pa yuh ka mawx lie? pui in kix hoik mawh pa sibriem maix ka ang mawh lie? Lih hu mai puing ka kix yam in heue.” 39 Mawh kheu nan Galax lih hu mai thong pui veng Shekhim khankix puing ka Abimaliet heue. 40 Abimaliet hawt pheet ka nawh mai Gilax pon to khaing nawh mai pui nawh khankix hoik kied mat tom nie mai yum hawt daux diang siviex veng heue. 41 Khaix an Abimaliet ot ka daux veng Aruma mai Zebulax grheu Galax mai puxaik nawh khankix, son ang kix lai pon ti ot ka daux veng Shekhim heue. 42 Yam hoek ka daux singaix khaix Abimaliet mhong grawng sang lih hu pui khankix ka daux kaung, 43 mawh kheu nan nawh deeh kok lien ti khankix mai gwieh kix koe loe cub mai kieh kix hu jawm ti pau ka daux kaung mai jhak ti yaox ka kix, yam yaox lih pui khankix khaing daux veng, kix yaog ti kaoh mai hu puing ka kix heue. 44 Abimaliet mai cub pui naing pa ot tau mai nawh, nied ti hu mai pau diang siviex laig daux veng mai tang cub nied tix lih hu ka pui pa hoik ot daux kaung khankix mai pah ti tik kix heue. 45 Abimaliet puing ka veng an leeing lang singaix mai pah pui pa ot ka daux veng khankix mai yieh guh veng khankix laux leeing mai ruat kih ka piang dee laux guh veng heue. 46 Yam mhong pui pa ot ka piang nyiex pau tab Shekhim khankix ka grawng an, kix laig ot ka dee kaux cong pa mawh nyiex vad Berit heue. 47 Yam hoik mhong Abimaliet, pui khankix pa ot ka daux nyiex pau tab veng Shekhim, hoik khrawm paox ti tau heue. 48 Abimaliet lih hu ka piang gawng Zalamon tau mai pui nawh khankix Abimaliet viex moe ti mag daux taix tix mai kid kak khaox tix gawng, nawh teei kak khaox an mai klawm hu ka piang klip ti ah nin ka can pui pa ot tau mai nawh khankix, yaox pex yuh aux ka mawx pex nied ti hawt yuh awm pa hoik yuh aux heue.” 49 Awm an pui ku kaux kid kak khaox cie ti mai hawt khaix Abimaliet mai deuh ka dee pa kaux cong ot pui an, kix keeig ngu ka nyiex pau tab pa kaux cong ot kix simex khawm bun pa ot ka daux nyiex pau tab Shekhim khankix yum tix rheng kaux heue. 50 Khaix an Abimaliet deeh hu ka veng Tebiet mai kix lai lawm ka veng Tebiet mai puing ka veng an heue. 51 Viang mawh nan nyiex pau tab pa kaux cong kawn koe tix mu ka daux veng, pui veng khankix to laig tan mai nyeep siviex ka plak daux mai kix haok ka piang choek nyiex pau tab an heue. 52 Abimaliet hoek dex nyiex pau tab an mai puing ka dee an mai nawh greed tix dex siviex nyiex pau tab an, sonsang keeig ka ngu heue. 53 Bun tix kaux teei simaox mhaw tix plak dheem ka piang kaing Abimaliet mai kaing nawh max heue. 54 Nawh nied ti kok kawn lien pa viex kraung naing ti ah nin ka nawh, “Lawd vaig maix mai pah ka aux, “Phan ang mawh nan aux lhat pui khankix ah nin ka tix, “Mawh bun pa pah ka nawh, “mawh kheu nan kawn lien nawh suat nawh ka vaig tix mai nawh yum tan heue. 55 Yam yaox pui Isarelax khankix ka hoik yum Abimaliet, kix ku kaux lih hu ka dee ot cao ti heue. 56 Mawh kheu nan Siyiex deeh pawk pa caox caig ka Abimaliet, pa hoik yuh nawh ka keeing ti, ka hoik pah nawh puxaik ti khankix atixgliah kaux heue. 57 Pa caox caig yuh pui veng Shekhim khankix Siyiex hoik deeh kieh hoek ka piang cao kix mai awm lox pa hoik jhax lawg Yawtan kawn simex Yerubalax, hoik hoek ka piang kix khawmuik heue.