1 Yawbax deeh pawk lox ah nin heue. 2 “Mawh heue, aux tawng lox an mawh pa mawh meh, viang mawh nan, sang pon rahsee kawn pui sivoe ngai Siyiex miex ding? 3 Phan Siyiex koe rhawm ti sang deuh phimap ka pui tix kaux kaux, khaing ka daux tix rheng bawg nawh tak ang lai deeh pon pawk ka Nawh Cao pie tix bawg kawx. 4 Siyiex mawh pa koe pingnya pa daox deng, koe sibrawm mai ting riang rao heue. Mawh pui mawx pa sang pon tiextu mai pon pex ka Nawh Cao? 5 Nawh Cao gah gawng lua mai kix ang tien tawng, Nawh Cao pluk pliak ti tik kix ka daux pa song rhawm tix, 6 Nawh Cao yung yang haktiex kieh greed khaing dee ot nawh mai rong khankix kawx pung pang heue. 7 Nawh Cao tawx lox ka singaix mai ang kieh lih, Nawh Cao tie ka simuing khankix, 8 Nawh Cao nih ti kheem ka raoma mai dig piang pukpak rawm sigrit sigra khankix, 9 Nawh Cao hoik phan hoik deuh simuing Ashax, simuing Khatilax mai simuing Khimax, Ref 9:9 Job 38:31; Amo 5:8. an khankix mai cub simuing pa koe ka plak seh, 10 Nawh Cao yuh kaing ceu pa kied ting lhaong pa ang ex lai dak pon tawng, Mawh heue, krax pa daox deng mawh pa ang lai uik simin ka heue. 11 Nawh Cao hu ka plak sivoe aux, aux ang chix yaox ka Nawh Cao, Nawh Cao luan hu sivoe aux mai aux ang tien tawng kah. 12 Phan Nawh Cao teei ti priex hu dee singai, pui mawx pa sang pon tiebtie Nawh Cao lie? Mawh mawx pa pon ah nin ka Nawh Cao yuh Maix Cao patix lie? 13 Phan Siyiex ang deeh yoi krax pa song rhawm tix, cub pa yuh paox pie pa lhaong rhawm khankix, tak phawng laux greem Nawh Cao heue. 14 Ka piang an aux tak sang deeh pawk ka Nawh Cao yuh ka mawx? Laug ti teei gumlox pa yuh ka mawx sonsang krai sivoe ngai Nawh Cao? 15 Viang aux rahsee kawx aux ang lai pon pawk lox ka Nawh Cao, aux tak khyox khaw ka cao pa prawng see rahsee piang aux heue. 16 Viang Nawh Cao deeh pawk lox pa kok aux kawx aux tak ang lai yum rhawm, ka nghiet Nawh Cao ka lox tix heue. 17 Grawh grawng nawh, Nawh Cao yuh aux laux leeing ka bhaung ting mai baox kieh jhawm saux haoh hun piang nex aux, pa ang koe grawng koe ceu heue. 18 Nawh Cao ang tawx akhwang sang sileed aux bhawm tix mai kieh jhawm saux pa kiied kin naog piang aux heue. 19 Phan ah een rhawm tix ka riang rao tix ceuceu, Nawh Cao mawh pa kiied ting riang rao, mai phan ah mawh pa rahsee, mawh pui mawx pa tak sang mawh mhai rug plak aux ka daux nyiex prawng see lie? 20 Viang aux ah mawh tix pa rahsee kawx, jheeh aux mawh pa ciyang ka aux, viang aux ah mawh tix pa hoik grum naog kawx, rhawm pa kawk vawk aux hoik si dawng sivoe Nawh Cao heue. 21 Phan aux mawh pa grum naog kawx, aux ang nyang tawng ka tokaux cao tix, aux laux rhawm ka ju cao tix heue. 22 Awm lox pa sang krai aux khankix mawh yuh nin, Nawh Cao tak yuh pui pa ang koe dee deuh phimap mai khawm pui caox caig khankix laux leeing heue 23 Phan jhawm saux preng mawh pa viex krax yum hoek tix taix neh, Nawh Cao tak nyiah ka krax kham geu pui pa ang koe phimap heue. 24 Haktiex in hoik ap ti tawx ka daux tawm taix pui caox caig heue. Nawh Cao tieb thox ngai cao prawng see khankix heue. Phan ang mawh Nawh Cao, mawh pui mawx pa sang pon prawng see an lie? 25 Singaix aux nie lheu phai khaing pui pa to tix kaux, kix to dee singai kawx mai ang yaox ka pa mhawm heue. 26 Kix nie lheu phai khaing reu ting mai luan hu awm teei klang krih totiag ih cao tix heue. 27 Phan aux ah nin, aux tak piawm ka lox riag yo tix mai aux tak peeik ti tik ngai baoh pa khi rhawm tix mai deeh ceep ka ceu pa nyawm rhawm, 28 aux lhat graung ka ceu pa kham geu tix khawmuik, aux tawng ka ang Maix Cao lai giex ti deuh aux awm pui pa ang koe phimap heue. 29 Phan aux yaox mawh tix pui koe phimap, yuh ka mawx aux lai kawn coca ti yuh kaing pa giex going kheu jao patix lie? 30 Phan aux sigrhah tokaux tix ka rawm rha mai khoek taix tix sonsang singax ka sidah khoek kawx, 31 Maix Cao tak nyhot aux laig ka daux tiex mai kraung ceep aux khankix tak seeing ka aux. 32 Grawh grawng nawh, Nawh Cao ang mawh kawn pui awm aux, sonsang pon pawk aux lox Nawh Cao mai ex tak hu ka dee prawng see tau mai paox tix heue. 33 Ang lai koe pui pa sang ah grawng ceu an ka sinax ex, pa tak sang deuh taix tix piang ex khawm ra lie? 34 Kieh Nawh Cao teei khaox gix tix hu singai khaig aux mai paw kieh aux lhat graung ka pa ghlat Maix liak. 35 Khaix an aux tak sikah ka daux pa ang koe krax lhat graung ka Nawh Cao, viang mawh nan rhawm aux ang lai koe yuh nan tete heue.