1 “Khwan aux hoik ngau ka ju aux, aux tak kieh ceu pa ngau tix hoek piang tix, aux tak sikah ka daux krax pa kied song rhawm khwan tix heue. 2 Aux tak ah nin ka Siyiex, paw nyang ciyang aux liak jhi aux yaox grawng deuh Maix Cao phimap ka aux heue. 3 Mawh yaox Maix Cao ceu pa yeen ya in khankix mawh pa mhawm mai seeing brai ka kaing pa yuh Maix Cao ka taix tix mai khaw tix tawx bwan piang krax keud pui caox caig lie? 4 Mawh koe ngai Maix Cao awm nex nham lie? Phan ang mawh nan mawh yaox Maix Cao awm pa yaox kawn pui lie? 5 Mawh awm singaix Maix Cao singaix kawn pui khankix lie? Mawh awm num Maix Cao singaix sawm simex ting riang rao tix kaux lie? 6 Kheu Maix Cao lai sawg ka krax pa lud aux mai sonsang yaox tix ka phimap aux, 7 viang Maix Cao tawng ka ang aux mawh pui lud mai ang lai koe pui tix kaux kawx pa sang taoh aux lih khaing daux tawm taix Maix Cao. 8 Plawng taix Maix Cao hoik phan hoik yuh pakpeung aux koe mhawm mhawm, viang mawh nan, Maix Cao tak sang deeh yuh aux laux leeing heue. 9 Doh keud ka hoik phan yuh Maix Cao aux ka tiex heue. Maix Cao sang deeh kieh aux mawh phawng tiex lie? 10 Ang hoik mawh Maix Cao pa rauk aux lih awm rawm teeih mai kieh aux kiien awm klon rawm teeih, 11 mai lhop aux ka hak mai nex mai kleuk si-ang mai siniag aux khankix kaux tau ang mawh lie? 12 Maix Cao hoik kieh aux im ju mai hoik nawb bwanson ka aux mai Maix Cao hoik liem lia kia ngien ka khwan aux heue. 13 Ceu inkix hoik mawh pa mox Maix Cao ka daux rhawm tix, aux hoik tawng mawh in pa koe tau mai Maix Cao, 14 phan aux lud, Maix Cao hoik mhai ti deuh ka aux mai ang pluat ploi aux khaing krax pa lud aux heue. 15 Phan aux mawh pui caox, aux tak pon krax kha rhawm, viang aux rahsee kawx, aux ang lai pon yaog kaing tix heue. Aux hoik naog ka pa kaig tua, jhak ka pa laux rhawm aux liak. 16 Phan aux yaog tokaux tix lhaong, Maix Cao tak leue aux awm sivai sangsi pa kied kwa mai Maix Cao deeh jhi krax lhat graung pa daox deng tix ka aux heue. 17 Maix Cao hoik plak jhi mhai rug pa lud aux mai kieh krax pa song rhawm Maix Cao nie haoh hun piang aux, Maix hoik khre naing pa khraox ka son aux ku jheeng heue. 18 Kheu Maix Cao lai viex aux lih khaing daux vaig miex tix? Phan ang mawh nan aux hoik yum ka ang pui nyang yaox aux ka ngai tix heue. 19 Pa ang caw ti mawh ka aux hoik lih ti mawh. Pa teei aux lih khaing daux vaig miex tix mai hoek ka daux simeeig heue. 20 Singaix sawm khankix hoik mawh pa dawg sawn aux ang mawh lie? Prah aux ot nong nong, sonsang koe krax nyawm rhawm aux daux bawg yam pa deuk ceeix, 21 sivoe sang hu aux ka dee pa ang aux lai yaox tix ing, ka haktiex pa faik mai ka veei pa yum khankix, 22 pa mawh haktiex pa faik awm ponsawm mai veei yum, pa ang lai koe ceu pa riang pie tix bawk kawx, ka dee mawh pa riang an awm pa faik heue.”