1 Khaix an Biladat ceu pui Shua pawk lox ah nin, 2 “Mawh kawn sang sikah maix grawng ceu in miex grheung lie? mai lox jheeh maix khankix kawn sang awm bhaung ting miex grheung lie? 3 Mawh yuh Siyiex krax prawng ca tix ang rahsee lie? Phan mawh nan, mawh pluk pliak Siyiex pa ting sibrawm pa rahsee tix lie? 4 Phan kawn simex maix khankix yuh phimap mai phi lud ka Nawh Cao, Nawh Cao hoik teei ti tik kix kheu jao pa lud kix heue. 5 Phan maix tak sawg Siyiex ka daux krax pa singax rahsee rhawm tix mai khyox khaw ka cao pa ting sibrawm. 6 Phan maix hoik mawh pa singax mai pa rahsee, yam in Nawh Cao tak kaoh son maix tete mai kieh maix haok hwan ting lhaong ka daux krax pa rahsee can dee ot koe maix heue. 7 Yam jah, viang maix hoik mawh pa iak kawx, dee sidah sidu maix tak ting lhaong haok hwan heue. 8 Yuh bwanson chawk cheng ti yaox ka grawng pa hoik luan ka kuad riex ju mai keud ti yaox ka can ceu pa hoik gau keeing maix khankix mawh patix, 9 grawh grawng nawh, ex mawh kawn pa keh kawx ngie khaing mai ex ang tawng ka tidtix, mawh kheu singaix baux ju ex piang haktiex in, mawh ngie pang peue khaing heue. 10 Mawh ang kix gau maix mai ang krai maix mhong lie? mai ang kix krai lox pa tawng kix daux rhawm tix lie? 11 Mawh chix kuah pang jo ka dah dee ang tiex leet lie? mai mawh chix klai rib kuah hawt klawng yam ang rawm koe lie? 12 Viang ang kid glang yam kawn klai lhax kawx, an kawn nie yie fit sivoe pang tang ceu heue. 13 Awm an daux krax hu can pui pa piawm ka Siyiex khankix mai krax keud pot jun pot pui kin jhawm khankix tak laux tak leeing, 14 Can ceu pa een kix rhawm tix ka tak mawh pa dud mai can ceu pa deuh kix rhawm tix kawx tak awm nyiex greeih heue. 15 Nawh peung ka nyiex tix, viang mawh nan, ang kaux cong heue. Nawh giex ka nyiex an, viang mawh nan nyiex an ang kaux heue. 16 Nawh ting lhaong mai klai ka daux koek mai kak nawh khankix dih tix tah hu ka daux sipeem nawh heue. 17 Riah nawh hoik vung viien ti ka vung viang pum simaox mai ot ka sinax rang khankix heue. 18 Phan nawh mawh pa laux leeing khaing daux dee ot tix, khaix an dee an tak thiang ti tik nawh ah nin, aux ang sax yaox maix heue. 19 Jhak heue, krax pa gaux rhawm nawh, nawh tak awm in mai khaing ka daux haktiex nawh pui tang ceu tak kuah ka heue. 20 Jhak heue, Siyiex tak ang lai tik vud ka pui pa kaux sijax mai rahsee mai Nawh Cao ang lai teem ka pui pa caox caig khankix heue. 21 Nawh Cao tak sang kieh jheeh maix nyiah mai kieh siyieb jheeh maix koe krax pa gaux rhawm heue. 22 Can pui pa koeng ka maix tak ceep tix ka pa kaig tua mai dee ot koe pa caox caig tak hoek krax som nai heue.”