1 “Mawh ang kawn pui yaox tix taug mao yam ot tix piang haktiex in lie? Bawg yam singaix pa yaox nawh tix ot khankix, ang hoik awm pui pui vai tix kaux lie? 2 Awm siliex tix kaux pa keud ce sonsang klip singaix mai awm pui vai tix kaux, pa ca keud ce ka son ngawh riang tix khankix, 3 mawh kheu nan aux hoik yaox ti kham geu pa kha rhawm tix kaing khix tix khix hoik tix khix mai krax pa taug mao aux daux ponsawm kawx hoik mawh nyum cie aux heue. 4 Yam it aux, aux ah nin, mawh sang kaoh aux yam mawx! mai mawh sang sidah sawm yam mawx lie? Grawh grawng nawh aux hoik tieh jee tieh blaong tix tom bah riang praix heue. 5 Graik mai phawng tiex khankix hoik kheem piang nex aux awm kraung ceep mai hak hoik bih tix mawh leem heue. 6 “Baux singaix aux nie lheu phai khaing breeing keei taing khankix mai hoik luan hu ka daux pa ang koe krax keud pot jun pot heue. 7 Kieh aux doh keud ka ju tix awm toek ex bhawm khaing, ngai aux tak ang lai baox yaox ka ceu pa mhawm heue. 8 Ngai pui pa yaox ka aux tak ang lai baox yaox ka aux, yam simi ngai Maix Cao piang aux, aux hoik grai hu heue. 9 Awm prung prang grai paiawm dee singai, mawh kheu nan pui pa lih ka daux simeeig khankix kawx tak ang lai yaox tix deeh hoek heue. 10 Nawh tak ang lai yaox tix deeh ing ka nyiex tix, dee ot dee koe nawh, tak ang lai tawng ka nawh tix bawg kawx heue. 11 Mawh kheu nan aux tak ang lai nyeep ka jheeh tix mai khwan aux tak sikah ka daux pa taug mao tix, aux tak bawgbe ka daux pa laux rhawm tix heue. 12 Khex mawh aux rawm sigrit sigra, phan ang mawh nan mawh siyawng pa deuh Maix Cao mawh cao pa pau tix kia piang aux lie? 13 Yam ah aux nin, dee it aux tak tawx krax nyawm rhawm aux mai ku it aux tak sang tawx krax pa nyawm pa nyiah aux, 14 khaix an Maix Cao ghlat aux ka krax pa camaox tix mai kieh aux yaoh yee ka riang susai khankix, 15 aux kawn laug ti teei krax pa yum mai krax yum tak nie lheu mhawm khaing krax pa lhawk aux ka si-ang tix heue. 16 Aux seeing ka krax im ju tix, aux tak ang lai im jheung jheung heue. Kieh aux ot nong nong, grawh grawng nawh baux singaix aux khankix hoik awm pa toek ex bhawm khaing heue. 17 Kawn pui mawh ceu patix, sonsang yaogyaw Maix Cao nawh mawh pa ting ceu mai Maix Cao lai koe rhawm piang nawh, Ref 7:17 Yaog 8:4; 144:3. 18 Maix Cao lai hoek fi ka nawh ku ngawb mai cheuk cheu ka nawh ku bawg yam lie? 19 Maix Cao tak ang jhak simi ka aux kawn sang rheung miex grheung, mai kieh aux ot nong nong tom sidah pon bleet aux rawm mia tix lie? 20 Cao pa pau ka kawn pui eue, phan aux koe phimap, mawh sang caw aux ti yuh ceu patix ka Maix Cao lie? Maix Cao hoik kieh aux, awm mhai pa tang Maix Cao ti deuh kheu jao patix mai kieh aux mawh beeh glawm pa ciien ka son Maix Cao lie? 21 Kheu Maix Cao lai ang pluat ploi ka pa lud aux mai ang teei phimap aux luan kheu patix lie? Yam in aux tak sang it ka daux phawng tiex mai Maix Cao tak sawg aux plak ponngawb, viang mawh nan, aux ang lai ot heue.”