1 Khaix an Yawbax deeh pawk lox ah nin, 2 “Krax pa laux rhawm aux, kieh ciang ti yaox mhawm mhawm mai krax pa kha rhawm aux khankix kieh khrawm tix daux ngai jiang. 3 Mawh kheu nan, an tak mawh pa nie cien khaing mhaik rawm sigrit sigra, mawh kheu lox sikah aux hoik kied luan heue. 4 Grawh grawng nawh te puing cao pa ting sibrawm ot ka daux aux, khwan aux nyaux ka jai kix, krax lhat graung pa jhi Siyiex hoik dia tix ka plak sivoe aux. 5 Mawh sax riag la tiag yam koe rib sawm tix mai mawh sax riag mawie yam koe rib sawm tix lie? 6 Mawh sang pon ih priex ceet khawm ang tix sau kih lie? Phan ang mawh nan, mawh koe jhawm nyawm ka daux brang tawm ia lie? 7 Ceu pa thiang aux tix ang teeh ka khankix, mawh priex pa seeing brai ka son aux heue. 8 Kieh aux pon ka can ceu pa rawg mhaing tix mai kieh Siyiex tawx ka can ceu pa mie aux tix pon ka heue. 9 An tak mawh pa khaw rhawm Siyiex, sonsang yuh aux laux leeing mai Nawh Cao tak nyeu plawng taix tix lih mai tat ti tik aux heue. 10 Khaix an aux tak koe krax nyawm rhawm, viang ka daux krax pa kied kha rhawm kawx aux kawn koe krax gaux rhawm, paw kieh Nawh Cao lai koe pa lhawk ka aux, mawh kheu aux ang thiang ka gumlox pa singax singeh Nawh Cao heue. 11 Mawh koe riang rao ceu patix ka aux ka daux pa keud pot tix lie? mawh ceu pa sidah sidu patix, ka tak sang kawn kieh aux gun yeung tix baox lang ju lie? 12 Mawh riang rao aux riang rao simaox lie? Phan ang mawh nan mawh nex aux nex tawng lie? 13 Krax teem ang lai koe ka daux aux tete mai krax keud aux hoik deek die ang mawh lie? 14 Pui pa koe krax caux rhawm ka paox grawm tix pa hoek krax kha rhawm, tak mawh pa luad luan khaing pa lhat graung ka cao pa ting sibrawm heue. 15 Puxaik aux khankix hoik vung viang hu awm rawm klawng iak, awm lih hu rawm daux ngawd klawng hit mai grai hu, 16 rawm klawng an hoik faik ka rawm sidap mai ka dee an hoik mox tix ka rawm rha. 17 Yam siu rawm an nawh grai hu mai yam hax koek kix kroh hit khaing dee ot dee koe tix. 18 Cub pui hu krax khankix hoik lud krax hu tix mai grai hu sipie. 19 Cub pui Tema pa yuh lai geu hu krax, jhak ka cub pui pa kaoh khaing haktiex Shebax ka daux krax pa keud pot jun pot tix. 20 Kix koe krax laux rhawm, kheu jao keud pot jun pot tix, yam hoek kix tan kix koe krax kaig tua kah. 21 Grawh grang nawh pex ku kaux awm nang an mawh pa giex going, pex yaox ka krax tug kha aux mai pex lhat graung kah heue. 22 Mawh hoik sax ah aux nin, viex tix ceuceu hoek ka aux lie? Phan ang mawh nan, tan ti tawx totaix tix ceuceu son aux khaing daux sinngao pa koe maix lie? 23 Phan ang mawh nan, taoh aux khaing daux tawm taix pui koeng lie? Phan ang mawh nan, laug ti teei aux khaing daux tawm taix pa nunai ka aux lie? 24 “Gau ka aux mai aux tak ot yiien yawg tix, jhi aux yaox ka grawh grawng pa lud aux liak. 25 Gumlox pa mawh meh mawh pa kied ting sibrawm tete, lox pa sibriem pex khankix koe bwanson ka ceu patix lie? 26 Mawh keud maix tix sang deuh phimap ka lox sikah aux lie? lox sikah pui pa ang koe krax keud pot jun pot khankix awm bhaung heue. 27 Mawh heue, pex hoik yuh pa kin pa kheem ka kawn doe mai pex coh ka paox grawm awm diang lai heue. 28 Mawh kheu nan yam in koe krax fah rhawm sonsang jhak ka aux liak, grawh grawng nawh, mawh hoik sax pie lhen aux ka plak sivoe ngai pex lie? 29 Yam in deeh keud ti yaox mhawm mhawm, paw yuh pa ang rahsee, yam in baox deeh keud ti yaox mhawm mhawm aux kawn cung sijung ka daux pa rahsee heue. 30 Mawh koe pa ang rahsee piang dak aux lie? Mawh ang aux pon cim ti yaox mai pon gwieh tix tawng ka ceu pa koe phimap lie?”