1 “Kok yo yam in, mawh pui mawx pa sang pawk lox maix lie? Mawh kawn sang koe pui pa singax mawx sang veeh tix hoek teem ka maix lie? 2 Grawh grawng nawh krax song rhawm an tak pah ka pui kwa pui caox mai krax boh rhawm pah ka pui pa ang koe krax tawng yung heue. 3 Yam yaox aux ka kaux num riah pui kwa pui caox, viang mawh nan aux hoik jhax lawg ka dee ot dee koe nawh heue. 4 Kawn praix nawh khankix, singai khaing dee yiien dee yawg, yam kha kix rhawm tix daux siviex veng mai cao pa taoh kix ang lai koe tix kaux kawx heue. 5 Grawh grawng nawh pui pa cai rhawm khankix, hoik teei ti ih nghox vawg nawh khaing sipeem pa vie tix ka pang kat mai pui pa simie tix nyaux rawm khankix hoik bleet ka sinngao kix heue. 6 Grawh grawng nawh krax kha rhawm ang lai kaoh khaing phawng tiex mai krax sivix ang lai lih khaing daux tiex, 7 mawh kheu nan kawn pui keh son pa kha rhawm, awm nyia ngu haok plak piang heue. 8 Viang mawh nan, phan mawh ka aux, aux tak sawg ka Siyiex mai aux tak ap tix tawx grawng kaing kuceu ka Siyiex, 9 pa yuh ceu pa kied ting lhaong mai pa daox deng khawmuik, pa ang lai dak uik simin ka heue. 10 Nawh Cao kieh lhiex lih piang haktiex mai ploi rawm khankix, lih ka tong kaung heue. 11 Nawh Cao yaog pui tiem rhawm ot ka dee pa lhaong mai kieh pui pa koe krax yiiem grai khankix deeh nyawm rhawm heue. 12 Nawh Cao kieh pui pa kawk rhawm khankix laux mai sonsang ang kix lai pon yuh ka can ceu pa bak kix heue. 13 Nawh Cao giex pui koe pingnya cuyi ka jhawm lhak tokaux kixRef 5:13 1Kaw 3:19. mai kieh krax keud pui luk liak khankix mawh giex going heue. 14 Kix tak pub ka pa faik ka daux bawg yam pon ngaix mai pupi tix hu yam jung singaix, awm plak ponsawm heue. 15 Viang mawh nan, Nawh Cao taoh pui hot sibhawm khaing vaig lawm khaing daux jheeh pa kied ting riang rao mai khaing daux tawm taix kix heue. 16 Mawh kheu nan pui hot shia tak koe krax keud pot jun pot mai pui ang rahsee tak nyeep ka jheeh tix heue. 17 “Jhak heue, pui pa hoik ciied hoik thi Siyiex kah, mawh pa koe bwanson, mawh kheu nan, paw koe ceu pa sibriem, ka ceu pa hoik cox cao pa ting sibrawm mawh pa mhawm awx.Ref 5:17 Kab 3:11-12; He 12:5-6. 18 Grawh grawng nawh, Nawh Cao kieh dee saux koe, Nawh Cao pua ka dee saux an, Nawh Cao kieh krax mat koe, viang mawh nan, taix Nawh Cao deeh kieh moi khawmuik heue. 19 Nawh Cao tak taoh maix lih khaing daux pa kha rhawm liah ceu, ceu pa caox caig aliah ceu tak ang lai krox teeh ka maix heue. 20 Ka daux yam hot sibhawm, Nawh Cao tak taoh maix khaing krax yum mai daux naing, Nawh Cao tak taoh maix khaing sibrawm vaig. 21 Tak mox maix khaing dak pa sibriem pui mai maix tak ang koe krax lhat graung, yam hoek ceu pa laux leeing. 22 Maix tak nyiah maung pa laux leeing an mai pa hot sibhawm an mai maix tak ang koe krax lhat graung ka totiag piang haktiex heue. 23 Grawh grawng nawh maix tak yuh sijax mukheu tau mai simaox ka daux kaung mai totiag pa koe daux kaung khankix tak yuh pa nhim tau mai maix. 24 Maix tak yaox nyiex gox tix koe ceu pa nhim, yam deeh ing maix ka dee ot dee koe tix mai ang lai koe krax laux rhawm. 25 Maix tak tawng ka haoh hun doeh ru ceu cad tix mai kawn praix kawn saux kawn sex tix khankix nie awm rib riem piang haktiex. 26 Maix tak hoek ka daux simeeig, yam naog ju tix, awm lhiem nghox pa kaux yam hoek bawg yam pa khaw tix vawg. 27 Jhak heue, keud ti yaox ka in, hoik mawh pa mawh meh, nghiet ka heue, mai kieh maix tawng ka tokaux tix heue.”