1 Khaix an Eliphat ceu pui Teman deeh pawk lox ah nin, 2 “Phan aux cheuk tix krai lox tix gum ka maix, mawh sang pon kham maix ka lie? viang mawh nan, mawh pui mawx pa sang pon ot giex going khawm ang tix sikah lie? 3 Maix hoik sidiex gau ka pui tom nie mai maix hoik tawx riang rao ka taix pui pa iak riang khankix heue. 4 Gumlox maix khankix hoik joh jhan ka pui pa sideeing caong tix mai maix hoik tawx riang rao ka ngawng pa awn riang khankix, 5 viang mawh nan yam in ceu pa kha rhawm hoik hoek piang maix mai teeh kieh maix taug mao, 6 krax pa nab yam maix krax pa een maix rhawm tix mai krax pa rahsee pa hu maix mai krax keud pot jun pot maix khankix koe dee mawx lie? 7 Keud ti yaox yam in, mawh pui pa ang koe dee deuh phimap mawx pasax hoek krax laux leeing lie? Phan ang mawh nan, pui pa rahsee mawx pasax teei ti tik ka dee mawx lie? 8 Awm pa hoik tawng hoik yaox aux pui pa thai kaung phimap mai van simie pa caox caig khankix, tak deeh yaox tix vawg awm an heue. 9 Kix tak laux leeing kheu bhawm pa sileed Nawh Cao mai kix grai kheu bhawm pa song rhawm Nawh Cao heue. 10 Lox graox sivai sangsi mai lox riag sivai sangsi pa kied kwa mai rhang kawn sivai sangsi khankix hoik goh hoik groing ka heue. 11 Sivai sangsi kwa an hoik yum kheu ang lai yaox ti ih kug mai kawn miex sivai sangsi khankix hoik prung prang ti hu kudah heue. 12 Yam an lox sikah tix gum, hoek ka aux khaing dee glip mai yhaok aux hoik mhong ka lox pa koi sikah an heue. 13 Ka daux krax keud ce khaing susai ponsawm yam hoik laig it laig tom pui, 14 Krax lhat mai krax siyaung hoek piang aux mai kieh si-ang aux khankix siyaung ka heue. 15 Khaix an khwan tix mu tiang sivoe ngai aux, hauk haw pa koe piang aux khawmuik hoik pruh ka heue. 16 Khwan an kawn kaog, viang mawh nan, aux ang tie pon gwieh ka pakpeung mai yaox ngie riang pang peue ka plak sivoe ngai tix, yam an aux mhong lox pa nhim tix gum ah nin, 17 “Pui pa chix yum khex sang rahsee ka plak sivoe ngai Siyiex lie? Mawh chix singax kawn pui khaing sivoe ngai cao pa phan pa deuh tix lie? 18 Jhak heue, Nawh Cao kawn ang yum rhawm ka kawncau tix khankix mai kawn deuh kawncau Siyiex kawx mawh pa daox pa aw, 19 mawh kheu nan pui pa kaoh khaing phawng tiex mai pa ot daux nyiex tiex khankix, nie sang koe ceu pa krai grawng kix yuh ka mawx mai pui an khankix hoik phawng groing ka vaig ang mawh lie? 20 Kix hoik mawh pa laux leeing ka daux tix singaix khaing, kix tak grai grup leeing ju mai pui tix kaux kawx ang simawd ka kix heue. 21 Viang mawh pa kied mhawm grang min plakngai kix kawx hoik luan hu khaing kix ang mawh lie? Kix tak yum, tau mai pa ang tix koe pingnya cuyi heue.