1 Khaix an Yawbax ang jheeh tix mai deeh jhax lawg ka singaix keh tix heue.Ref 3:1-19 Ye 20:14-18. 2 Yawbax sikah ah nin, 3 “Kieh singaix keh aux mawh pa laux leeing mai kieh ponsawm pa ah hoik nghe kawn simex tix kaux an laux leeing heue. 4 Kieh ngaix an mawh pa faik, paw kieh Siyiex khaing dee long simi ti jhak ka singaix an mai paw kieh pa riang jhan tix piang an heue. 5 Kieh pa faik veei meung yum map nai grawng nawh, kieh paiawm kheem piang an, kieh pa ceep daux singaix an mawh pa kied lhat graung heue. 6 Ka daux sawm an, kieh pa faik kheem ka nawh paw lai kieh nawh simin tix tau ka daux sinax singaix mai num, paw kieh an mawh pa rom tix tau mai khix khankix heue. 7 Kieh sawm an mawh sawm pa neh, paw kieh lox ceu pa gaux rhawm hoek laig ka daux an heue. 8 Kieh pui pa jhax lawg singaix khankix deeh jhax lawg ka singaix an, kieh pui pa pon so rhawm siyawng jhax lawg ka sawm an heue. 9 Kieh simuing plak ponngawb mawh pa faik, kieh nawh sawg ka pa riang viang mawh nan, nawh ang yaox ka mai paw kieh yaox ka bah riang praix daux ngaix an, 10 grawh grawng nawh ang lai nyeep ka siviex vaig miex aux mai ang lai mox krax laux rhawm khaing ngai aux heue. 11 Aux lai ang yum ka bawg yam jah ti keh yuh ka mawx lie? Aux lai ang dud rhawm yam lih khaing daux vaig miex tix dix, yuh ka mawx lie? 12 Ngawng lai rieb tix teem ka aux kheu jao patix? mai teeh lai tawx aux peuex kheu jao patix? 13 Phan ang mawh nan aux tak noi tix mai hoik pon krax yiien yawg, aux tak hoik laig it mai hoik mawh pa laux lee tix 14 tau mai simiang haktiex mai cao pa tawx rhawm keud dong sawn khaing piang haktiex, pa hoik deeh cox sum pa laux leeing son tokaux cao kix, 15 phan ang mawh nan tau mai kawn Simiang pa koe khri mai pui pa hoik naog yuh mau ka nyiex tix, 16 phan ang mawh nan aux lai ang awm ka kawnngie pa keh ang naog khix tix kaux mai kawnngie pa ang sax yaox ka pa riang yuh ka mawx lie? 17 Ka daux an pui caox ang pon tawx krax tuktiak ka mai can pui taug mao khankix hoik pon pa laux lee tix heue. 18 Pui pa giex laung khankix hoik pon krax laux lee tix tau, kix ang lai mhong ka lox map cao kaing tix heue. 19 Pui iak pui ting kawx ot baoh tan mai siliex an, hoik luad luan khaing cao Simiang tix heue. 20 Kheu pa riang lai kawn jhan riang tix ka son pui pa kha rhawm tix, kawn kieh ju pa im koe ka daux pui pa kin rhawm yuh ka mawx, 21 pui pa pau son krax yum, viang mawh nan, krax yum ang chix hoekRef 3:21 Jhi 9:6. mai nie lheu sawg ti yaox krax yum, khaing kraung khrai sinngao khankix, 22 pui pa gaux rhawm sigrien sigre, yam yaox kix ka simeeig mai nie koe krax gaux rhawm ka ang mawh lie? 23 Khex tawx pa riang ka pui, pa mox daux krax pa hu tix mai ka pui pa hoik laung Siyiex ti deuh khankix, yuh ka mawx lie? 24 Aux hoik koe pa ngia sivoe sang ih tix pa ih mai rawm ngai pa yiiem doe aux hoik lih awm rawm heue. 25 Grawh grawng nawh ceu pa kied lhat graung hoik hoek piang aux mai ceu pa lhat aux, hoik lih ti koe piang aux heue. 26 Aux ang koe ceu pa nhim rhawm mai ang koe ceu pa yiien pa yawg, aux ang koe pa laux lee tix, kheu jao hoek krax kha rhawm heue.”