1 Elihux baox toe tix krai lox ah nin, 2 “Gun yeung ka aux ceeix ha mai aux tak jhi maix yaox ka koe lox pa sang krai tix tang Siyiex heue. 3 Aux tak viex krax tawng yung tix hoek khaing dee singai, aux tak jhi grawng rahsee Siyiex Cao pa phan pa deuh aux heue. 4 Grawh grawng nawh lox sikah aux in ang lai mawh pa lud loe, pui pa grum naog ka krax tawng yung tix kaux ot tau mai maix heue. 5 “Jhak heue, Siyiex mawh pa ting sibrawm mai ang mawh pa nunai ka pui tix kaux kawx, Nawh Cao mawh pa koe sibrawm ka daux riang rao krax tawng yung heue. 6 Nawh Cao ang mawh pa priex jhung ka ju pui caox caig, viang mawh nan Nawh Cao prawng ca rahsee ka pui pa kha rhawm heue. 7 Nawh Cao ang lai ghaix ngai khaing pui rahsee mai kieh kix ngawm piang dang ngeung tau mai simiang khankix, mawh kheu Nawh hoik yaog kix ot tan leeing ju mai kix hoik mawh pa ot dee lhaong heue. 8 Phan mawh pa hoik phyawk kix ka maox ceng khankix mai phan maox pa kha rhawm vung vhien tix ka kix, 9 khaix an Nawh Cao tak krai grawng kaing pa yuh kix mai khawm krax pa lud kix khankix mai ka pa hoik yuh kix ka daux krax pa ang khaw caw heue. 10 Nawh Cao tak paoh yhaok kix, sonsang nghiet ka lox tawm jhawm krai Nawh Cao mai tawx lox ka kix sonsang veeh kix khaing krax lud tix heue. 11 Phan kix cu nghiet mai yuh kaing jhaw Nawh Cao, singaix sawm khix num kix tak luan ka daux krax pa haok hwan mai ka daux krax pa gaux rhawm khankix heue. 12 Viang mawh nan phan kix ang cu nghiet, kix tak laux leeing ka vaig mai kix tak yum ka daux krax pa ang tix koe krax tawng yung heue. 13 Viang mawh nan pui tud rhim khankix khrawm ti deuh krax song rhawm ka daux rhawm tix, yam phyawk laung Nawh Cao kix, kix ang lai kok yo son krax teem heue. 14 Kix yum yam kawn im ju tix mai ju kix tak sidah ka daux sinax pui pa seeing brai khankix heue. 15 Nawh Cao deeh taoh pui hot shia khaing ka daux pa kha rhawm mai paoh yhaok kix yam hoek krax kha rhawm heue. 16 Nawh Cao tak viex maix lih hu khaing daux krax pa kin pa nu mai laig dah dee vieh dee va, pa ang mawh dah dee si khawp mai tak sang khan priex preem pa nyawm pa ngaig piang pheen sawm maix heue. 17 Viang mawh nan maix hoik naog ka krax ciyang ka daux krax yuh pui pa caox caig, krax ciyang mai krax prawng ca tak giex gang ka maix heue. 18 Yuh satix tix, grawh krax song rhawm Nawh Cao tak koe piang maix mai paw kieh mau taoh pa ting ngawh ting jum an viex maix lud krax heue. 19 Krax pa magmi maix mai sibrawm pa kied ting maix an sang pon taoh ka maix khaing krax pa kha rhawm lie? 20 Paw koe rhawm ka ponsawm, pa mawh bawg yam tat ti tik pui khankix khaing dee ot dee koe kix heue. 21 Yuh satix tix paw lai veeh ti hu plak krax lud awx, grawh grawng nawh maix hoik laug ti teei in khaing krax pa kha rhawm heue. 22 Jhak heue, Siyiex hoik jhi pa ting lhaong Nawh Cao ka sibrawm tix mai mawh pui mawx pa chix tawx krax gau awm Nawh Cao lie? 23 Mawh pui mawx pa pon jhi krax hu Nawh Cao, phan ang mawh nan mawh pui mawx pa pon ah nin, ‘Maix Cao hoik yuh pa lud loe lie’?

24 “Doh keud ti yaogyaw kaing jhaw yuh Nawh Cao, khaing lai rhax pa rhax pui khankix heue. 25 Kawn pui ku kaux hoik yaox kaing yuh Nawh Cao khaing dee singai heue. 26 Jhak heue, Siyiex mawh pa ting lhaong mai ex ang chix pon tawng ka Nawh Cao mai khix num Nawh Cao khankix mawh pa ang ex dak pon simin ti tawng heue. 27 Grawh grawng nawh, Nawh Cao jhok rawm ciex khankix haok plak piang mai deeh tieh ti mawh rawm lhiex ka daux paiawm heue. 28 Pa kieh paiawm khankix groi rawm lhiex lih cod piang pui tom nie heue. 29 Mawh pui mawx pa sang pon tawng ka grawng tah hu paiawm khankix ku sidah mai ka grawng lih sinum praix khankix ka daux nyiex gox bwan Nawh Cao lie? 30 Jhak heue, Nawh Cao kieh pa riang pluk plak praix jhan ku caong daog nyiex gox bwan mai kheem tom ka dee pa kied raux rawm sigrit sigra heue. 31 Ka son grawng in Nawh prawng ca piang pui khankix mai Nawh tawx pa ih tom kub tom naog ka kix heue. 32 Tawm taix Nawh kheem piang pluk plak praix mai tawx lox kieh sah tuh ka pui koeng heue. 33 Lox sinum praix krai pao grawng Nawh mai tobrie khankix kawx tawng ka grawng hoek bhaung ting heue.