37
1 “Ka son grawng in rhawm aux hoik kied siyaung luah ah pug pug mai phuh tix lih khaing dee ot tix heue.
2 Nghiet ka lox sinum praix Nawh Cao mai mawh lox sinum pa kaoh khaing daux jheeh Nawh Cao heue.
3 Nawh Cao ploi sinum praix luah hu sidah greem raoma mai kieh sah tuh tom dee sidah haktiex heue.
4 Khaix hoik an, lox sinum praix lih tau mai lox sinum tuh sah mai sibrawm Nawh Cao, khaix hoik mhong ka lox an mai Nawh Cao ang lai yut ka lox sinum praix mai bhaung ting heue.
5 Siyiex kieh lox tix lih mai sinum praix mai krax pa kied daox deng, Nawh Cao yuh ceu pa kied ting lhaong ka pa ang ex lai dak uik tawng ka heue.
6 Grawh grawng nawh, Nawh Cao ah nin ka rawm rha, ‘Lih koe piang haktiex’, awm an lhiex mai lhiex ting khankix kawx lih ti koe kheu sibrawm Nawh Cao heue.
7 Nawh Cao vien ka taix kawn pui ku kaux, sonsang pon tawng pui khankix ka kaing jhaw yuh Nawh Cao heue.
8 Totiag khankix laig ot daux tiex mai laux lee tix tan heue.
9 Keu kang lux kaoh khaing caong ma seh mai bhaung sikiied hoek khaing caong ma laong heue.
10 Siyiex phlu bhawm tix lih mawh sidap mai kieh rawm pa kied vieh lih tix klon heue.
11 Nawh Cao kieh bhawm rawm ciex deeh tieh ti mawh paiawm, pa riang Nawh Cao kieh paiawm grai heue.
12 Kix cuang vung viang piang bee ma haktiex mai hu ka daux pa kia ngien Nawh Cao, sonsang mawh awm can ceu pa hoik tawm Nawh Cao ti deuh ka kix, piang bee ma haktiex khawmuik heue.
13 Nawh Cao kieh ceu an khawmuik lih tix mawh, son pa ciyang ang ah, sonsang priex rien haktiex ang ah mai son krax caux rhawm Nawh khankix ang ah heue.
14 “Yawbax eue, nghiet ka lox in, cung yawg tix mai jawg tix keud ka kaing jhaw pa daox deng yuh Siyiex khankix heue.
15 Mawh hoik tawng maix ka grawng tawx Siyiex lox tix ka ceu an khankix mai kieh pa riang paiawm cie Nawh Cao jhan riang lie?
16 Mawh tawng maix ka sidawm phin tum paiawm ka raoma, pa mawh kaing jhaw krax pa daox deng Nawh Cao, Kaw pa grum naog ka daux krax tawng yung lie?
17 Yam yuh Nawh Cao haktiex yiien ka bhaung pa phlu tix hoek khaing plak seh mai kieh kraung ceep maix si aoh ka, tawng maix ka lie?
18 Mawh hoik yaox maix tix nih tawm raoma khankix tau mai Nawh Cao, pa kiien awm siliak pa raug tix lie?
19 Gau yix ka grawng pa sang caw yix tix krai ka Nawh Cao, mawh kheu yix ang lai chix krai tix ceu kawx, kheu jao koe pa faik yix heue.
20 Mawx pa sang pon krai ka Nawh Cao awm pa koe rhawm tix sang krai lie? Koe pui tix kaux kaux pa koe rhawm tix sang mie tix hoek krax laux leeing lie?
21 Yam phlu bhaung raoma kieh blang, kawn pui ang lai pon simi ti jhak ka pa riang an heue.
22 Pa sawng riang khri jhan hoek khaing plak laong mai sibrawm krax pa lhat koe tau mai Siyiex heue.
23 Ex ang lai pon sawg liiem ka Kaw pa ting sibrawm, Nawh Cao mawh pa kied blon mhawm ka daux sibrawm, ka daux krax prawng ca mai ka daux pa grum naog ka daux pa rahsee, Nawh Cao ang lai yeen ya ka pui tix kaux kawx heue.
24 Mawh kheu nan kawn pui khankix koe krax lhat graung ka Nawh Cao, Nawh Cao ang lai deuh lai sawn pui pa een tokaux tix koe pingnya cuyi ka daux rhawm tix koe ceu heue.