1 Lheu khaing an Elihux pawk lox ah nin, 2 “Mawh keud maix pa ah ti mawh pa caw lie? mawh keud maix krax pa rahsee tix mawh pa nie lheu blon khaing Siyiex lie? 3 Maix ah yuh nin, mawh sang pon aux bwanson ceu patix lie? mai sang nie pon aux rao ceu patix khaing yuh phimap lie? 4 “Aux tak pawk lox maix mai paox grawm khankix pa ot tau mai maix heue. 5 Maong ti jhak plak raoma mai simi ti jhak ka paiawm pa nie lheu lhaong khaing maix heue. 6 Phan maix yuh phimap, mawh sang pon kieh maix pa grum naog Siyiex laux leeing lie? phan ang mawh nan, phan maix yuh phimap tom nie, mawh sang pon yuh maix patix ka Nawh Cao lie? 7 Phan maix mawh pa rahsee, mawh sang pon tawx maix patix ka Nawh lie? Phan ang mawh nan, mawh sang pon rieb Nawh patix khaing daux tawm taix maix lie? 8 Krax pa caox caig yuh maix hu krox ka pui pa awm cao maix, mai krax pa rahsee maix tak tawx bwanson ka kawn pui pa awm maix heue.Ref 35:6-8 Job 22:2-3. 9 Kix riag yo kheu jao pa kha rhawm tom nie mai kix riag yo son pa sang pon krax teem khaing taix pa kied ting riang rao heue. 10 Viang mawh nan, ang pui koe tix kaux kawx pa ah nin, koe Siyiex Cao pa phan pa deuh aux, pa tawx akhwang rhax aux lai daux ponsawm, 11 pa nie lheu gau ex khaing totiag haktiex mai pa yuh ex nie lheu koe pingnya khaing sim raoma khankix koe dee mawx lie? 12 Viang kix kok yo lox tix kawx, Nawh ang lai pawk, kheu pa yaw kix rangdi daux pa caox caig heue. 13 Siyiex ang nghiet ka lox pa giex going tete mai cao pa ting sibrawm ang lai yuh ti tawng ka lox kix heue. 14 Viang maix ah ang ti yaox Nawh Cao kawx, kheu mawh Nawh Cao pa prawng rahsee mai maix krox jun daux Nawh Cao heue. 15 Yam in kheu grawng ang Nawh Cao nyang tawx krax kham geu ka daux pa song rhawm tix mai Nawh Cao ang nyang teei krax lud maix koe ceu. 16 Yawbax ang jheeh tix ka daux pa ah tix lox giex going mai nawh baox nie sikah ka lox pa ang koe cee cak heue.”