1 Viang mawh nan yam in pui awn ju khaing aux khankix nunai ka aux mai keeing kix kawx hoik seeing brai ka aux mai ang lai kieh aux koe jum awm ka sox pau yung aux heue. 2 Taix pa koe riang rao kix, kix pa hoik grai grup, tak sang mawh pa koe bwanson ka son aux yuh ka mawx? 3 Kheu hot sibhawm mai cai rhawm, kix to ti ot ka daux tiagtu dee yiien pui mai ih riah khaox riah ox, 4 kix pon taux lhax ka daux yeem daux yaw mai kaong riah lhax lai khankix mawh priex ih ka son tix heue. 5 Grheu kix lih khaing daux sinax pui khankix mai pui yo hawt khaix kix, awm pheet ka cao briex heue. 6 Kix ot daux rang daux tiex ka hawt liep gawng pa kied rieh heue. 7 Kix ngia greem yeem greem yaw mai phux paox tix ot greem pang kat heue. 8 Kix hoik mawh kawn praix pui kwa pui caox, kix mawh kawn praix pa brai maung khankix mai hoik yaox ti kham pa grheu pui ti lih khaing haktiex heue. 9 Yam in aux lih ti mawh lai rhax pa sibriem kix ka aux heue. 10 Kix seeing ka aux mai kix via singai khaing aux, kix ang lai ring tix baig ka ngai aux heue. 11 Grawh grawng nawh, Siyiex hoik deen ka lah ak aux mai hoik yuh krax kha rhawm aux mai kix hoik yah maox keu plak sivoe aux heue. 12 Cub pui pa ang leut khankix yaog ti kaoh plak taix khawn dawm aux mai nyhot ka caong aux mai kix yaog ti kaoh tieh feen ka aux sonsang laux leeing aux heue. 13 Kix yieh krax hu aux laux, kix baox nie sau riang sonsang goh aux mai ang koe pui tawx satix ka kix heue. 14 Kix hoek awm hoek khaing daux krax pa vieh mai kling tix hoek ka aux awm bhaung ting khaing daux pa laux leeing heue. 15 Krax lhat graung hoik hoek piang aux, kix hawt min siawp sibrawm aux awm bhaung mai krax haok hwan aux hoik grai hu awm paiawm heue. 16 Yam in rhawm aux hoik bih kheu hoik krup krax pa kham pa geu ka diang hu aux heue. 17 Si-ang aux khankix hoik saux hoik greeing daux ponsawm mai siniag aux khankix ang lai chix moi heue. 18 Jhawm saux aux hoik kied kin, awm kraung ceep piang tokaux aux mai rhawt ka aux awm ngawg sibex aux heue. 19 Nawh Cao nyhot ti tik aux cod ka daux ung mai aux deeh lih awm phawng tiex mai nyaox heue. 20 Aux riag yo ka Maix Cao, viang mawh nan Maix Cao ang lai pawk ka aux, aux kaoh cung mai Maix Cao ang lai gi ka aux heue. 21 Maix Cao hoik yuh krax pa kied kin ka aux, tau mai riang taix pa ting riang Maix Cao hoik ciyang ka aux heue. 22 Maix Cao yaog aux haok daux bhaung mai kieh aux brug ka bhaung an, Maix Cao hoik kieh krax pa pex aux laux leeing heue. 23 Grawh grawng nawh aux tawng grawng sang viex Maix aux hoek ka daux pa yum mai ka nyiex khre riien Maix Cao ti deuh son pui pa im ju heue. 24 Yam nih Nawh Cao taix tix piang pum pa laux leeing an khankix, viang kix riag yo khyox khaw kawx mawh giex going heue. 25 Mawh ang aux sax yiiem son pui tug pui kha tix lie? Mawh ang khwan ju aux koe krax laux rhawm son pui hot shia lie? 26 Viang mawh nan yam jhak aux ka pa mhawm, pa caox caig hoek bleeh ka aux mai yam krox jun aux ka pa riang pa faik bleeh ka aux heue. 27 Ka daux rhawm aux koe pa hax pa siaoh mai ang koe pa nhim pa nghie, singaix pa kha rhawm hoek sipub ka aux heue. 28 Aux lailing ka daux pa faik, ka dee ang pa riang lai koe, aux cung daux sinax pui hun mai riag yo son krax teem heue. 29 Aux mawh puxaik sox tiag mai mawh paox grawm ka sim kala-uk khankix heue. 30 Hak aux lih ti lung mai grhuah hu khaing aux; si ang aux khankix hoik hax awm ngu heue. 31 Lox ting feuk cie aux hoik deeh tieh mawh lox ngia mai lox shiao paung aux deeh tieh ti awm lox yiiem heue.