1 Yawbax sitoe lox kab tix ah nin, 2 “Kieh aux deeh awm khix num pa hoik luan khankix mai awm ka singaix liiem lia kia ngien Siyiex piang aux, 3 Yam jhan riang kawk ngu Nawh Cao piang kaing aux, aux een rhawm ka pa riang Nawh Cao mai pon lawng ti hu ka daux pa faik. 4 Kieh aux deeh awm ngaix yam kawn awn ju tix, yam koe krax pa yuh Siyiex paox pie piang nyiex gox aux, 5 yam kawn koe cao pa ting sibrawm tau mai aux mai yam koe kawn praix aux khankix hawt vung viang aux, 6 ku diang caong hu aux khankix hoik naog ka rawm teeih mai simaox rang khankix hoik lih ti mawh bee ka son aux heue. 7 Yam hu aux ka siviex veng pa koe daux veng, yam khre aux tix sang ngawm ka daux krax tan, 8 Cub kawn nyawm awn ju khankix hoik mox tix ka yaox aux mai pui riex ju khankix yaog ti kaoh cung, 9 Kawn lauxsimiang khankix hoik naox ka lox sikah tix mai kix thox jheeh tix ka taix tix, 10 Pui ting lhaong khankix hoik yawg tix mai dak kix hoik pid dao kix heue. 11 Yam mhong kix ka lox aux, khaix an kix nawb bwan ka aux mai yam hoik yaox ngai kix ka aux, khaix an kix yaogyaw ka aux, 12 grawh grawng nawh aux hoik sax taoh pui hot shia, pui ang koe miex keeing mai pui pa ang koe cao teem khankix yam riag yo kix heue. 13 Bwanson pui pa dex sang hoek krax laux leeing, hoik hoek piang aux mai aux hoik kieh miexmai gaux rhawm tix pon rhax lai heue. 14 Aux ceep ka pa rahsee mai awm kraung ceep piang tix, krax pa rahsee aux hoik awm sibex lang jung mai lawk kaing heue. 15 Aux mawh ngai ka pui pa dug ngai mai aux mawh caong ka son pui laux caong khankix heue. 16 Aux mawh keeing ka pui pa hot pa sibhawm mai aux chawk cheng ti yaox grawh grawng kaing pui pa ang aux sax meed sax tawng heue. 17 Aux hoik raig ti tik ka nga pui caox khankix mai hoik teei ceu pa tud rhim nawh ti ih khaing rhang nawh heue. 18 Khaix an aux keud yuh nin, aux tak sang yum ka daux mheem tix mai singaix sawm aux khankix nie lheu haoh hun awm mhaik heue. 19 Riah aux hoik prung prang ti laig tom hoek daux rawm khankix mai rawm ciex khankix hoik jauh piang kak aux leeing sawm heue. 20 Min plakngai aux mawh pa kawn pruh tau mai aux mai ak aux mawh pa tawx riang rao ka taix aux heue. 21 Pui khankix hoik pau ti nghiet ka lox sikah aux mai hoik yiien yawg tix ka pa tawx aux krax keud heue. 22 Khaix hoik krai aux lox ka kix, kix ang nye nyux mai lox sikah aux hoik jauh piang kix awm rawm ciex heue. 23 Kix hoik pau ka aux, awm pau kix lhiex mai kix ang jheeh tix tom vieh, awm pau kix rawm lhiex lha praix heue. 24 Aux nyiah huing ka kix yam laux rhawm kix mai grang pakpeung ngai nyiah huing aux an mawh riang rao ka kix heue. 25 Aux laug ti tawx daux krax son kix mai ngawm ti mawh cao kaing, mawh kheu nan aux hoik ot awm simiang tix kaux sinax cub kru naing mai awm pui pa kieh pui laux rhawm khankix deeh nyawm rhawm heue.