1 “Aux hoik yuh sijax mukheu mai ngai tix, son ang aux sang jhak ka bunkrih awn ju heue.” 2 Grawh grawng nawh krax pa gwieh Siyiex tix tawx khaing plak piang mawh ceu patix mai sinngao pa sang tawx Siyiex khaing ka dee pa lhaong mawh ceu patix lie? 3 Ang an mawh krax laux leeing son pui caox caig mai krax som nai ka pui pa yuh ceu pa lud khankix lie? 4 Mawh ang Nawh Cao yaox krax lawng aux mai ang simin ka diang caong hu aux khankix lie? 5 Phan aux mawh pa lawng daux krax pie kheem, phan ang mawh nan phan caong aux hoik phai hu ka daux pa kheem pa vhee pui, 6 Kieh ciang aux ka jiang pa khaw ngai jiang mai kieh Siyiex tawng ka pa rahsee aux heue. 7 Phan diang caong hu aux lud daux krax hu tix, phan ang mawh nan, phan rhawm aux hoik hawt alo ngai aux, phan ang mawh nan mai phan ceu pa seeing hoik kawp ka taix aux tix ceuceu, 8 khaix an kieh pui tang kaux teei ti ih simie pa rhuat aux, kieh pui tang kaux reeig ti tik ka simie pa van aux heue. 9 Phan rhawm aux ghoing ka moeng pui tang kaux, phan ang mawh nan, phan aux jiang ka diang siviex paox plawg tix khankix, 10 kieh moeng aux krid mhaw ka son pui tang kaux mai kieh pui tang kaux khankix nunai piang moeng aux heue. 11 Mawh kheu in mawh pa caox caig mai mawh krax lud pa sang keung tix hoek krax prawng krax ciyang heue. 12 Mawh kheu an mawh ngu pa proe ti sang kieh krax laux leeing koe mai sang reeig ti tik krax haok hwan aux khankix heue. 13 Phan aux ang nghiet ka grawh grawng pa hoek ngia kawncau bun aux mai kawncau simex aux khankix ka aux, 14 yam kaoh cung Siyiex, aux sang yuh ka mawx? Yam yaog Siyiex tix kaoh mai yam cheuk cheu Nawh Cao ka aux, aux tak sang deeh pawk ka Nawh Cao yuh ka mawx lie? 15 Ang hoik mawh Nawh Cao pa hoik phan hoik deuh aux tom ka daux vaig miex tix lie? mai ang mawh Nawh Cao pa phan yiex khawm ra awm paox khaing ka daux vaig miex tix lie? 16 Ang aux sax tawx sax yee ka pui hot pui sibhawm yam koe ceu pa lo kix lie? hoik sax kieh aux miexmai laux pakngai lie? 17 Phan ang mawh nan, ang aux sax tawx kawn praix pa ang koe miex keeing ih priex mai ih sivoe ngai kix lie? 18 Jah tom yam kawn awn ju aux, aux hoik priex nawh awm keeing tix kaux mai khaix keh aux ka daux vaig miex tix aux hoik teem ka miexmai, 19 phan aux hoik yaox ka pui yum tix kaux kaux pa ang koe kraung ceep, phan ang mawh nan, pui hot sibhawm tix kaux kaux, pa ang koe kraung pa sang lhop ka tokaux tix, 20 phan rhawm nawh ang tawx bwanson ka aux mai phan nawh ang siu ka hauk yung aux khankix, 21 phan aux yaog taix tix tiah piang pui pa ang koe miex keeing, yam yaox aux mai phan ang teem ka nawh ka dee prawng see, 22 khaix an kieh plawng taix aux khlut khaing klip aux mai kieh taix aux graig heue. 23 Grawh grawng nawh krax laux leeing pa sang kaoh khaing Siyiex, mawh krax lhat graung ka son aux, mawh kheu jao sibrawm pa kied ting lhaong Nawh Cao, aux ang kan yuh tidtix heue. 24 “Phan aux kieh khri mawh krax keud pot jun pot tix mai phan aux ah nin ka khri nawnaw, maix mawh pa een aux rhawm tix kah, 25 phan aux koe krax pa gaux rhawm kheu jao hoik ting lhaong krax pa magmi aux mai kheu hoik kied nie pon aux pa yuh aux ka taix tix, 26 phan aux jhak ka singaix pa riang mai yam simi aux ti yaox ka sawng riang khix, 27 daux rhawm aux hoik koe pa yiien yawg pa raux mox mai jheeh aux hoik ngheet ka taix aux, 28 in mawh krax lud pa keung ti hoek krax prawng ca, mawh kheu aux hoik thiang ka Siyiex, pa ot dee lhaong heue. 29 Phan aux hoik gaux rhawm kheu pa laux leeing pui koeng ka aux mai ja loh tix yam hoik yaox mawh ceu pa caox caig lie? 30 Aux ang lai kieh jheeh tix koe phimap ka mhaing tix jhax lawg ka ju nawh, 31 Mawh ang pui pa ot ka daux nyiex gox aux khankix sax ah nin, mawh pui mawx pa ang nyang bax fah rhawm tau mai nex mawie nawh tan lie? 32 Viang mawh nan son ang nyo sinie lai vu vie ti paung ka daux krax, aux hoik paoh siviex ka son pui hu krax, 33 Phan aux kheem krax pa lud tix khankix awm Adam mai mox ti deuh phimap ka daux rhawm dieb naok aux, 34 Grawh grawng nawh aux lhat graung ka cub pui ting mai pui hun khankix mai pui kuceu nunai aux kieh aux kaig tua, mawh kheu nan aux hoik yawg tix mai ang kan lih plak praix, 35 Oh kieh pui tix kaux kaux nghiet ka lox krai aux mai hoek jhak ka lai mhai rug aux, oh kieh cao pa ting sibrawm pawk ka lox aux mai kieh cao prawng see tiiem ti priex grawng an khankix ka daux phuk lai heue. 36 Aux tak sang deuh an piang klip tix tete mai ceep piang kaing tix awm mhok khri tix mu, 37 aux tak sang plak ti kieh Nawh Cao tawng diang caong hu tix ku diang mai tak greed ti dex Nawh Cao awm Simiang tix kaux heue. 38 Phan haktiex ot aux kok yo deuh phimap ka aux mai phan rhoi thai khankix yiiem tau mai paox tix, 39 Phan aux ih plix khaox mai ang tix uik mau mai hoik yuh cao haktiex khankix koe krax som nai ju, 40 kieh pang kat kuah tang sivawng mai kieh fang kuah tang nghox ca heue. Gumlox sikah Yawbax hoik sidah heue.