1 Jhak heue, Ngai aux hoik yaox in khawmuik, yhaok aux hoik mhong mai hoik tawng ka in heue. 2 Can ceu pa tawng pex aux kawx tawng, aux ang mawh pui beuh khaing pex heue. 3 Viang mawh nan aux tak sikah ka cao pa koe sibrawm mai aux tak koe rhawm ti kum grawng an tau mai Siyiex heue. 4 Viang mawh nan pex mawh pa khre rien tix ka pie lhen, pex mawh cao sidah pa ang chix tix shiao heue. 5 Phan pex ot yawg tix mai pa ot yawg an tak awm koe pingnya pex heue. 6 Yam in nghiet ka grawng pa krai aux khankix mai priex ka gumlox pa khyox khaw siyieb jheeh aux khankix heue. 7 Mawh sang sikah maix lox caox ka Siyiex mai krai lox pie lhen khankix ka Nawh Cao lie? 8 Mawh sang jhak maix plakngai Nawh Cao lie? Mawh sang koe krax pa thung thiang maix ka Siyiex lie? 9 Phan Siyiex jawg tix jhak ka maix mhawm mhawm sang yaox Nawh Cao ceu pa mhawm ka maix tix ceuceu lie? Mawh keud maix tix pon pie lhen ka Siyiex awm pon pie lhen maix ka pui tix lie? 10 Phan pex mox tix jhak ka plakngai pui, Nawh Cao tak sidiex ka pex tete heue. 11 Mawh ang pex koe krax lhat graung ka sibrawm min plakngai Nawh Cao mai ang lhat pa yaox yee Nawh Cao glup piang pex lie? 12 Gumlox been kab pex khankix, ang koe bwanson awm nyaox, guh veng pa tiebtie pex tix ka khankix, tak awm guh veng glaox heue. 13 Ot yiien yawg tix ha mai tawx akhwang kieh aux sikah, khaix an kieh ceu pa sang mawh khankix lih ti mawh heue. 14 Aux tak khliak nex cao tix ka rhang tix mai giex ju tix ka taix ti yuh ka mawx lie? 15 Viang Nawh Cao pah ka aux mai ang lai koe krax keud pot jun pot kawx, viang yuh nan kawx, aux tak sang krai grawng pa yuh tokaux cao tix khankix ka plak sivoe Nawh Cao heue. 16 Nawh Cao tak mawh krax pa taoh son aux, mawh kheu pui tud rhim ang pon hoek ka plak sivoe Nawh Cao heue. 17 Jawg tix nghiet ka lox aux mai kieh lox pa krai aux laig daux yhaok pex heue. 18 Yam in jhak heue, aux hoik khre rien see son tokaux tix, mawh kheu tawng aux mawh tix pa caw heue. 19 Mawh pui mawx pa sang pon krai dee lud dee lud aux lie? Phan yuh nan aux tak ot yiien yawg tix mai aux tak kham ti yum ka heue.

20 “Siyiex eue, kieh aux rawg tix chawk ka Maix ra ceu liak, khaix an aux tak ang lai mox ti ka plak sivoe ngai Maix Cao, 21 deeh yoi taix Maix Cao kieh singai khaing aux mai paw ghlat aux ka pa lhat graung Maix Cao liak? 22 Khaix an deeh kok aux mai aux tak deeh pawk, phan ang mawh nan kieh aux sikah sivoe Maix Cao deeh pawk ka lox aux liak? 23 Phimap krax lud aux hoik koe miex ding? kieh aux tawng ka krax pa lud tix mai ka phimap pa hoik yuh tix khankix heue. 24 Maix Cao lai mox pakngai tix mai keud aux awm pui koeng Maix Cao yuh ka mawx lie? 25 Mawh sang ghlat Maix Cao ka lhax khaox phlu bhaung siyaoh lie? sang hawt pheet Maix Cao khaix brex nghox pa kroh an lie? 26 Grawh grawng nawh Maix Cao hoik tiiem ceu pa sang lang teung kin khankix piang aux mai deeh kieh aux kham sinngao phimap pa yuh tix yam mawh kawn nyawm awn ju heue. 27 Maix Cao hoik sau ti deuh gang ka caong aux mai pau tix kia krax hu aux khankix heue. Maix Cao hoik tat ti deuh mee ka diang caong hu aux khankix heue. 28 Pui pa yaox ti kham ceu an tak awm ceu pa rham rhaw mai awm kraung ceep pa ih greeing heue.