1 Khaix an Yawbax pawk lox ah nin, 2 “Lox pa krai pex kawx mawh lox kawn pui mai yam yum pex, pingnya cuyi pex tak yum tau mai pex heue, 3 Viang mawh nan aux hoik koe krax tawng yung awm pex, ang aux lai mawh pa beuh khaing pex heue. Mawh pui mawx pa ang tawng ka can ceu pa krai pex inkix lie? 4 “Aux mawh pui pa hoik kham geu lox pa ne raw, khaing paox plawg khankix, yam kok yo aux ka Siyiex mai Nawh Cao pawk lox rawg aux bwan ka daux pa rahsee mai ka daux krax pa ang koe pa deuh phimap, hoik pon ka pa nyiah pui mai ka lox pa sibriem heue. 5 Daux pa keud pui pa magmi khankix hoik awm ceu pa map nai mai pa brah son, in khankix hoik mawh pa khre rien tix sonsang cang klad pui heue. 6 Nyiex gox pui tud rhim khankix tak koe ceu pa nhim ka mai can pui pa so Siyiex song rhawm tak yaox ti ot daux pa yiien yawg, mawh kheu viex kix siyiex tix hawt taix tix heue. 7 Viang mawh nan chawk cheng ti yaox ka totiag khankix mai kix tak gau pex ka mai sim sai raoma khankix tak krai pex mhong, 8 phan ang mawh nan chawk cheng ti yaox ka haktiex mai kix tak gau pex ka, mai kax daux rawm sigrit sigra tak sang krai pex mhong sidawng laing laing heue. 9 Ka daux sinax ceu in khawmuik mawh pui mawx pa ang tawng mawh taix Siyiex pa phan ka lie? 10 Ka daux can pa koe ju kuceu mai kawn pui pa toek bhawm tix khankix koe ka daux tawm taix Nawh Cao ang mawh lie? 11 Ang mawh yhaok pa cheuk ka lox sikah pui mai ang mawh jheeh khankix pa cim ka jhawm priex lie? 12 Pui pa riex ju naog mai pingnya cuyi mai pui lang ju kawx naog ka krax tawng yung heue. 13 Nawh Cao naog ka pingnya cuyi mai ka riang rao, Nawh Cao chix tawx rhawm keud dong sawn mai krax tawng yung heue. 14 Phan Nawh Cao yieh ka ceu an, an tak ang lai pon deeh sum ka, phan Nawh Cao phyawk laung ka pui tix kaux, ang lai chix koe krax luad luan heue. 15 Phan Nawh Cao thox ti deuh ka rawm khankix, rawm tak hit, phan Nawh Cao deeh ploi lih tak kheem ka haktiex heue. 16 Nawh Cao hoik naog ka sibrawm mai pingnya cuyi heue. Pa pie lhen mai pui pie lhen khankix, koe ka daux taix Nawh Cao heue. 17 Nawh Cao teei ti tik ka pingnya cao kwang haktiex khankix mai kieh cao prawng see khankix yhot vaw ka heue. 18 Nawh Cao pluat ara simiang khankix mai phyawk nyoi kix ka maox rawd nyoi heue. 19 Nawh Cao teei ti tik ka cao giex kaing li khankix hu awm pui tud rhim mai kieh pui ting riang rao khankix hoek krax som nai heue. 20 Nawh Cao kieh pui koe sibrawm lox sikah yiien yawg tix mai teei ti tik ka pingnya krax keud kuad song khankix hu singai heue. 21 Nawh Cao kieh kawn laux Simiang khankix kaig tua mai teei ti tik ka kraung naing pui ting riang rao khankix heue. 22 Nawh Cao plak sidawng grawng ceu pa kied raux khankix khaing daux pa faik mai viex veei pa yum deeh hoek ka daux pa riang heue. 23 Nawh Cao yuh meung haktiex ting lhaong mai deeh yuh kix laux leeing, Nawh Cao yuh meung haktiex khankix vieh mai kieh kix pung prang hu dee singai heue. 24 Nawh Cao teei ti tik krax tawng yung khaing cao kaing ting pui khankix piang haktiex, kieh kix vung viang ka daux tiagtu pa ang krax lai koe heue. 25 Kix pupi tix hu ka daux pa faik tau mai ang koe pa riang mai Nawh Cao kieh kix hu tutiex awm pui yoek heue.