1 “Pui pa keh khaing bun mawh pa dawd ju mai mawh pa naog ka krax kha rhawm heue. 2 Nawh lih pruh awm tai mai fit hu sipie, nawh to awm veei pang peue mai ang lai kaog lai nien heue. 3 Mawh sang blah Maix Cao ngai tix jhak piang pui yuh nan mai viex aux hoek sonsang prawng see tau mai Maix Cao lie? 4 Mawh pui mawx pa sang pon teei ceu pa singax lih khaing daux pa ang singax lie? Ang koe pie tix kaux kawx heue. 5 Baux singaix cie nawh khankix, hoik mawh pa tat ti deuh, bawg yam khix singaix ot nawh khankix mawh pa koe tau mai Maix Cao, Maix Cao hoik tat ti deuh baux yam nawh pa ang nawh lai pon yaox tix luan ka heue. 6 Veeh ngai tix singai khaing nawh, sonsang yaox nawh tix laux lee yiien yawg tix ka daux singaix nawh, awm pui vai tix kaux heue. 7 Grawh grawng nawh viang kid ti tik ka khaox an kawx kawn koe krax keud pot jun pot ka khaox an mai khaox an tak kawn sang glaoh mai glaoh awn ang jud heue. 8 Viang riah khaox an hoik mawh pa riex ka daux tiex kawx mai phan ngu khaox an yum piang tiex kawx, 9 yam haok bhawm rawm an tak deeh glaoh mai deeh kieh glaoh khaox lih mawh awm gaw khaox tix gawng heue. 10 Viang mawh nan pui tak yum mai grhup rham, khaix hoik dud rhawm nawh mai nawh sang ot dee mawx lie? 11 Awm hoik jud rawm khaing rawm sigrit sigra mai klawng pa hit pa kroh rawm khaing, 12 Mawh kheu nan pui pa laig it, ang lai deeh kaoh heue. Tom hoek bawg yam ang raoma baox lai koe, kix tak ang lai siduad mai ang lai kaoh khaing pa it tix heue. 13 Phan Maix Cao mox aux ka daux simeeig sang mawh pa mhawm miex ding, tom hoek bawg yam ang krax song rhawm Maix Cao nyang bax luan, khaix an deuh bawg yam pa doh keud Maix Cao ka aux liak. 14 Phan pui tix kaux hoik yum, mawh kawn sang baox im nawh lie? Aux ca kawn krox jun ka bawg yam singaix pa kha rhawm tix, tom sidah hoek bawg yam deeh tieh loh aux tokaux tix heue. 15 Maix Cao tak kok mai aux tak deeh pawk ka Maix Cao, Maix Cao tak koe rhawm piang kaing pa yuh Maix Cao ka taix tix heue. 16 Grawh grawng nawh yam in Maix Cao hoik simin ka diang caong hu aux khankix, viang mawh nan, paw jhak piang phimap aux liak! 17 Krax pa lud aux khankix hoik nyeep tix daux hau mai tawk cum ka, Maix Cao hoik vien ti deuh phimap pa lud loe aux heue. 18 “Viang mawh nan awm grhup gawng mai phawng hu mai awm gah greed rang khaing dee ot tix, 19 awm klah rawm ka simaox hu dee singai mai awm rawm lhiex pa thah phawng tiex khaing haktiex, mawh kheu nan Maix Cao tak yuh krax keud pot jun pot kawn pui laux leeing heue. 20 Maix Cao pex ka nawh leeing ju mai nawh tak grai grup, Maix Cao tieh loh riang pakpeung nawh mai ploi nawh hu dee singai heue. 21 Viang kawn simex nawh hoek ka daux pa koe min kawx mai nawh ang lai tawng ka kix, viang kix hoek daux pa yeen tix tiem kawx mai nawh tak ang lai simawd tix tawng an kix heue. 22 Viang mawh nan nawh tawng ka kied saux kraing ka tokaux tix mai khwan ju nawh kawx hoik ngia ka tete heue.”