1 Khaix an Zopha ceu pui Nemat pawk lox ah nin, 2 “Mawh sang koe bwanson ka pawk tix lox lie? Mawh sang khaw pui tie lox sikah ti pon krax pa pluat ploi lie? 3 Mawh sang kieh maix pui yiien yawg ka lox pie tix lie? yam sikah maix ka lox sibriem, mawh ang pui tix kaux kawx kaig ka lie? 4 Grawh grawng nawh maix hoik ah nin, been cie aux hoik rahsee mai aux mawh pa singax ka plak sivoe ngai Maix Cao heue. 5 Viang mawh nan kieh mawh Siyiex pa ah ka maix mai paoh siyieb jheeh tix yuh maix laux, 6 sonsang jhi Nawh Cao maix yaox ka pingnya cuyi pa raux mox khankix, mawh kheu nan phan Nawh jhi maix yaox ceu an khankix viang maix keung tix kham geu ka phimap tix kawx maix tak tawng grawng ang lai tawx phimap ka maix heue. 7 “Mawh pon sawg maix ka ceu pa kied raux Siyiex lie? Mawh pon yaox maix ka mee pa hoik tat hoik deuh cao pa ting sibrawm lie? 8 An khankix mawh pa nie lheu lhaong khaing raoma, mawh sang pon yuh maix tix lie? Nie lheu khaing meung yum, mawh sang pon tawng maix yuh ka mawx lie? 9 An khankix phan tiag ti yaox mawh pa nie lheu lang khaing haktiex mai nie lheu vieh khaing rawm sigrit sigra heue. 10 Phan Nawh Cao giex tix laung maix daux thawng mai prawng see ka maix, mawh pui mawx pa sang pon tiebtie ka Nawh Cao lie? 11 Grawh grawng nawh, Nawh Cao tawng ka krax pie lhen pui khankix, Nawh Cao yaox grawng pa caox caig yuh kix heue. Mawh ang Nawh Cao lai tiag cheu ti yaox grawng an khankix lie? 12 Grawh grawng nawh pui daox pui aw tix kaux tak lih ti koe pingnya cuyi, yam hoik keh kawn la tiag tix mu ti mawh pui tix kaux heue. 13 “Yawbax eue, deuh rhawm maix rahsee mai deeh hoek sawg ka Nawh Cao, 14 phan krax lud koe ka daux tawm taix maix mai teei ti tik khaing maix dee singai mai paw kieh pa caox caig khankix ot daux nyiex gox maix. 15 Khaix an maix tak pon yaog ngai tix ka daux krax pa ang tix koe pa seeing brai, mawh heue maix tak mawh pa kaux cong mai ang koe krax lhat graung, 16 Grawh grawng nawh maix tak sang piawm ka krax kha rhawm tix mai doh deud ka ceu an khankix hoik luan hu awm rawm dee singai, 17 ju maix tak mawh pa nie lheu riang khaing pa riang yam jung singaix heue. Viang hoik faik kawx maix tak sang awm pa riang ponngawb heue. 18 Maix tak sang yaox ti ot ka daux pa yiien yawg, kheu koe krax keud pot jun pot tix, mawh heue, viang maix hoik som nai yam in kawx mai maix tak yaox tix laux lee ka daux pa yiien yawg heue. 19 Yam it maix pui tix kaux kawx, tak ang pon yuh maix lhat graung, mawh heue, pui tom nie tak mhaing krax teem ka maix heue. 20 Viang mawh nan, ngai pui caox khankix tak sang iak riang iak rao mai kix ang lai yaox daux krax klawd tix mai krax keud pot jun pot kix tak mawh pa som nai tau mai ju kix heue.”