1 Ref 49:1 Ye 1:5; Kal 1:15Klawn tiex khankix eue, nghiet ka Aux, pex pui kuceu khaing dee singai eue, nghiet heue, Siyiex hoik kok ka Aux, tom ka daux vaig, Nawh cao hoik dauk ceu kaux aux tom yam ot aux daux vaig miex tix. 2 Nawh yuh jheeh aux awm vaig lawm mai mox aux ka greem veei taix tix. Yuh aux mawh te rawn tix plang mai Nawh mox aux ka daux mawk te tix. 3 Nawh ah nin ka aux, “Maix mawh siliex Aux, pui Isarelax pa rieb Aux min pakngai kheu maix.” 4 Khaix an aux ah nin, “Aux hoik yuh kaing ka daux pa giex going, Aux hoik nai riang rao tix, pa ang tie mawh tidtix, viang mawh nan, pa mawh meh aux, koe mai Siyiex mai totaix pa khaw aux ti pon koe tau mai Siyiex.” 5 Yam in Siyiex, cao pa yuh aux jah tom daux vaig, sonsang mawh siliex Nawh Cao mai sonsang deeh viex Yakop hoek ka Nawh Cao, sonsang khrawm pui Isarelax ti hoek ka Nawh ah nin, mawh kheu aux rieb min pakngai ka daux ngai Siyiex mai Siyiex aux tak mawh riang rao Aux. 6 Nawh Cao ah nin, “Awm pa mawh maix siliex Aux, sonsang yaog ka doeh ru Yakop mai sonsang kieh pui Isarelax, Ref 49:6 Isa 42:6; Luk 2:32; Cau 26:23.pa deuk deeh mhawm krax ot, jhak ti yaox ka an awm pa mawh pa iak ngie, Aux kieh maix mawh pa riang ka pui piang haktiex, sonsang tah hu krax taoh tom sidah sidu haktiex.”Ref 49:6 Cau 13:47. 7 Siyiex cao pa taoh pui Isarelax mai cao pa singax singeh, ah nin ka pui pa salao mai ka pui pa koeng ceu pui haktiex kah mai pa mawh siliex cao pa kwang haktiex, “Simiang tak jhak mai kaoh cung, cub kawn simiang tak krub ka nawh, kheu Siyiex mawh cao pa kaux sijax, cao pa singax singeh pui Isarelax, cao pa laug ka maix.” 8 Siyiex ah nin ka daux bawg yam pa khaw, Aux hoik pawk lox maix mai ka daux singaix krax taoh, Ref 49:8 2Kaw 6:2.Aux hoik teem ka maix, Aux hoik kia ngien ka maix mai kieh maix yuh sijax mukheu ka pui piang haktiex, sonsang pang ka haktiex, sonsang tawx sinngao ka haktiex dee yiien yawg. 9 Ah nin ka pui pa laung khankix, hoek heue mai ka pui pa ot ka daux pa faik, “Jhi tokaux tix heue, “Kix tak eei ju tix hawt krax laux, ka dee koe rib ka piang dee lhaong mawh dee sawg kix ti ih. 10 Kix tak ang lai cai rhawm mai ang lai simie ti nyaux rawm, si aoh praix mai singaix ang lai hoek ka piang kix, mawh kheu Nawh Cao caux rhawm thung kix mai thung kix hu ka rawm keut.Ref 49:10 Jhi 7:16-17. 11 Aux tak kieh gawng cie tix mawh krax mai yaog krax ting Aux lhaong. 12 Jhak heue, cub pui in tak hoek khaing dee singai, tiblah tak hoek khaing plak laong mai plak klip singaix mai tiblah kaoh khaing haktiex Sinim. 13 Ref 49:13 Isa 44:23; Ye 51:48; Jhi 12:12; 18:20Raoma eue, ah lai rhax, kheu pa gaux rhawm, haktiex eue, gaux rhawm heue, gawng khankix eue, gaux rhawm ah lai rhax, mawh kheu Siyiex tawx riang rao ka pui Nawh Cao mai caux rhawm ka pui tix pa kha rhawm tix khankix. 14 Zion ah nin “Siyiex hoik tik vud ka aux mai cao simiang Aux hoik piawm ka aux.” 15 “Mawh sang piawm bun pa sang tawx kawn ngie tix peuex mai ang caux rhawm ka kawn pa keh khaing vaig tix lie? Viang kix kawn piawm kawx, Aux tak ang piawm ka maix. 16 Jhak heue, Aux hoik tiiem maix ka daux tawm taix tix, guh veng maix koe sivoe ngai Aux jheung jheung. 17 Cao phan maix tak pex ka pui yuh maix laux mai kieh pui pa tik vud ka maix lih hu khaing maix.” 18 Yaog ngai tix jhak hawt vung viang tix, kix tak khrawm paox tix hoek ka maix, Siyiex ah nin “Awm im ju Aux maix tak ceep ka kix awm kraung ceep mai rhawt kix ka nyoi tix awm bun yuh ka paox. 19 Dah dee tik maix mai dee ang pui ot mai haktiex pa laux leeing maix, tak sikhawp ka pui pa ot kah mai pui pa sang bleet ka maix tak ot singai. 20 Khaix yum kawn praix, pa keh yam yaox maix krax tuk tak ah nin ka daux yhaok maix, dee in sikhawp son aux, sawg ka dee sang tawx tix aux ot. 21 Yam an maix tak sang ah nin ka daux rhawm tix, mawh pui mawx pa keh ti tawx in son aux, aux hoik tuk kheu yum kawn tix mai hoik mawh pui neh mai mawh pui pa giex laung mai pa vung viang, mawh pui mawx pa eei kix ting laong lie? Jhak heue mai hoik prah aux ot nong nong mai pui in khankix kaoh khaing dee mawx?” 22 Siyiex ah nin, “Jhak heue, Aux tak yaog taix tix, ka piang haktiex ku meung mai pak chix tix, son pui kuceu, kix tak klien kawn simex maix hoek mai kix tak pux kawn bun maix hoek ka piang klip tix. 23 Simiang khankix tak mawh keeing seep maix mai laux simiang khankix tak mawh miex seep maix, kix tak ngeuh kaing tix ka maix mai gup pakngai tix ka piang tiex mai lied phawng tiex ka caong maix mai maix tak tawng mawh Aux Siyiex, pui pa krox jun ka Aux, tak ang pon krax kaig.” 24 Tak rhim kug khaing pui ting riang mai tak teem pui pa giex laung khaing pui pa pex lie? 25 Siyiex ah nin, “Pie ka pui pa giex laung pa viex pui pa ting riang hu, tak deeh viex hoek mai kug pui pa lhat ex kah kawx, tak deeh pon taoh kah, mawh kheu Aux tak yuh ka pui pa simah ka maix mai tak taoh ka kawn praix maix. 26 Aux tak kieh pui yeen ya ka maix ih ka nex cao tix, kix tak yoek ka nham cao tix, awm yoek ka rawm plix siiet mai kawn pui kix tak tawng, Aux mawh Siyiex Cao pa taoh maix mai cao pa taoh lawd maix, Siyiex pa ting riang pui Yakop heue.